Libro ni Mormon

Maysa kadagiti uppat a libro ti nasantuan a kasuratan a bigbigen ti Ti Simbaan ni Jesucristo Dagiti Santo iti Ud-udina nga Aldaw. Daytoy ti nangyababaan ti nagkauna a propeta a managan Mormon iti sinurat dagiti nagkauna nga agindeg iti America. Naisurat a pammaneknek a Cristo ni Jesus. Maipanggep iti daytoy a kasuratan, kinuna ni Propeta Joseph Smith, a nangipatarus iti daytoy babaen ti sagut ken bileg ti Dios: “Imbagak kadagiti kakabsat a ti Libro ni Mormon ti kapudnuan iti ania man a libro iti daga, ken panuli ti relihiontayo, ken umas-asideg ti tao iti Dios babaen ti panangsurotna iti alagaden daytoy, ngem iti ania man a sabali a libro” (Kitaen ti pakauna iti umuna a panid ti Libro ni Mormon).

Ti Libro ni Mormon ti naespirituan a sinurat dagiti tallo a grupo ti tao a nagdappat iti kontinente ti America manipud iti Daan a Lubong. Impanguluan dagiti propeta dagitoy a grupo a nangisurat kadagiti relihioso ken nailubongan a banag ti pakasaritaan kadagiti pinanid a metal. Naisurat iti Libro ni Mormon ti isasarungkar ni Jesucristo kadagiti tao iti America kalpasan ti panagungarna. Simmaruno iti isasarungkar ni Cristo ti dua-gasut a tawen a panagturay.

Inserra ni Moroni, ti kaudian kadagiti Nephite a propeta-historiador, dagiti nayababa a sinurat dagitoy a tao ket inlemmengna idi agarup nga K.P. 421. Idi 1823, sinarungkaran ni nagungar a Moroni ni Joseph Smith ket intedna kenkuana idi agangay dagitoy nagkauna ken sagrado a sinurat tapno maipatarus ken maiwaras iti lubong a kas sabali pay a tulag ni Jesucristo.