Nephi, Lalaki nga Anak ni Lehi

Iti Libro ni Mormon, ti nalinteg nga anak da Lehi ken Saria (1 Ne. 1:1–4; 2:5). Napigsa ti pammati ni Nephi iti balikas ti Dios (1 Ne. 3:7) ket nagbalin a naindaklan a propeta, agsursurat, ken pangulo dagiti taona.

Managtungpal ken nagkararag a sipapammati, 1 Ne. 2:16.
Nagsubli iti Jerusalem tapno alaenna dagiti pinanid a gambang, 1 Ne. 3–4.
Nagsubli idiay Jerusalem tapno ipanna ti kaamaan ni Ismael iti langalang, 1 Ne. 7.
Immawat iti parmata a kas iti inawat ni Lehi, 1 Ne. 10:17–22; 11.
Nakitana iti parmata ti masakbayan dagiti taona ken ti pannakaisubli ti ebanghelio, 1 Ne. 12–13.
Inyulogna ti parmata iti kayo ti biag, 1 Ne. 15:21–36.
Natukkolna ti baina ngem babaen ti pammatina nakasapul iti taraon, 1 Ne. 16:18–32.
Nangbangon iti bapor ket nagdaliasat a napan iti naikari a daga, 1 Ne. 17–18.
Nagsisina dagiti Nephite ken Lamanite, 2 Ne. 5.
Nangted iti maudi a pammaneknek, 2 Ne. 33.

Ti libro ti 1 Nephi

Dandani maipanggep iti propeta a ni Lehi ken ti kaamaanna a pimmanaw iti Jerusalem ti laonen dagiti kapitulo 1–18:8. Nagdaliasatda iti nalawa a disierto agingga a nakadanonda iti baybay. Ibaga ti 1 Ne. 18:9–23 ti panagdaliasatda a mapan iti naikari a daga, kas inturong ti Apo, iti laksid ti isusuppiat da Laman ken Lemuel. Ibaga dagiti kapitulo 19–22 ti panggep ni Nephi iti panangidulinna kadagiti sinurat (1 Ne. 6:1–6; 19:18)—tapno magutugot ti amin a manglagip iti Apo a Mannubbotda. Inadawna ti Isaias (1 Ne. 20–21) ket inyulogna ti mensahe ni Isaias, a mangnamnama nga awaten ti amin ni Jesucristo a kas Mangisalakan ken Mannubbotda (1 Ne. 22:12).

Ti libro ti 2 Nephi

Laonen dagiti kapitulo 1–4 ti sumagmamano kadagiti maudi a pannursuro ken padto ni Lehi sakbay a pimmusay, a pakairamanan dagiti bendisionna kadagiti annak ken an-annabona. Ilawlawag ti kapitulo 5 no apay a simmina dagiti Nephite kadagiti Lamanite. Nangbangon dagiti Nephite iti templo, insuroda ti paglintegan ni Moises, ken nagsuratda. Laonen dagiti kapitulo 6–10 dagiti balikas ni Jacob, ti ub-ubing a kabsat ni Nephi. Inasaas ni Jacob ti pakasaritaan ti Juda ken impadtona ti Mesias, a sumagmamano kadagitoy ti naggapu kadagiti sinurat ni propeta Isaias. Kadagiti kapitulo 11–33 insurat ni Nephi ti pammaneknekna ken ni Cristo, ti pammaneknek ni Jacob, dagiti padto kadagiti maudi nga aldaw, ken sumagmamano a kapitulo iti Daan a Tulag a libro ni Isaias.