miting iti sakramento

Agosto 28–Septiembre 3

1 Taga Corinto 8–13

“Dakayo ti Bagi ni Cristo”

Bayat ti panagbasam iti 1 Taga Corinto 8–13, denggem dagiti parikna manipud iti Espiritu maipapan no kasano ti mangisuro kadagiti pagbatayan kadagitoy a kapitulo. Laglagipem nga ania kadagiti kapanunotan iti aktibidad ti mabalin nga ibagay para kadagiti in-inauna ken in-inaudi nga ubbing.

icon iti panagbibinninglay

Yawis ti Panagbibinninglay

Awisem dagiti ubbing a mangibinglay iti maysa a banag nga inaramidda kabayatan ti miting ti sakramento a mangpanunot maipapan ken Jesus.

icon iti panangisuro

Isuro ti Doktrina: In-inaudi nga Ubbing

1 Taga Corinto 10:13

Tulongannakto ti Nailangitan nga Ama nga agaramid kadagiti nalinteg a pili.

Saan a kanayon a nalaka ti agpili iti umno, ken ammo ti Nailangitan nga Ama dayta. No agdawattayo, tulongannatayonto gapu ta kayatna nga agballigitayo.

Dagiti Mabalin nga Aktibidad

• Ibasa ti 1 Taga Corinto 10:13 kadagiti ubbing, nga aw-awisem ida a mangiwagwag iti uloda no mangngeganda ti balikas a “nasulisog” wenno “pannulisog.” Ilawlawag no ania ti kaipapanan kenka daytoy a bersikulo.

• Isaritam ti sumagmamano nga ababa nga estoria dagiti tao a dandani agaramid iti biddut a pili. Bayat ti panagdengngeg dagiti ubbing, awisem ida a mangingato kadagiti imada wenno papel a stop sign no agaramid ti tao iti estoria iti biddut a pili. Ania koma ti umno a pili? Paneknekam a tulongannatayo ti Nailangitan nga Ama nga agpili iti umno.

• Ipakitam ti maysa a ladawan ni Jesus, ket makipagkansion kadagiti ubbing iti maysa a kanta maipapan Kenkuana kas iti “I’m Trying to Be like Jesus” (Children’s Songbook, 78–79). Isaritam maipapan no kasaano a mangtulong kenka ti pananglagip ken ni Jesus nga agaramid kadagiti nasayaat a pili. Ipakitam dagiti ladawan dagiti dadduma pay a banag a makatulong kadatayo nga agaramid kadagiti nasayaat a pili, a kas kadagiti nagannak wenno nasantuan a kasuratan. Saludsodem kadagiti ubbing no ania ti makatulong kadakuada nga agaramid kadagiti nasayaat a pili.

1 Taga Corinto 12:4, 7–12

Binendisionannak ti Nailangitan nga Ama kadagiti naespirituan a sagut.

Nangted ti Nailangitan nga Ama ti amin nga annakna kadagiti naespirituan a sagut. Ania dagiti naespirituan a sagut a makitam kadagiti ubbing a sursuruam?

Dagiti Mabalin nga Aktibidad

• Kiddawen kadagiti ubbing a mangidrowing iti ladawan ti maysa a paggugustoda a sagut a naawatda. Ilawlawag nga ikkanatayo ti Nailangitan nga Ama kadagiti naespirituan a sagut a mangpapigsa iti pammatitayo ken tulongannatayo a mangbendision kadagiti dadduma. Ibinglay kadagiti ubbing ti sumagmamano a sagut a nailadawan iti 1 Taga Corinto 12:7–11.

• Mangtedka iti surat iti tunggal ubbing, a mangiladawan iti maysa a naespirituan a sagut a nakitam kenkuana (wenno mabalin nga awisem dagiti nagannak a mangisurat kadagitoy a surat). Ikabli dagiti surat iti sobre. Paluktam kadagiti ubbing dagiti sobre, ken tulongam ida a mangbasa maipapan kadagiti naespirituan a sagutda.

dagiti kahon ti sagut

Nangted ti Nailangitan nga Ama ti amin nga annakna kadagiti naespirituan a sagut.

