Agosto 7–13

Taga Roma 1–6

“Ti Pannakabalin ti Dios iti Pannakaisalakan”

Ania dagiti parikna a naawatmo bayat ti panangbasam iti Taga Roma 1–6? Makatulong kenka dagitoy a parikna a mangpili manipud kadagiti sumaganad a kapanunotan iti panangisuro wenno mangisagana iti bukodmo.

Yawis ti Panagbibinninglay

Awisem dagiti ubbing a mangibinglay no ania ti inaramidda a kas sungbat iti ania man nga awis nga intedmo kadakuada iti maudi a lawas ti adalen.

Isuro ti Doktrina: In-inaudi nga Ubbing

Taga Roma 1:16–17

Maipakitak ti pammatik ken ni Jesucristo babaen ti panangsurot Kenkuana.

Insuro ni Pablo nga addaan ti ebanghelio iti pannakabalin a mangisaangbay iti pannakaisalakan iti tunggal maysa nga agbiag babaen iti pammati ken ni Jesucristo. Kasano a matulongam dagiti ubbing a mangipakita iti pammatida ken ni Jesucristo babaen ti panangsurot Kenkuana?

Dagiti Mabalin nga Aktibidad

• Ibasam ti Taga Roma 1:17 kadagiti ubbing, ken tulongam ida a mangyulo iti ragup ti balikas a “Ti nalinteg agbiagto gapu iti pammati.” Mabalinmo a dutokan ti tunggal ubing iti maysa a balikas iti ragup ti balikas ket kiddawem kadakuada a mangisao iti dayta a balikas no itudom ida. Ilawlawag a ti ragup ti balikas kayatna a sawen a nasken nga addaantayo iti pammati ken ni Jesucristo. Saludsodem kadagiti ubbing no ammoda no ania ti pammati. Ipakitam ti ladawan ni Jesucristo ket ilawlawagmo a patientayo nga agpaypayso Isuna uray no ditayo pay nakita Isuna. Daytoy ti pammati—panamati iti maysa a banag nupay saantayo pay nakita daytoy.

• Ilawlawag a maipakitatayo ti pammatitayo ken ni Jesucristo babaen ti panagtulnog Kenkuana. Ilemmeng dagiti ladawan iti lawlaw ti siled a dagiti tao nga agar-aramid iti no ania ti indawat ni Jesus nga aramidentayo. Pagsinnublatem dagiti ubbing a mangsapul ken mangiladawan kadagiti ladawan. Ania ti maaramidtayo a mangsurot ken ni Jesus?

• Idawatmo iti maysa kadagiti ubbing a mangikidem iti matana, ken tarabayem isuna iti ibaballasiwna iti siled nga agturong iti maysa a ladawan ni Jesus. No ipalubos ti oras, ikkam ti batang dagiti dadduma pay nga ubbing. Tulongam dagiti ubbing a makaawat a nasken a surotenda dagiti pannursuro ni Jesus a kas iti panagsurotda iti pannarabaymo.

Taga Roma 6:1–11

Maipada ti panagbuniag iti panagbalin a maysa a baro a tao.

Agsagsagana dagiti ubbing a sursuruam para iti panagbuniag. Ania ti masursurotayo maipapan iti panagbuniag manipud iti Taga Roma 6?

Dagiti Mabalin nga Aktibidad

• Awisem dagiti ubbing a mangulit iti ragup ti balikas a “Magna koma iti baro a panagbiag” (Taga Roma 6:4). Ibagam kadagiti ubbing no ania ti kaipapanan daytoy kenka. Kas pagarigan, mabalinmo nga ibinglay dagiti lagip maipapan iti aldaw a nabuniaganka ket isaritam no kasano a natulongannaka ti panagbuniagmo nga agbalin nga ad-adda a kas ken ni Jesucristo. Usarem ti aktibidad itoy a lawas a mangisuro kadagiti ubbing a tulongannatayo ti panagbuniag nga agbalin a kas baro a tao.

