Septiembre 11–17

2 Taga Corinto 1–7

“Makikappiakayo iti Dios”

Irugim ti panagsaganam babaen ti panangbasam iti 2 Taga Corinto 1–7. Ti Umaykayo, Sumurot Kaniak—Para kadagiti Indibidual ken Pamilia ket makatulong kenka tapno maawatam dagitoy a kapitulo, ken daytoy a balabala ket makaited kenka kadagiti kapanunotan iti panangisuro.

Yawis ti Panagbibinninglay

Mabalin nga addaan ti sumagmamano kadagiti ubbing iti klasem kadagiti inaramid a surat itoy a lawas maipapan no kasano a maysa a nasayaat a pagwadan ti maysa a disipulo ni Jesucristo (kitaen iti this week’s outline iti Umaykayo, Sumurot Kaniak—Para kadagiti Indibidual ken Pamilia). No inaramidda, nasapsapa kadakuada a mangibinglay iti surat iti klase. Wenno kiddawen kadagiti ubbing nga ibinglayda ti maysa a sabali a banag a nasursuroda.

Isuro ti Doktrina: In-inaudi nga Ubbing

2 Taga Corinto 1:3–4

Liwliwaennak ti Nailangitan nga Ama, ket mabalinko ti mangliwliwa kadagiti dadduma.

Kasano a maikkam dagiti ubbing iti panagtalek a liwliwaento ida ti Nailangitan nga Ama? Kasano a maallukoymo ida a mangliwliwa kadagiti dadduma?

Dagiti Mabalin nga Aktibidad

• Mangitugot kadagiti banag iti klase a mangted iti gin-awa, a kas iti maysa nga ules wenno pagbenda. Kiddawen kadagiti ubbing no ania dagiti mangliwliwa kadakuada no nalidayda wenno mabutengda wenno addaanda kadagiti sabali a parikut. Ibasam ti 2 Taga Corinto 1:3–4 kadagiti ubbing, ket ilawlawag a ti “rigat” ket sabali pay a balikas para kadagiti narikut a problema. Ibinglay dagiti sumagmamano a wagas a nakaliwliwaan kenka ti Nailangitan nga Ama, ken paneknekam a liwliwaennanto met dagiti ubbing.

• Ipakitam dagiti ladawan ti tattao a mabumbuniagan (kitaen iti Libro ti Arte ti Ebanghelio, dagiti num.103–4) bayat ti panangibasam iti 2 Taga Corinto 1:4 kadagiti ubbing. Ilawlawag a no mabuniagantayo, ikaritayo a liwliwaentayo dagiti dadduma. Kasano a masurottayo ti balakad ni Pablo a “liwliwaen dagiti adda iti uray ania a pagladingitan”?

2 Taga Corinto 2:7–8, 10

Mapakawanko dagiti dadduma.

Pumilika manipud kadagiti sumaganad nga aktibidad—wenno agaramid iti bukodmo—a tumulong a mangpapigsa iti tarigagay dagiti ubbing a mangpakawan kadagiti dadduma.

Dagiti Mabalin nga Aktibidad

• Ilawlawag kadagiti ubbing a kayat ni Pablo a mamakawan dagiti Santo a Taga Corinto iti maysa a tao a nagbasol. Basaem ti 2 Taga Corinto 2:7–8, 10, ket awisem dagiti ubbing nga iparabawda dagiti imada iti puspusoda tunggal kanito a mangngegda dagiti balikas a pakawanen ken pinakawan.

• Awisem dagiti ubbing a mangyakem no kasano a mabalinda ti agresponde kadagiti situasion no nagaramid ti maysa a tao iti maysa a banag a saan a nasayaat. Pagsisinnublatem ida a mangisao iti “Ladingitek” ken “Pakawanenka.” Kasano a makatulongtayo kadagiti tao a mangammo a pakawanentayo ida? Ilawlawag a ti maysa a wagas ket mabalin a “paneknekanyo ti ayatyo,” wenno mangipakita iti ayat kadakuada (2 Taga Corinto 2:8).

2 Taga Corinto 4:1–2

Mamatiak iti panagbalin a napudno.

