nagkauna a Corinto

Corinto, Makin-abagatan a Grecia, ti Forum ken Civic Center, naipinta a ladawan ni Balage Balogh/www.ArchaeologyIllustrated.com

Agosto 21–27

1 Taga Corinto 1–7

“Naan-anay Koma ti Panagtitimpuyogyo”

Tulongannakanto ti Espiritu Santo a mangammo no ania dagiti pagbatayan ti ebanghelio iti 1 Taga Corinto 1–7 a makatulongto kadagiti ubbing a sursuruam. Bayat ti nainkararagan a panagbasam kadagitoy a kapitulo, isuratmo dagiti kapanunotan ken riknam a sumangbay kenka manipud iti Espiritu.

icon iti panagbibinninglay

Yawis ti Panagbibinninglay

Kiddawen kadagiti ubbing no imbinglayda iti pamiliada ti maysa a banag a nasursuroda iti Primary itay napalabas a lawas. (Mabalin a kasapulam nga irebyu kadakuada ti adalen itay napalabas a lawas.) No kasta, ania ti imbinglayda?

icon iti panangisuro

Isuro ti Doktrina: In-inaudi nga Ubbing

1 Taga Corinto 2:11–14

Isuro kaniak ti Espiritu Santo dagiti kinapudno ti ebanghelio.

Maysa kadagiti akem ti Espiritu Santo ti mangisuro kadatayo iti kinapudno. Ania dagiti padas a mabalinmo nga ibinglay kadagiti ubbing a makatulong kadakuada a makaawat iti daytoy?

Dagiti Mabalin nga Aktibidad

• Ipakita dagiti banag wenno ladawan a mangibagi kadagiti wagas a pakasursuruantayo maipapan iti lubong (kas iti pagadalan, libro, wenno celfon). Ania ti masursurotayo no usarentayo dagitoy a banag? Ilawlawag nga iti 1 Taga Corinto 2:11, 14, insuro ni Pablo a masursurotayo maipapan iti Dios babaen laeng iti Espiritu ti Dios, nga isu ti Espiritu Santo. Ania ti mabalin nga aramidentayo tapno masursurotayo “dagiti banag ti Dios”?

• Pagsipatem dagiti imam no isaom ti tunggal syllable iti binatog nga “Isuro ti Espiritu Santo ti kinapudno kadatayo.” Kiddawen kadagiti ubbing a pagsipaten dagiti imada ken ulitenda ti ragup ti balikas. Ibinglaymo kadagiti ubbing ti padasmo idi tinulongannaka ti Espiritu Santo a mangammo a pudno ti maysa a banag.

• Aggigiddan nga agkansion iti maysa a kanta maipapan iti Espiritu Santo, kas iti “The Holy Ghost” (Children’s Songbook, 105). Tulongam dagiti ubbing a mangsapul kadagiti balikas ken ragup ti balikas iti kanta a mangisuro no kasano a makisao ti Espiritu Santo kadatayo ken no ania ti isurona kadatayo.

1 Taga Corinto 3:10–11

Ni Jesuscristo ti pamuonko.

Agisasaad iti pamuon dagiti ubbing para kadagiti pammaneknekda, ken makatulongka kadakuada a mangbangon iti natibker a pamuon ken ni Jesucristo.

Dagiti Mabalin nga Aktibidad

• Ibasam ti 1 Taga Corinto 3:11 kadagiti ubbing, ken ilawlawagmo a ni Jesucristo ti pamuontayo. Ipakitam kadagiti ubbing dagiti sumagmamano a ladawan dagiti banag a maaddaantayo iti pammaneknek, a pakairamanan ti maysa a ladawan ni Jesucristo. Tulongam ida a mangurnos kadagiti ladawan tapno ti ladawan ni Jesus ti makimbaba a paset, kas maysa a pamuon, ken dagiti dadduma pay a ladawan a “mabangon” iti maysa a pammaneknek Kenkuana.

• Mangparnuay kadagiti tignay para iti kanta a “The Wise Man and the Foolish Man” (Children’s Songbook, 281), ket kansionen ti kanta a kaduam dagiti ubbing. Ikkam ti tunggal ubing iti maysa a bato nga addaan iti “Ni Jesucristo ti pamuonko” a nakasurat ditoy. Ipayawid kadakuada dagiti bato tapno mangipalagip kadakuada no ania ti nasursuroda.