• No asino man kadagiti ubbing ti dimmar-ayen iti maysa a panagbuniag, awisem ida a mangibinglay iti padasda. Wenno ipakitam ti maysa a ladawan ti maysa a tao a mabumbuniagan (kitaen iti Libro ti Arte ti Ebanghelio, dagiti num. 35, 103–4). Tulongam dagiti ubbing a makaawat nga iti panagbuniag agaramidtayo kadagiti kari tapno agbalin a kas ken ni Jesus. Awisem ida a mangdrowing iti ladawan ti bagbagida a mabumbuniagan ket ibinglayda no ania ti mabalinda nga aramiden a makapagsagana para iti panagbuniagda.

• Makipagkansion kadagiti ubbing iti maysa a kanta maipapan iti panagbuniag, kas iti “When I Am Baptized” (Children’s Songbook, 103). Ania ti masursurotayo maipapan iti panagbuniag manipud iti daytoy a kanta?

Isimbolo ti panagbuniag ti rugi ti baro a biag kas maysa a disipulo ni Cristo.

Isuro ti Doktrina: In-inauna nga Ubbing

Taga Roma 1:16–17

Maipakitak ti pammatik ken ni Jesucristo babaen ti panangsurotko Kenkuana.

Insuro ni Pablo nga addaan ti ebanghelio iti pannakabalin a mangisangbay iti pannakaisalakan iti tunggal maysa nga agbiag babaen iti pammati ken ni Jesucristo. “Ti pammati ken ni Jesucristo ti umuna a pagbatayan ti ebanghelio. Daytoy ti mangparegta kadatayo nga agtungpal kadagiti bilin. Kasano a matulongam dagiti ubbing a nasaysayaat a maawatanda ti pammati?.

Dagiti Mabalin nga Aktibidad

• Kiddawem iti maysa nga ubing a mangsapul iti Roma iti maysa a mapa. Tulongam dagiti ubbing a makaawat a kadagiti sumaruno a sumagmamano a lawas, makasursurodanto manipud kadagiti surat nga insurat ni Pablo kadagiti miembro ti Simbaan iti nadumaduma a luglugar, mangrugi iti suratna kadagiti Taga Roma.

• Isurat ti teksto manipud iti Taga Roma 1:16 iti pisarra, a mangsukat iti sumagmamano a balikas kadagiti blangko. Kiddawen kadagiti ubbing a mangkita iti nasantuan a kasuratan ket punuanda dagiti blangko. Awisem dagiti ubbing a mangibinglay no ania ti kayat a sawen ti “Diak ibain ti ebanghelio ni Cristo” kadakuada.

• Awisem ti maysa nga ubing a mangbasa iti napigsa ti Taga Roma 1:17, ket padengngeg iti dadduma pay nga ubbing ti balikas a maulit. Ania ti kayat a sawen ti “agbiag gapu iti pammati”? Tulongam dagiti ubbing a mangsarak iti kaipapanan ti pammati iti maysa a pagadawan kas iti Pangiwanwan iti Nasantuan a Kasuratan, “Pammati” (scriptures.ChurchofJesusChrist.org). Kasano a maiduma ti biagtayo no awanantayo iti pammati ken ni Jesucristo?

• Ipakitam kadagiti ubbing ti maysa a mula ken maysa a bukel, ket saludsodem no kasano a matulongantayo ti maysa a bukel tapno agbalin a maysa a mula. Ilawlawag a no agmula ken sibugantayo ti maysa a bukel, maipakitatayo nga addaantayo iti pammati a dumakkelto daytoy. Kasano a maipakitatayo nga adda pammatitayo ken ni Jesucristo? Ibilang ti panagkansion iti maysa a kanta maipapan iti pammati, kas iti “Faith” (Children’s Songbook, 96), kas paset daytoy nga aktibidad.

Taga Roma 3:23–24

Kasapulantayo amin ni Jesucristo tapno mapakawan iti basbasoltayo.

