Agosto 14–20

Taga Roma 7–16

“Abakem ti Dakes Gapu iti Naimbag”

Bayat ti panangbasam ti Taga Roma 7–16, isuratmo dagiti ania man nga impresion a maawatmo maipapan no kasano a mabalinmo ti mangisuro kadagiti ubbing kadagiti kinapudno kadagitoy a kapitulo.

Yawis ti Panagbibinninglay

Iti sumagmamano nga aldaw a nasapsapa, awisem ti maysa wenno ad-adu pay kadagiti ubbing a mangsarak iti maysa a bersikulo iti 1 Taga Roma 7–16 a mabalinda nga ibinglay iti klase. Mabalinmo nga awisen dagiti nagannak kadakuada a tumulong no kasapulan.

Isuro ti Doktrina: In-inaudi nga Ubbing

Taga Roma 8:35–39

Ay-ayatennak ti Nailangitan nga Amak.

Kasano a mausarmo dagiti balikas ni Pablo a mangisuro kadagiti ubbing a kanayonto nga ay-ayatenna ida ti Nailangitan nga Ama?

Dagiti Mabalin nga Aktibidad

• Tulongam dagiti ubbing a mangyulo iti ragup ti balikas nga “[Awan ti mabalin] a mangisina kadatayo iti ayat ti Dios” (Taga Roma 8:39). Panunotem maipapan iti maysa a wagas a mangipakita iti daytoy a kinapudno. Kas pagarigan, mabalinmo ti mangitugot iti dua a tabla nga inlansam nga agkadua, ket sinuratam ti maysa iti “datayo” ket ti sabali iti “ti ayat ti Dios.” Ipakitam kadagiti ubbing no mabalinda a pagsinaen dagiti tabla.

• Ipakitam ti maysa a ladawan ti init, wenno awisem dagiti ubbing a kumita iti ruar ti tawa ket kitaenda ti lawag ti init. Kasano a maipada ti init iti ayat ti Nailangitan nga Ama? Tulongam dagiti ubbing a mangkita a nupay adayo ti init, matulongannatayo a makarikna iti bara. Mariknatayo ti ayat ti Nailangitan nga Ama iti amin a gundaway, nupay awan Isuna mismo kadatayo. Aggigiddan a kantaen ti maysa a kansion maipapan iti ayat ti Nailangitan nga Ama, kas iti “My Heavenly Father Loves Me” (Children’s Songbook, 228–29).

Matulongan dagiti ubbing dagiti dadduma a makasursuro maipapan iti Mangisalakan ken maaddaan iti pammati Kenkuana. Oras ti estoria iti Galilea, ni Del Parson

Taga Roma 10:17

Agtaud ti pammati iti panagdengngeg iti balikas ti Dios.

Bayat ti idedengngeg dagiti ubbing iti balikas ti Dios ken dumngegda a nasayaat iti daytoy, bumilegto ti pammatida iti Dios.

Dagiti Mabalin nga Aktibidad

• Ibasam ti Taga Roma 10:17 kadagiti ubbing, ket ipakitam kadakuada dagiti ladawan ti kasasaad a mabalinda a pakangngegan iti balikas ti Dios (kas iti sangapamiliaan a panagadal iti nasantuan a kasuratan, dagiti klase iti simbaan, wenno sapasap a komperensia, kitaen iti panid ti aktibidad iti daytoy a lawas). Kiddawen kadagiti ubbing no nangngegandan ti balikas ti Dios.

• Isaritam ti estoria maipapan iti maysa nga ubing a dumngeg iti balikas ti Dios iti nadumaduma a wagas. Bayat ti panangisaritam iti estoria, in-inut a mangpabussogka iti maysa a balloon a mangibagi iti no kasano a dumakkel ti pammati ti ubing iti tunggal kanito a mangngeganna ti balikas ti Dios.

