Pedro

Iti Baro a Tulag, ni Pedro ti sigud a Simeon wenno Simon (2 Ped. 1:1), ti mangngalap iti Betsaida nga agnanaed iti Capernaum a kaduana ti asawana. Inagasan ni Jesus ti ina ti asawana (Mar. 1:29–31). Natudingan da Pedro ken Andres a kabsatna a disipulo ni Cristo (Mat. 4:18–22; Mar. 1:16–18; Luc. 5:1–11). Inted kenkuana ti Apo ti naganna nga Aramico, ti Sepas a kayatna a sawen “ti mammadto” wenno “bato,” (Jn. 1:40–42; PJS, Jn. 1:42). Idinto a naagapad iti Baro a Tulag ti sumagmamano a pagkapsutan ni Pedro ditoy a biag, ipakitana pay a naparmekna ida ken napapigsa babaen ti pammatina ken ni Jesucristo.

Inannugot ni Pedro a ni Jesus ti Cristo ken Anak ti Dios (Jn. 6:68–69), ket pinili ti Apo a mangiggem kadagiti tulbek ti pagarian ditoy daga (Mat. 16:13–18). Iti Bantay ti Panagbalbaliw, nakita ni Pedro ti nagbalbaliw a Mangisalakan, kasta met kada Moises ken Elias (Elijah) (Mat. 17:1–9).

Ni Pedro ti pangulo nga Apostol idi panawenna. Kalpasan ti ipapatay, panagungar, ken panagpangato ti Mangisalakan, inummongna ti Simbaan ket inturongna ti pannakaawag ti apostol a mangsukat ken ni Judas Iscariote (Ara. 1:15–26). Inagasan da Pedro ken Juan ti lalaki a nayanak a lugpi (Ara. 3:1–16) ket milagro ti pannakawayawayana iti pagbaludan (Ara. 5:11–29; 12:1–19). Babaen ti naespirituan nga aramid ni Pedro ti umuna a pannakalukat ti ebanghelio kadagiti Gentil (Ara. 10–11). Kadagiti ud-udina nga aldaw, dimteng ni Pedro, a kaduana da Santiago ken Juan, manipud iti langit ket intedda ti Kinasaserdote a Melchizedek ken dagiti tulbek daytoy kada Joseph Smith ken Oliver Cowdery (DkK 27:12–13; 128:20).

Umuna a Surat ni Pedro

Naisurat ti immuna a surat manipud iti “Babilonia” (nalabit a Roma) ket naipatulod kadagiti Santo iti maaw-awagan itan iti Asia Minor kalpasan la unay ti panangidadanes ni Nero kadagiti Kristiano.

Saritaen ti kapitulo 1 ti naitani a rebbengen ni Cristo kas Mannubbot. Ilawlawag dagiti kapitulo 2–3 a ni Cristo ti kangrunaan a panuli ti Simbaan, nga adda kadagiti Santo ti nadayaw a kinasaserdote, ken ni Cristo nangasaba kadagiti espiritu iti pagbaludan. Ilawlawag dagiti kapitulo 4–5 no apay a maikasaba kadagiti natay ti ebanghelio ken no apay a taraonan dagiti elder dagiti arban.

Maikadua a Surat ni Pedro

Igunamgunam ti kapitulo 1 a siguraduen dagiti Santo dagiti pannakaawis ken pannakapilida. Ballaag ti kapitulo 2 a maibusor kadagiti sinsinan maestro. Saritaen ti kapitulo 3 dagiti ud-udina nga aldaw ken ti maikadua a yaay ni Cristo.