Insuro ni Pablo a dagiti katulongan ni Cristo “nagpanawan[da] dagiti mailemlemmeng a nakababain.” Utobem dagiti wagas a mapapigsam ti tarigagay dagiti ubbing nga agbalin a napudno iti amin a banag.

Dagiti Mabalin nga Aktibidad

• Tulongam dagiti ubbing a mangyulo iti ragup ti balikas a “Mamatikami iti kinapudno” (Pagannurotan ti Pammati 1:13). Isurat daytoy a ragup ti balikas iti papel a pulseras a mabalin a dekorasionan ken isuot dagiti ubbing. Ilawlawag a ti panagbalin a napudno iramanna ti panangibaga iti napudno.

• Kiddawen kadagiti ubbing a mangingato kadagiti imada no isaom ti maysa a banag a pudno ken ibabada dagitoy no isaom ti maysa a banag a saan a pudno. Agaramidka iti simple ngem nabatad a palawag, kas “Domingo ita nga aldaw” wenno “Tallo ti agongko.” Uliten ti aktibidad iti sumagmamano a daras, a pagsisinublatem dagiti ubbing a mangibaga ii maysa a pudno ken palso a sasao. Apay a kayat ti Nailangitan nga Ama nga ibinglaytayo ti ebanghelio?

• Ipakita ti video nga “And the River Will Grow” (ChurchofJesusChrist.org). Ania ti nasursuro ti agtutubo nga Elder Soares maipapan iti kinapudno? Allukoyem dagiti ubbing nga agsagana para iti katulaganda iti panagbuniag babaen ti panagbalin a napudno.

Isuro ti Doktrina: In-inauna nga Ubbing

2 Taga Corinto 1:3–4

Liwliwaennak ti Nailangitan nga Ama, ket mabalinko ti mangliwliwa kadagiti dadduma.

Ti pananglaglagip no kasano a niliwliwa ti Dios ida ket mabalin a mangparegta kadagiti ubbing a mangted iti liwliwa kadagiti dadduma.

Dagiti Mabalin nga Aktibidad

• Bayat ti panangbasam iti 2 Taga Corinto 1:3–4, kiddawen kadagiti ubbing a dumngeg iti sungbat iti saludsod nga “Ania ti aramiden ti Dios para kadatayo?” Tulongam dagiti ubbing a mangilista kadagiti wagas a pangliwliwaan kadatayo ti Dios. Awisem dagiti ubbing a mangibinglay kadagiti padas idi naliday wenno mariribukan wenno nagbutengda ket liniwliwa ida ti Dios.

• Awisem dagiti ubbing a mangibinglay kadagiti wagas a pakapagtalinaedentayo ti katulagantayo iti panagbuniag a mangliwliwa kadagiti dadduma (kitaen iti Mosiah 18:9). Mangted kadakuada iti gundaway a mangpanunot iti maysa a tao nga am-ammoda nga agkasapulan iti liwliwa ken agaramid ti plano a makatulong iti dayta a tao.

2 Taga Corinto 2:5–11

Mapakawanko dagiti dadduma.

Mabalin a narigat ti mangpakawan kadagiti dadduma no natangsitda kadatayo. Ngem mapadasanto dagiti ubbing a sursuruam ti ayat, kappia, ken ragsak bayat ti panagsursuroda a mamakawan.

Dagiti Mabalin nga Aktibidad

• Ibagam kadagiti ubbing a maysa a tao iti Corinto ti nagbasol ket “nangpaleddaang” kadagiti Santo (kitaen iti 2 Taga Corinto 2:5). Kiddawen kadagiti ubbing a magsukisok iti 2 Taga Corinto 2:7–8 tapno mangsapul no ania ti kayat nga ipaaramid ni Pablo kadagiti Santo.

• Ibinglay ti maysa a padas idi pinakawanmo ti maysa a tao—wenno pinakawannaka ti maysa a tao—ken no ania ti nariknam kalpasanna. Wenno mangipabuyam ti video a “The Goal: A Story of Faith, Friendship and Forgiveness” (ChurchofJesusChrist.org). Awisem dagiti ubbing a mangibinglay kadagiti padasda iti panangpakawan.