• Ibinglay dagiti ladawan a mangipakita iti sumagmamano a paggugustom nga estoria manipud iti biag ti Mangisalakan, ket kiddawen kadagiti ubbing a mangibaga kenka no ania ti mapaspasamak kadagiti ladawan. Paibinglay iti sumagmamano a paggugustoda nga estoria maipapan ken ni Jesus. Ibinglaymo ti pammaneknekmo a ni Jesucristo ti pundasion ti pammatim.

1 Taga Corinto 6:19

Maipada iti maysa a templo ti bagik.

Kasano a matulongam dagiti ubbing a mangbigbig iti pateg dagiti bagida kas sagut manipud ti Dios ken maaddaan iti dakdakkel a tarigagay a mangaywan kadagitoy?

Dagiti Mabalin nga Aktibidad

• Ipakitam kadagiti ubbing dagiti ladawan dagiti templo (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia), ket basaem dagitoy a balikas manipud iti 1 Taga Corinto 6:19: “Ti bagiyo isu ti templo ti Espiritu Santo.” Tulongam dagiti ubbing a makaawat a kayat ti Nailangitan nga Ama a pagtalinaedentayo a nadalus ken nasantuan dagiti bagitayo, a kas iti maysa a templo.

• Iparang iti ladawan ti maysa nga ubing, ket palawlawan daytoy kadagiti banag a nasayaat para kadagiti bagitayo ken dagiti banag a dakes. Awisem dagiti ubbing nga agsisinnublat iti panangilasin kadagiti nasayaat a banag ken panangikkat kadagiti dakes a banag.

• Aggigiddan nga agkansion iti kanta maipapan kadagiti bagi, kas iti “Head, Shoulders, Knees, and Toes” (Children’s Songbook, 275), ket kiddawen kadagiti ubbing no apay nga agyamanda para kadagiti bagida.

icon iti panangisuro

Isuro ti Doktrina: In-inauna nga Ubbing

1 Taga Corinto 1:23–25

Ti panagbalin a masirib kaipapananna ti panagtalek iti sirib ti Dios.

Maammuanto dagiti ubbing a sursuruam—no saanda pay—nga isuro dagiti sumagmamano a tao dagiti banag a mangsupiat iti sirib ti Dios. Ti panagadal iti 1 Taga Corinto 1:23–25 ket makatulong kadagiti ubbing a makaawat a makapagtalektayo iti sirib ti Dios gapu ta dakdakkel daytoy ngem iti siribtayo.

Dagiti Mabalin nga Aktibidad

• Idawatmo kadagiti ubbing a mangbasa iti 1 Taga Corinto 1:23–25 ken mangsapul kadagiti balikas a sirib ken kinamaag. Ilawlawag nga ipagarup ti adu a tattao a maag dagiti pannursuro ni Pablo, ngem inlawlawag ni Pablo a ti panangpati iti ebanghelio ni Cristo ti pudno a sirib. Apay a nainsiriban ti mamati iti no ania ti isuro ti Dios?

• Tulongam dagiti ubbing a mangyakem no kasano a masungbatanda dagiti tao a mangipagarup a “maag” dagiti bilin ti Dios—kas ti panamati iti bilin a maaddaan iti pammati iti Mangisalakan, agtungpal iti Nainsiriban a Balikas, wenno agtungpal iti linteg ti apagkapullo. Kas pagarigan, mabalinda a paneknekan maipapan kadagiti bendision a sumangbay iti panagbiag kadagitoy a pannursuro.

• Iburaymo ti maysa a padas idi impagarup dagiti dadduma a minamaag dagiti pammatim, wenno ibinglaymo ti maysa a pagarigan manipud kadagiti nasantuan a kasuratan. Pangibinglayem dagiti ubbing kadagiti kasta met la a padas. Kasano a matulongannatayo ti 1 Taga Corinto 1:25 nga agtalinaed a napudno no ibaga dagiti dadduma a minamaag dagiti pammatitayo?

