Septiembre 18–24

2 Taga Corinto 8–13

“Ti Dios Ayatenna ti Mangted a Siaayat”

Umayto dagiti kasayaatan a kapanunotan para iti panangisuro kadagiti ubbing iti klasem bayat ti sikakararag panagadalmo iti 2 Taga Corinto 8–13 a sipapanunot kadakuada. Masarakan iti daytoy a balabala dagiti mainayon a kapanunotan iti panangisuro.

Yawis ti Panagbibinninglay

Maysa a nasayaat a wagas a pangawis iti panagbibinninglay kadagiti ubbing ket ti panangipalagip kadakuada iti maysa a banag nga inyawismo kadakuada nga aramidenda kabayatan ti napalabas nga adalen. Kiddawem kadakuada a mangibinglay kadagiti padasda.

Isuro ti Doktrina: In-inaudi nga Ubbing

2 Taga Corinto 9:6–7

Makaitedak a siaayat kadagiti tao nga agkasapulan.

Kanayon a nasayaat ti agserbi kadagiti dadduma, ngem nasaysayaat pay no agserbi a siaayat. Ibilangmo no anianto ti mangparegta iti tunggal ubing a “mangted a siaayat.”

Dagiti Mabalin nga Aktibidad

• Awisem dagiti ubbing a mangulit iti ragup ti balikas “Ti Dios ayatenna ti mangted a siaayat” (2 Taga Corinto 9:7). Ania ti kayat a sawen ti “mangted a siaayat”? Mangipakita iti maysa a ladawan ti naragsak a rupa ken maysa a naliday a rupa, ken saludsodem kadagiti ubbing no asino ditoy ti mangted a siaayat.

• Aggigiddan a kansionen ti maysa a kanta maipapan iti panagserbi, kas iti “When We’re Helping” (Children’s Songbook, 198), iti sumagmamano a daras. Ti umuna a gundaway, kiddawen kadagiti ubbing nga agkanta a siaayat; kalpasanna kiddawen kadakuada nga agkansion iti kanta nga addaan iti nadumaduma a rikna wenno kababalin, kas iti naliday, nabannog, makagura, wenno mabuteng. Ipalagip kadagiti ubbing a kayat ti Nailangitan nga Ama a siaayat a tulongantayo dagiti dadduma. Kalpasanna kansionen manen ti kanta a siraragsak.

• Tulongam dagiti ubbing nga agaramid kadagiti ladawan ti umis-isem a rupa ken agmismisuot a rupa. Idawatmo kadakuada nga ingatoda dagiti ladawanda a nakaisem no mangngeganda dagiti balikas nga umisem wenno umis-isem bayat ti panangkantada iti “Smiles” (Children’s Songbook, 267). Mabalinda nga aramiden ti kasta met laeng a banag kadagiti ladawanda a nakamisuot ken dagiti balikas nga agmisuot ken agmismisuot. Tulongam dagiti ubbing a mangilasin no ania a rupa ti naragsak ken ania ti saan a naragsak. Ilawlawag a ti maysa a wagas ti panagbalin a naragsak ken agserbi iti dadduma ket umisem ken tulongan dagiti dadduma nga umisem.

• Planuem ti maysa nga aktibidad nga agserbi iti maysa a tao, kas iti maysa nga ubing a saan a dumar-ay iti Primary wenno maysa a miembro ti ward wenno kaarruba nga agkasapulan. Mabalin nga agplanoka a sumarungkar iti pagtaengan daytoy a tao, agsurat kadagiti napintas a notes wenno agdrowing kadagiti ladawan, wenno agaramid iti merienda nga ibinglay.

• Awisem ti tunggal ubing nga agplano iti maysa a tignay ti naragsak a serbisio para iti maysa a miembro ti pamiliana. Kabayatan ti sumaruno nga adalen iti sumaruno a lawas, kiddawem kadakuada a mangibinglay no ania ti inaramidda.

