Talek iti maysa a banag wenno tao. Kas masansan a maar-aramat iti nasantuan a kasuratan, talek ti pammati ken panagtalek ken ni Jesuscristo tapno agtungpal ti tao kenkuana. Nasken a maitalimudok ti pammati ken ni Jesucristo tapno maiturong ti tao iti pannakaisalakan. Adda met pammati dagiti Santo iti Ud-udina nga Aldaw iti Dios Ama, Espiritu Santo, bileg ti kinasaserdote, ken sabsabali pay a napateg a paset ti naisubli nga ebanghelio.
Iraman ti pammati ti namnama kadagiti banag a di makita, ngem pudno (Heb. 11:1; Alma 32:21; Ether 12:6). Agrusing ti pammati babaen ti pannakangngeg iti ebanghelio nga isuro dagiti naikkan iti turay a mangiwanwan nga imbaon ti Dios (Rom. 10:14–17). Saan a makaparnuay iti pammati dagiti datdatlag, ngem mapadur-as ti nabileg a pammati babaen ti panagtungpal iti ebanghelio ni Jesucristo. Iti sabali a pannao, maparnuay ti pammati babaen ti kinalinteg (Alma 32:40–43; Ether 12:4, 6, 12; DkK 63:9-12).
Agbunga iti kinadatdatlag, sirmata, tagtagainep, panagagas, ken amin a sagut ti Dios nga itedna kadagiti Santona, ti napudno a pammati. Babaen ti pammati magun-od ti pannakaugas dagiti basol ken pagangayanna mabalinna ti makipagtaeng iti sidong ti Dios. Mangiturong ti kaawan ti pammati iti pannakauppapay, a mapasamak gapu iti kinamanagbasol (Moro. 10:22).