1 Taga Corinto 2:11–14

Isuro kaniak ti Espiritu Santo dagiti kinapudno ti ebanghelio.

Kasano a matulongam dagiti ubbing a mangbigbig a kasapulanda ti Espiritu Santo tapno maawatanda “dagiti banag ti Dios”?

Dagiti Mabalin nga Aktibidad

• Idawat kadagiti ubbing a mangilista kadagiti wagas a masursurotayo maipapan iti lubong—kas pagarigan, dagiti libro, pagadalan, ken ti internet. Kalpasanna aggigiddan a basaen ti 1 Taga Corinto 2:11–14. Ania ti isuro dagitoy a bersikulo maipapan iti no kasano a masursurotayo “dagiti banag ti Dios”?

• Isaritam maipapan iti maysa a panawen idi nasursurom ti maysa a banag babaen ti Espiritu ti Dios. Tulongam dagiti ubbing a mangilasin kadagiti panawen idi nariknada ti Espiritu. Ania a “banag ti Dios” (1 Taga Corinto 2:11) nga adda iti Espiritu a nangtulong kadatayo a makaawat?

• Awisen ti tunggal ubing a mangbasa iti maysa kadagitoy a nasantuan a kasuratan: 1 Taga Corinto 2:11–14; 1 Nephi 10:17; Moroni 10:3–5; ken Doktrina ken Katulagan 8:2–3. Kiddawen kadagiti ubbing a mangibilang no ania ti nasursuroda manipud kadagitoy a nasantuan a kasuratan maipapan iti no kasano nga isuronatayo ti Espiritu Santo. Apay nga agyamantayo para iti sagut ti Espiritu Santo?

1 Taga Corinto 6:19–20

Nasken a respetuek ti bagik ken pagtalinaedek daytoy a nasantuan.

Ti pannakaawat a sagut manipud iti Nailangitan nga Ama dagiti bagitayo ket makatulongto kadagiti ubbing a mapagtalinaed a sagrado dagiti bagida, uray no masulisogda nga agaramid wenno saan.

Dagiti Mabalin nga Aktibidad

• Mangitugot iti maysa a container nga adda dagiti ladawan ti maysa nga ubing ken ti templo iti unegna. Awisem dagiti ubbing a mangbasa iti 1 Taga Corinto 6:19–20 ken mangpugto no ania ti adda iti uneg ti container. Paluktam kadakuada daytoy ket ilawlawag no kasano a maipada kadagiti templo dagiti bagitayo.

• Isaritam kadagiti ubbing no kasano a nasken a tratuentayo ti maysa a templo. No maipada kadagiti templo dagiti bagitayo, kasano ti rumbeng a panangtratotayo kadagiti bagitayo? Ti panagkansion wenno panagbasa kadagiti balikas iti maysa a kanta maipapan kadagiti templo, kas iti “The Lord Gave Me a Temple” (Children’s Songbook, 153), ket makatulong a mangsungbat iti daytoy a saludsod. No agaramidtayo kadagiti biddut, kasano a mapagbalintayo dagiti “templotayo” a nadalus manen?

• Aggigiddan a basaen ti “Sagrado ti Bagim” (iti Para iti Pigsa dagiti Agtutubo [pangiwanwan, 2022), 22–29.) Awisem dagiti ubbing a mangilista iti pisarra ti balakad a masarakanda maipapan iti no kasano ti mangaywan kadagiti bagitayo.

icon iti panagsursuro

Yallukoy ti Panagsursuro iti Pagtaengan

Awisem dagiti ubbing a mangibinglay kadagiti pamiliada iti kanta a kinansionda iti klase ken no ania ti nasursuroda manipud iti daytoy.

Panangpadur-as iti Panangisurotayo

Paneknekan ti maipapan ken ni Jesucristo Maysa kadagiti kapatgan a banag a mabalinmo nga aramiden kas maysa a mannursuro ket ti mangipaneknek maipapan ken ni Jesucristo. Mangtulongto daytoy kadagiti ubbing a mangpapigsa kadagiti pammaneknekda ken mangrikna iti ayat ti Mangisalakan para kadakuada.

panid iti aktibidad: mayarig ti bagik iti maysa a templo