2 Taga Corinto 12:7–10

Sungsungbatan ti Dios dagiti kararag, ngem saan a kanayon iti wagas a namnamaentayo.

Ti padas ni Pablo iti panagkararagna tapno maikkat ti “siit iti lasag” ket mangisuro kadatayo a no dadduma papigsaennatayo ti Dios kadagiti pannuboktayo imbes nga ikkatenna dagitoy.

Dagiti Mabalin nga Aktibidad

• Ipakitam kadagiti ubbing ti maysa a mula nga addaan kadagiti siit (wenno maysa a ladawan ti maysa a mula). Tulongam ida a mangipapan no ania ti rikna ti napalokan iti siit iti kudilda iti napaut a panawen. Gupgopem ti 2 Taga Corinto 12:7–10 para kadagiti ubbing, a mangilawlawag a ti “siit iti lasag” ni Pablo ket maysa a pannubok, maysa a banag a narigat iti biagna. Nupay indawat ni Pablo iti Dios nga ikkatenna ti pannubok, saan nga inaramid ti Dios. Ngem ketdi, insuro ti Dios ken ni Pablo a makatulong dagiti karit kadatayo a makasursuro nga agbalin a napakumbaba ken agtalektayo Kenkuana. Kalpasanna mapagbalinnatayo ti Dios a napigsa.

• Paneknekam nga ammo ti Nailangitan nga Ama no ania ti kasayaatan para kadatayo, ken mangtedto kadatayo iti kasapulantayo, uray no maigiddiat daytoy iti ipagaruptayo a kasapulantayo. Mabalinmo met nga ibinglay ti maysa a padas idi nasungbatan dagiti kararagmo iti maysa a wagas wenno iti maysa a panawen a maigiddiat iti no ania ti ninamnamam. Makatulong met ti maysa nga estoria kas iti “The Diabetes Dilemma” (Friend, Sept. 2019, 4–5) wenno “Please Bless Ace” (Friend, Nob. 2019, 32–33).

• Makipagkansion kadagiti ubbing iti maysa a kanta maipapan iti ayat ti Nailangitan nga Ama kas iti “A Child’s Prayer” (Children’s Songbook, 12–13). Kiddawen kadagiti ubbing no ania ti masaoda iti maysa a tao a masdaaw no dumngeg ken sungbatan met laeng ti Nailangitan nga Ama dagiti kararag. Kansionen manen ti kanta, ken ilawlawag dagiti binatog a mangiladawan no kasano ti rikna ti Nailangitan nga Ama maipapan kadatayo.

Isuro ti Doktrina: In-inauna nga Ubbing

2 Taga Corinto 9:6–9

Makaitedak a siaayat kadagiti tao nga agkasapulan.

Kayat ni Pablo ti mangparegta kadagiti Santo a mangted iti paset ti kinabaknangda a pangtulong kadagiti nakurapay. Kasano nga usaremto dagiti balikasna a mangparegta kadagiti ubbing nga agserbi kadagiti dadduma?

Dagiti Mabalin nga Aktibidad

• Isuratmo dagiti balikas ti 2 Taga Corinto 9:7 iti pisarra, a nakablangko dagiti kangrunaan a balikas. Awisem dagiti ubbing a mangpugto no ania dagiti awan a balikas. Kalpasanna ipabasam kadakuada ti bersikulo kadagiti nasantuan a kasuratan a mangpunno kadagiti blanko. Ania ti kayat a sawen ti mangted iti “dakes a nakem, wenno mapilpilit”? Ania ti kayat a sawen ti “mangted a siaayat”?

• Awisem dagiti ubbing a tulongandaka a mangsapul kadagiti ladawan ti Mangisalakan nga agserserbi kadagiti dadduma ( sumagmamano ti adda iti Umaykayo, Sumurot Kaniak—Para kadagiti Indibidual ken Pamilia). Saludsodem kadakuada no ania ti makitada kadagitoy a ladawan a makatulong kadakuada a mangammo a siaayat a nagserbi ni Jesus kadagiti dadduma. Mangituding iti maysa a panggep a tun-oyen a kas maysa a klase a mangisao iti wen no agkiddaw kadatayo dagiti miembro ti pamilia wenno dagiti dadduma iti umay a lawas, kas iti panangtulong iti lawlaw ti balay wenno panangaywan kadagiti dadduma.

