Pannakailansa iti Krus

Panangpapatay a wagas ti Romano, a gagangay idi panawen ti Baro a Tulag, a pakapapatayan ti tao babaen ti pannakairaked wenno pannakailansa dagiti ima ken sakana iti krus. Gagangay a maaramid laeng kadagiti adipen ken dagiti kababaan a kriminal. Masansan a maaramid ti pannakailansa kalpasan ti pannakaparparigat ken pannakasaplit (Mar. 15:15). Gagangay a baklayen ti tao a mailansa ti krusna agingga iti lugar a pakapapatayanna (Jn. 19:16–17). Gagangay nga alaen dagiti soldado a mangipatungpal iti sentensiana dagiti lupotna (Mat. 27:35). Maipalok ti krus iti daga nga agarup maysa wenno dua a kadapan ti kangato dagiti sakana iti daga. Bantayan dagiti soldado ti krus agingga a matay ti tao a nailansa, nga umabot no dadduma iti tallo nga aldaw (Jn. 19:31–37).

Nailansa ni Jesucristo gapu ta pinabasol dagiti saan a mamati iti isusuppiat iti linteg ni Cesar ken panagtabbaaw gapu ta kinunana nga isu ti Anak ti Dios. Naited ken ni Jesus ti ube a kagay (Jn. 19:2), ti korona a siitan, ken adu pay a panangin-insulto (Mat. 26:67; Mar. 14:65).