• Tapno matulongan dagiti ubbing a makaawat a mabalin a dumakkel ti pammatida, tulongam ida a mangkanta iti “Faith” (Children’s Songbook, 96–97). Bayat ti panagkantada, idawat kadakuada nga agpammarang nga isuda dagiti bukel babaen ti panagrukobda. Tunggal kantaenda ti balikas a pammati, pagtakderem ida nga in-inut a kas maysa a dumadakkel a mula.

• Ilemmeng iti siled ti klase ti maysa a set dagiti nasantuan a kasuratan, maysa a ladawan ti Presidente ti Simbaan, ken maysa a kopia ti Friend a magasin. Kiddawen kadagiti ubbing a mangsapul kadagitoy a banag ken mangibinglay no kasano a mapagbalin a posible ti tunggal maysa kadagitoy a mangngegantayo ti balikas ti Dios.

Taga Roma 16:1–4

Maisaok ti agyamanak kadagiti tumulong kaniak.

Nagyaman ni Pablo kadagiti tao a timmulong kenkuana. Matulongam dagiti ubbing a makakita kadagiti nasayaat a banag nga aramiden dagiti dadduma para kadakuada ken malagipda ti agyaman kadakuada.

Dagiti Mabalin nga Aktibidad

• Ilawlawag a nagyaman ni Pablo iti tulong a naawatna manipud iti maysa a babai nga agnagan iti Febe ken iti agassawa nga agnagan iti Priscila ken Aquila (kitaen iti Taga Roma 16:1–4). Kiddawen kadagiti ubbing a mangidrowing kadagiti ladawan ni Pablo ken dagitoy tallo a tao bayat ti panangbasam kadagitoy a bersikulo.

• Awisen ti tunggal ubing a mangibinglay iti maysa a banag a nasayaat nga inaramid ti maysa a tao para kenkuana itay nabiit. Tulongam dagiti ubbing nga agaramid kadagiti kard iti panagyaman [thank-you cards] para kadagita a tao.

• Tulongam dagiti ubbing a mangsursuro no kasano ti mangisao iti agyamanak kenka iti nadumaduma a pagsasao. Makatulong ti kanta a “Children All Over the World” (Children’s Songbook, 16–17).

Isuro ti Doktrina: In-inauna nga Ubbing

Taga Roma 8:16–18

Kayat ti Nailangitan nga Ama nga agsaganaak nga umawat iti amin nga adda Kenkuana.

Ti plano ti Nailangitan nga Ama ti mangaramid a posible nga agbalintayo a kas Kenkuana ken agtawid iti amin nga adda Kenkuana. Daytoy a kinapudno ti mabalin a mangparegta kadagiti ubbing a sursuruam tapno napudpudnoda nga agbiag iti ebanghelio.

Dagiti Mabalin nga Aktibidad

• Aggigiddan a basaen ti Taga Roma 8:16–18. Ania ti masursurotayo manipud kadagitoy a bersikulo maipapan iti kinasiasinotayo ken iti pakapagbalinantayo? Ilawlawag a ti “agtawid” ket maysa a tao nga agtawid, wenno umawat, iti no ania ti adda kadagiti nagannak kenkuana. Isurat iti pisarra ti Ania ti kasapulan nga aramidentayo tapno agtawid iti amin nga adda iti Amatayo iti Langit? Aggigiddan a mangkansion iti maysa a kanta maipapan iti panagtungpal, kas iti “I Will Follow God’s Plan” (Children’s Songbook, 164–65), nga agsapsapul kadagiti sungbat. Ania pay dagiti dadduma a sungbat a mapanunot dagiti ubbing?

• Kiddawen kadagiti ubbing nga agpanunot maipanggep iti maysa nga ari a kayatna a dagiti lallaki ken babbai nga annakna ti agturay iti pagarianna iti maysa nga aldaw. Ilawlawag a mayarig ti Nailangitan nga Ama iti maysa nga ari, ket datayo dagiti naarian nga annakna a lallaki ken babbai. Mabalinmo nga ibinglay ti estoria maipapan iti lalaki nga anak ti Ari Louis XVI ti Pransia, a masarakan iti mensahe ni Sister Elaine S. Dalton a “Remember Who You Are!” (Liahona,, Mayo 2010, 121). Apay a napateg a laglagipen a datayo dagiti annak ti Nailangitan nga Ama ken mayanaktayo nga agbalin a kas Kenkuana iti maysa nga aldaw? Kasano nga apektuan daytoy a kinapudno dagiti pili nga aramidentayo ditoy a daga?