2 Taga Corinto 5:6–7

“Magna[ak] gapu ti pammati, saan nga iti panagkita.”

Ibilang no kasano a maallukoymo dagiti ubbing a mangtungpal kadagiti bilin ti Dios uray no saanda a makita dagiti bendision a tarigagayanda a dagus.

Dagiti Mabalin nga Aktibidad

• Basaem ti 2 Taga Corinto 5:6–7 ken Alma 32:21 kadagiti ubbing, ken kiddawen kadakuada a mangsapul kadagiti balikas ken ragup ti balikas a makatulong a mangilawlawag no ania ti pammati. Paisuratmo kadakuada dagiti panangilawlawagda ken paibinglay dagitoy iti tunggal maysa.

• Awisem ti maysa kadagiti ubbing nga agkidem, ket idawatmo kadagiti dadduma pay nga ubbing a mangted kadagiti direksion a makatulong kenkuana a mangileppas iti maysa nga aramid kas iti panangbangon iti maysa a torre nga usaren dagiti bloke wenno pannagna iti aglawlaw ti siled. Kasano a makatulong kadatayo daytoy nga aktibidad tapno maawatan no ania ti kaipapanan ti “magna gapu ti pammati” iti Dios?

• Ipabuyam ti video “Reunited by Faith” (ChurchofJesusChrist.org), ket saludsodem kadagiti ubbing no kasano a nagna iti pammati ti agtutubo a lalaki iti video. Mangibinglay iti maysa a padas idi nagnaka gapu iti pammati, ket allukoyem dagiti ubbing a mangibinglay kadagiti padasda.

2 Taga Corinto 7:8–10

Ti panagladingit a mayanurot iti Dios ti mangiturong kaniak iti panagbabawi.

Gagangay a marikna dagiti ubbing ti agbain wenno mapabainan no matiliwan ida a nagaramid iti maysa banag a maikaniwas. Tulongam ida a mangilasin kadagitoy a rikna gapu iti panagladingit a mayanurot iti dios, a mangiturong iti panagbabawi.

Dagiti Mabalin nga Aktibidad

• Ilawlawag nga iti 2 Taga Corinto 7:8–10, imbasar ni Pablo iti maysa a surat nga immun-una nga insuratna kadagiti Santo, a sibabatad a nangbalballaaganna kadakuada maipapan iti basbasolda. Aggigiddan a mangbasa kadagitoy a bersikulo. Apay a naragsakan ni Pablo iti panagladingit dagiti Santo? Ilawlawag a daytoy a kita ti panagladingit ket maawagan a panagladingit a mayanurot iti dios.

• Kiddawem kadagiti ubbing a mangpanunot maipapan iti maysa a kanito idi nagaramidda iti maysa a banag a maikaniwas ket nagleddaangda gapu iti daytoy. Awisem ida a mangsaludsod iti bagbagida, “Apay a nagleddaangak?” ket kalpasanna ibinglayda dagiti sungbatda. Isurat dagiti sungbatda iti pisarra (kas pagarigan, “Nabutengak a makiriri” wenno “Ammok a pinaayko ti Nailangitan nga Ama” wennoi “Pinagsangitko ti maysa a tao”). Ania kadagiti sungbat iti pisarra ti kasla “panagladingit a mayannurot iti dios”? (2 Taga Corinto 7:10). Apay a ti panagladingit a mayannurot iti dios ket nasaysayaat ngem iti sabali a kita ti ladingit a mariknatayo kalpasan ti panangaramid iti maysa a banag a maikaniwas?

Yallukoy ti Panagsursuro iti Pagtaengan

Awisem dagiti ubbing a mangibinglay iti pamiliada ti maysa kadagiti aktibidad manipud iti klase ita nga aldaw, nalabit a kabayatan ti family home evening.

Panangpadur-as iti Panangisurotayo

I-display ti maysa a nasantuan a kasuratan. Pumili iti maysa a bersikulo iti nasantuan a kasuratan a makitam a napateg, ken i-display daytoy iti siled ti klase a masansan a pakakitaanto dagiti ubbing iti daytoy. Nalabit a makapagsisinnublat dagiti ubbing a mangpili iti nasantuan a kasuratan nga i-display.