Sursurat ni Pablo

Insurat ni Pablo dagiti surat kadagiti Tesalonica manipud iti Corinto bayat ti maikadua a panagdaliasatna a kas misionario. Naagapad ti Tesalonica iti Ara. 17. Kinayatna ti agsubli iti Tesalonica, ngem dina naaramid (1 Tes. 2:18). Imbaonna ngarud ni Timoteo a mangliwliwa kadagiti napasurot ken padamaganna iti ar-aramidenda. Ti umuna a surat ti banag ti panagyamanna iti panagsubli ni Timoteo. Naisurat ti maikadua a surat iti saan unay a nabayag kalpasanna.

Insurat ni Pablo dagiti suratna kadagiti taga-Corinto bayat ti maikatlo a panagdaliasatna a kas misionario a sungbat dagiti saludsod ken pangurnos iti di panagkikinnaawatan dagiti Santo iti Corinto.

Mabalin a naisurat ti surat kadagiti taga-Galacia kadagiti adu a benneg ti simbaan iti Galacia. Sumagmamano kadagiti kameng ti Simbaan ti nangbaybay-a iti ebanghelio tapno kanunonganda ti paglintegan dagiti Hudio. Iti daytoy a surat, inlawlawag ni Pablo ti panggep ti paglintegan ni Moises ken ti pateg ti naespirituan a relihion.

Insurat ni Pablo ti suratna kadagiti taga-Roma manipud iti Corinto, a paset ti panagsagana dagiti Santo iti Roma iti manamnama nga isasarungkarna kadakuada. Paneknekan pay daytoy a surat dagiti doktrina a nagsusupangetan dagiti dadduma a Hudio a napasurot iti Kristianismo.

Insurat ni Pablo dagitoy a surat iti damo a pannakabaludna idiay Roma.

Insurat ni Pablo ti suratna kadagiti taga-Filipos kangrunaanna tapno ipeksana ti panagyaman ken panangipategna kadagiti Santo iti Filipo ken tapno linglingayenna ida iti pannakauppapayda iti napaut a pannakabaludna.

Insurat ni Pablo dagiti suratna kadagiti taga-Colosas kas banag ti damag a kumarkaro ti panagbiddut dagiti Santo iti Colosas. Namatida a ti kinaan-anay agtaud iti naannad a panangsurot kadagiti ordinansa a naindagaan laeng idinto a padur-asen koma ti Nakristianuan a galad.

Dakkel ti pateg ti surat kadagiti taga-Efeso, ta laonenna dagiti pannursuro ni Pablo maipanggep iti Simbaan ni Cristo.

Pribado a surat ti suratna ken ni Filemon maipanggep ken ni Onesimo, ti tagabo a tinakawanna ti amona, ni Filemon, ket naglibas a napan idiay Roma. Pinagsubli ni Pablo ni Onesimo iti amona nga adda surat a dumawdawat iti pannakapakawan ni Onesimo.

Insurat ni Pablo ti suratna kadagiti Hebreo kadagiti Hudio a kameng ti Simbaan tapno allukoyenna ida a natungpalen ti paglintegan ni Moises ken ni Cristo ken sinukatanen ti paglintegan ti ebanghelio ni Cristo.

Insurat ni Pablo dagitoy a surat kalpasan a nakaruar iti pagbaludan idiay Roma iti umuna a gundaway.

Napan ni Pablo idiay Efeso, a nangpanawanna ken ni Timoteo a mangpasardeng iti idadakkel dagiti kita ti panangipapan, a panggepna idi agangay ti agsubli. Insuratna ti umuna a suratna ken ni Timoteo, manipud iti Macedonia, tapno bagbagaan ken paregtaenna a mangituloy iti pagrebbenganna.

Insurat ni Pablo ti suratna ken ni Tito bayat ti kaaddana iti ruar ti pagbaludan. Nalabit a nasarungkaranna ti Crete, a pagpapaayan ni Tito. Kangrunaan nga inagapad ti surat ti nalinteg a panagbiag ken disiplina iti Simbaan.

Insurat ni Pablo ti maikadua a suratna ken ni Timoteo bayat ti pannakabaludna iti maikadua a gundaway, sakbay la unay ti pannakapapatay ni Pablo. Linaon daytoy a surat dagiti maudi a balikas ni Pablo ken impakitana ti nakaskasdaaw a tured ken talekna a simmango iti patay.