• Tulongam dagiti ubbing nga agdekorar iti babassit a bato. Ilawlawag a dagitoy dagiti “bato ti panagserbi” a maikabilda kadagiti bolsada ita a lawas tapno makatulong kadakuada a manglagip iti siaayat a panagserbi kadagiti dadduma.

• Aggigiddan a mangkansion iti maysa a kanta maipapan iti panagserbi, kas iti “Fun to Do” (Children’s Songbook, 253). Tulongam dagiti ubbing a mangpanunot kadagiti baro a bersikulo iti kanta a mangiladawan iti nadumaduma a wagas a makapagserbi iti dadduma.

2 Taga Corinto 12:7–10

Sungbatan a kanayon ti Nailangitan nga Ama dagiti kararag, ngem saan a kanayon a mangted kaniak iti amin a banag a dawatek.

Indawat ni Pablo iti Dios nga ikkatenna dagiti pagkapsutanna, ngem ammo ti Dios a ti pagkapsutan ni Pablo ti mamagpakumbaba kenkuana ken mangpapigsa kenkuana.

Dagiti Mabalin nga Aktibidad

• Awisem dagiti ubbing a pagdiligen ti 2 Taga Corinto 12:9–10 ken Ether 12:27. Ania dagiti balikas wenno ragup ti balikas ti naulit? Ania ti isursuro dagitoy a bersikulo? (Mabalin a kasapulam nga ilawlawag nga idildilig ni Pablo ti karitna iti maysa a siit iti kudilna.) Ania ti insuro ti Dios ken ni Pablo maipapan kadagiti pannubok?

• Awisem dagiti ubbing a mangilista iti sumagmamano a pannubok nga adda iti biag ti tattao. Tulongam ida a mangibilang no kasano a masuruan ti maysa a tao manipud kadagitoy a pannubok ken mabendisionanda gapu kadagitoy.

• Basaem kadagiti ubbing ti “The Diabetes Dilemma” (Friend, Sept. 2019, 4–5). Kiddawen kadagiti ubbing a mangibinglay kadagiti padasda idi inkararaganda ti maysa a banag ket saanda nga inawat daytoy. Kiddawem kadakuada nga ibinglayda no ania ti nasursuroda manipud kadagiti padasda. Mabalin nga addaanka kadagiti bukodmo a padas nga ibinglay a kasta met. Ibinglaymo ti pammaneknekmo a kanayon a sungbatan ti Nailangitan nga Ama dagiti kararagtayo iti wagas ken iti panawen a kangrunaan a mabendisionantayo.

Yallukoy ti Panagsursuro iti Pagtaengan

Awisem dagiti ubbing a siaayat a mangted kadagiti pagtaenganda itoy a lawas ken umayda iti klase a nakasagana nga agipadamag maipapan iti no kasano a nagserbida iti maysa a tao nga agkasapulan.

Panangpadur-as iti Panangisurotayo

Risuten dagiti makasinga nga addaan iti ayat. “No dadduma agtignay ti maysa nga ubing iti wagas a pakasingaan iti panagsursuro dagiti dadduma iti klase. No mapasamak daytoy, agbalinka a naanus, managayat, ken mannakaawat maipapan kadagiti karit a mabalin a sangsanguen ti ubing. … No adda dagiti naisangsangayan a kasapulan ti ubing a mangigapu iti pannakasinga, kasaritam ti espesialista iti pagkurangan [disability especialist] iti ward wenno stake wenno bisitaem ti [disability.ChurchofJesusChrist.org] tapno maammuam no kasano a nasaysayaat a maipaaymo dagita a kasapulan” (Panangisuro iti Wagas ti Mangisalakan,26).