1 Taga Corinto 13

Mabalinko nga ayaten dagiti dadduma.

Isuro dagiti nasantuan a kasuratan a ti asi ti “nadalus nga ayat ni Cristo” (Moroni 7:47). Kasano a matulongam dagiti ubbing a mangpadur-as ken mangyebkas iti ayat a kas ken ni Cristo?

Dagiti Mabalin nga Aktibidad

• Basaen ti 1 Taga Corinto 13:13 ken Moroni 7:47, ket tulongam dagiti ubbing nga uliten ti ragup ti balikas a “Ti asi ti nadalus nga ayat ni Cristo.” Ipakitam dagiti ladawan ni Jesus iti panagbalinna a managayat ken naasi, ket kiddawen kadagiti ubbing no kasano nga impakitana ti panagayat iti dadduma (kitaen iti Libro ti Arte ti Ebanghelio para kadagiti kapanunotan).

• Makipagkanta kadagiti ubbing iti maipapan iti panangayat iti dadduma, kas iti “Jesus Said Love Everyone” wenno “Love One Another” (Children’s Songbook, 61, 136), Ipakitam dagiti ladawan ti nadumaduma a tao (kas iti maysa a naganak, manursuro, wenno gayyem), ket kiddawem kadagiti ubbing a mangibinglay no kasano a makapagserbida iti dayta a tao. Awisem dagiti ubbing a mangpanunot iti maysa a tao a mabalinda a pagserbian ken mangisurat iti surat wenno mangidrowing iti maysa a ladawan nga ited iti dayta a tao. No kasapulanda ti dadduma pay a kapanunotan maipapan iti no kasano nga agserbi, ipabuyam ti video “Pass It On” (ChurchofJesusChrist.org).

icon iti panangisuro

Isuro ti Doktrina: In-inauna nga Ubbing

1 Taga Corinto 10:13

Tulongannakto ti Nailangitan nga Ama a mangliklik iti sulisog.

Dagiti kari iti daytoy a bersikulo ti makaited kadagiti ubbing iti panagtalek a makatulongto kadakuada iti Nailangitan nga Ama a mangliklik iti sulisog.

Dagiti Mabalin nga Aktibidad

• Awisem dagiti ubbing a mangbasa iti 1 Taga Corinto 10:13 iti sagpaparis ken manggupgop iti bersikulo iti bukodda a balikas. Kiddawen kadagiti ubbing a mangibinglay iti padas a nakatulongan kadakuada ti Nailangitan nga Ama a mangliklik wenno mangsupring iti sulisog. Ania ti maaramidtayo tapno agpannuraytayo iti Nailangitan nga Ama no masulisogtayo?

• Mangisurat iti babassit a papel kadagiti sulisog a mabalin a pakaipasanguan dagiti ubbing iti agdama. Awisem dagiti ubbing a saggaysa a pumilida iti maysa a papel ket ibinglayna no ania ti inted kadatayo ti Nailangitan nga Ama a makatulong kadatayo a mangliklik wenno magsupring kadagitoy a pannulisog. Para iti sumagmamano a kapanunotan, aggigiddan a basaen ti Alma 13:28–29.

1 Taga Corinto 11:23–29

Kabayatan ti sakramento, mabalinko a panunoten no kasano ti panangsurotko iti Mangisalakan.

Tulongam dagiti ubbing a sursuruam a mangkita a ti sakramento ti maysa a gundaway a “sukimaten [amirisen]” iti bagbagida ken pabaruen ti katulaganda iti panagbuniag nga agserbi iti Apo ken tungpalen dagiti bilinna (1 Taga Corinto 11:28).

Dagiti Mabalin nga Aktibidad

• Kiddawem iti maysa nga ubing a mangbasa iti 1 Taga Corinto 11:28. Ania ti kayat a sawen ti “sukimaten [amirisen]” ti babagitayo sakbay ti yaawat iti sakramento? Kiddawen kadagiti ubbing a mangpanunot iti dadduma pay a tao nga agamiris kadagiti banag, kas kadagiti doktor, detektib wenno sientista (kas pagarigan, amirisennatayo dagiti doktor tapno mapennek a nasalun-attayo). No makiranudtyo iti sakramento, ania ti mabalin nga aramidentayo a mangamiris no kasano ti panagtungpaltayo kadagiti katulagantayo iti panagbuniag?

