Esdras

Saserdote ken mannurat iti Daan a Tulag a nangisubli kadagiti dadduma a Hudio iti Jerusalem manipud iti nakabaludanda a Babilonia (Es. 7–10; Neh. 8, 12). Idi 458 S.C. nagun-odna ti pammalubos ni Artaxerxes, ti ari iti Persia, a mangikuyog iti Jerusalem iti asino man a balud a Hudio a mayat a sumurot (Es. 7:12–26).

Sakbay ti panawen ni Esdras, dandani tengngel amin dagiti saserdote ti panagbasa kadagiti naurnong a naisurat a nasantuan a kasuratan a managan iti “paglitegan.” Timmulong ni Esdras iti pannakaiwaras ti nasantuan a kasuratan iti tunggal Hudio. Nagbalin idi agangay ti nasaknap a panagbasa iti “libro ti paglintegan” a nakaitalimudokan ti nailian a panagbiag dagiti Hudio. Nalabit a nagtaud ti kangrunaan nga adal ni Esdras iti bukodna nga ulidan iti panangisaganana iti kaungganna a mangadal iti paglintegan ti Apo, a mangtungpal iti daytoy, ken mangisuro kadagiti dadduma (Es. 7:10).