Tinarigagayan ni Pablo a maawatan dagiti Romano a sumangbay laeng ti pannakaisalakan babaen ken ni Jesucristo ken iti paraburna. Utobem no kasano a maisurom daytoy a kinapudno kadagiti ubbing.

Dagiti Mabalin nga Aktibidad

• Ikkam ti tunggal ubing ti maysa a ragup ti balikas manipud iti Taga Roma 3:23–24, a naisurat iti maysa a papel. Awisem dagiti ubbing a mangurnos kadagiti ragup ti balikas iti husto nga urnos ket aggigiddan a mangbasa kadagiti bersikulo. Saludsodem kadagiti ubbing no ania ti nasursuroda manipud kadagitoy a bersikulo. Ilawlawag a ti “parabur” iti bersikulo 24 kaipapananna ti sagut ti ayat ken asi ti Mangisalakan, a mangaramid a posible nga umawattayo iti pannakapakawan iti basbasoltayo ken agbalin a nasaysayaat.

• Mangibitin iti maysa a ladawan iti ngatuen ti diding wenno iti sabali pay a lugar a saan a magaw-at mismo dagiti ubbing. Ipapadasmo kadakuada a manggaw-at iti daytoy, ket idasig daytoy iti no ania ti insuro ni Pablo iti Taga Roma 3:23. Kalpasanna tulongam ida a manggaw-at iti ladawan. Ania ti inaramid ti Mangisalakan para kadatayo a ditayo maaramid para iti bagbagitayo? Awisem dagiti ubbing a mangibinglay iti no kasano ti panagriknada maipapan iti Mangisalakan no panunotenda no ania ti naaramidnan ken maaramidna a mangtulong kadakuada.

Taga Roma 6:1–11

Maipada ti panagbuniag iti panagbalin a maysa a baro a tao.

Insuro ni Pablo nga isimbolo ti panagbuniag ti ipapatay ken Panagungar ni Cristo. Isimbolo pay daytoy ti ibabangon a “magna iti baro a panagbiag” (Taga Roma 6:4). Pabaruentayo ti panagkumittayo a magna iti baro a panagbiag iti tunggal kanito a makiranudtayo iti sakramento.

Dagiti Mabalin nga Aktibidad

• Awisem ti maysa nga ubing a mangbasa iti Taga Roma 6:3–6. Ania ti kinuna ni Pablo a “kaasping ti” panagbuniag?

• Ilawlawag no kasano nga isimbolo ti panagbuniag ti ipapatay ken panagungar. Mabalin a makatulong ti mangi-display iti maysa a ladawan wenno mangipabuya iti maysa a video kas iti “The Baptism of Jesus” (ChurchofJesusChrist.org). Apay a ti ipapatay ken panagungar ti nasayaat a simbolo ti no ania ti mapasamak no mabuniagantayo?

• Basaem dagiti kararag iti sakramento iti Doktrina ken Katulagan 20:77, 79). Ipalagip kadagiti ubbing a no makiranudtayo iti sakramento, pabaruentayo ti panagkumit nga inaramidtayo idi nabuniagantayo a mangsurot ken Jesucristo. Kasano a makatulong ti sakramento kadatayo a “magna iti baro a panagbiag”?

• Awisem dagiti ubbing nga agaramid kadagiti ladawan a mangipakita no ania ti kaipapanan kadakuada ti “magna iti baro a panagbiag.” Mabalin nga ibitin dagiti ubbing dagitoy a ladawan iti siledda tapno makatulong kadakuada a manglagip nga agaramid kadagiti nasayaat a pili.

Yallukoy ti Panagsursuro iti Pagtaengan

Isingasing nga idawat dagiti ubbing kadagiti miembro ti pamilia a pakaammuan ida no agar-aramidda iti maysa a banag a mangipakita iti pammati.

Panangpadur-as iti Panangisurotayo

Buklen ti panagtalek dagiti ubbing. Dayawem dagiti ubbing no makiramanda iti klase. Daytoy ti maysa a wagas a pakabuklan ti panagtalekda a makasursuroda iti ebanghelio.