• Kiddawen kadagiti ubbing nga agilista kadagiti banag a mabalinda a panunoten no makiranudda iti sakramento. Awisem ida a mangusar kadagiti listaanda a kas panglaglagip a mangamiris iti bagbagida bayat ti sakramento.

1 Taga Corinto 12:4, 7–12, 31; 13:1–8

Addaannak kadagiti naespirituan a sagut.

Insuro ni Pablo a dagiti sagut ti espiritu ket “maited iti tunggal tao” (1 Taga Corinto 12:7). Makatulong daytoy a pagbatayan kadagiti ubbing a mangpadur-as ti panangipateg iti bagida, nangnangruna no usarenda dagiti sagutda a mangbendision iti dadduma.

Dagiti Mabalin nga Aktibidad

• Kiddawen kadagiti ubbing a mangisurat iti pisarra dagiti naespirituan a sagut a masarakanda iti 1 Taga Corinto 12:7–11; 13:2. Awisen ida a mangsapul iti ania man a nayon a sagsagut a nadakamat iti Moroni 10:8–18 ken Doktrina ken Katulagan 46:13–26. Ibinglay kadakuada dagiti sumagmamano a nayon a naespirituan a sagut a dinakamat ni Elder Marvin J. Ashton: “Ti sagut ti panagkiddaw; ti sagut ti panagdengngeg; … ti sagut ti panangliklik iti panagsusupanget; … ti sagut ti panagkalikagum a manggun-od iti dayta nalinteg; ti sagut ti saan a panaghusga; … ti sagut ti panangsapul iti Dios para iti pannarabay; … ti sagut ti panangaywan iti dadduma; … ti sagut ti panangiruknoy iti kararag; ti sagut ti panangiburay iti napigsa a pammaneknek” (There Are Many Gifts,” Ensign, Nob. 1987, 20). Awisem dagiti ubbing a mangisarita iti maipapan kadagiti naespirituan a sagut a makitada iti tunggal maysa.

• Sakbay ti klase, agdamagka kadagiti nagannak dagiti ubbing maipapan kadagiti sagut a makitada kadagiti annakda, wenno agpanunotka mismo maipapan kadagiti sagut dagiti ubbing. Isaritam kadagiti ubbing maipapan kadagitoy a sagut. Awisem dagiti ubbing a mangisurat iti maysa a wagas a pakausarandanto iti sagutda a mangbendision iti maysa a tao daytoy a lawas.

• Ibinglaymo dagiti agduduma a situasion a mabalin a pakausaran dagiti tao iti naespirituan a sagut manipud iti 1 Taga Corinto 12:7–10. Awisem dagiti ubbing a mangilasin kadagiti naespirituan a sagut a mausar iti tunggal situasion.

icon iti panagsursuro

Yallukoy ti Panagsursuro iti Pagtaengan

Isingasing paglilinnawagan dagiti ubbing kadagiti pamiliada ti maysa a banag a nagsasaritaanyo iti klase. Awisem dagiti ubbing a mangibinglay kadagiti naespirituan a sagutda kadagiti pamiliada ket saludsodenda kadagiti miembro ti pamiliada no ania dagiti sagutda.

Panangpadur-as iti Panangisurotayo

Mangted kadagiti awis a mangdayaw iti kinawaya nga agpili. Bayat ti panangawismo kadagiti ubbing nga agtignay iti no ania ti nasursuroda, mangpanunot kadagiti wagas a mangdayaw iti kinnawaya a panagpilida. Imbes a panangted kadagiti masinunuo nga awis, ibilang ti panangawis kadakuada a mangpanunot kadagiti bukodda a wagas a mangyaplikar iti no ania ti nasursuroda.

panid ti aktibidad: mabalinko nga ayaten dagiti dadduma