Taga Roma 10:17

Agtaud ti pammati iti panagdengngeg iti balikas ti Dios.

Aduan iti gundaway dagiti ubbing a dumngeg iti balikas ti Dios. Tulongam ida a mangkita no kasano a mapadakkel ti pammatida ti panagdengngeg iti balikas ti Dios.

Dagiti Mabalin nga Aktibidad

• Isurat ti sumaganad a binatog iti pisarra: umay babaen ti , ken babaen ti ti . Kiddawen kadagiti ubbing a punuanda dagiti blangko kalpasan ti panagbasa iti Taga Roma 10:17. Mangibinglay iti maysa a panawen idi nasuruan ti maysa a tao iti kinapudno ti ebanghelio a nakatulong a nangpabileg iti pammatim—nalabit a mabalinmo nga ibinglay ti paggugustom a nasantuan a kasuratan wenno adaw manipud iti sapasap a komperensia. Awisem dagiti ubbing a mangibinglay iti bukodda a padpadas.

• Ikkam ti maysa nga ubing iti maysa a ladawan ti Mangisalakan a mangag-agas iti maysa a tao ket ibagam kenkuana a saanna nga ipakita ti ladawan iti dadduma nga ubbing. Kiddawem ti ubing a mangted kadagiti pamugtuan a mangtulong kadagiti dadduma nga ubbing a mangpugto no ania ti ipakita ti ladawan. Kasano a matulongantayo ti dadduma nga agsursuro maipapan iti Mangisalakan tapno maaddaanda iti pammati Kenkuana?

Taga Roma 14:10,13

“Ditay ngarud … agiinnukom iti maysa ken maysa.”

No makilangen dagiti ubbing iti dadduma nga agaramid kadagiti sabali a pili ngem iti aramidenda a pili, mabalin a masulisogda nga agbalin a managukom wenno managhusga. Ibilangmo no kasano a makatulong kadakuada ti balakad ni Pablo kadagiti Taga Roma tapno maliklikan ti kasta a panagukom wenno panaghusga.

Dagiti Mabalin nga Aktibidad

• Awisem ti maysa nga ubing a mangbasa iti Taga Roma 14:10, 13. Kiddawem iti dadduma nga ubbing a bilangenda no namin-ano nga inusar ni Pablo ti balikas a mangukom. Ania ti kayat a sawen ti mangukom iti maysa a tao? Apay a nasken a liklikantayo ti panangukom iti dadduma?

• Ipakitam ti ladawan ti maysa a tao, ket saludsodem kadagiti ubbing no ania ti ammotayo maipapan iti daytoy a tao babaen laeng iti panangkita iti ladawan. Ania dagiti sumagmamano a banag a ditayo ammo maipapan kenkuana? Apay a ti Apo ti kasayaatan a mangukom itoy a tao? (kitaen iti 1 Samuel 16:7).

Yallukoy ti Panagsursuro iti Pagtaengan

Kiddawen kadagiti ubbing a mangala iti maysa nga aktibidad nga inaramidyo kas maysa a klase ket aramidenda daytoy iti pamiliada. Ibagam kadakuada nga iti sumaruno a lawas mabalinda nga ibinglay no ania ti inaramidda.

Panangpadur-as iti Panangisurotayo

Ikkam dagiti ubbing kadagiti gundaway nga agtignay. Masansan a narigat nga agtugaw tapno dumngeg a sipapasnek dagiti ubbing iti napaut nga oras. Sagpaminsan, awisem dagiti ubbing a tumakder kas paset ti klase wenno agtugaw iti suelo imbes nga agtugaw kadagiti tugawda.