David

Ti ari ti nagkauna nga Israel iti Daan a Tulag.

Ni David ti lalaki nga anak ni Jesse iti tribu ti Juda. Napinget nga agtutubo a nangpapatay iti leon, uso, ken ni Goliat a higante a Filisteo (1 Sam. 17). Napili ni David ken naikkan-pateg nga ari ti Israel. Kas ken ni Saulo, adu ti nadagsen a nagbasolanna bayat ti kinaagtutubona, ngem, maigidiat ken ni Saulo, nabaelanna ti nagbabawi a sipupudno. Napakawan ngarud, malaksid iti pammapatay ken ni Uria (DkK 132:39). Uppat ti pakabingbingayan ti biagna: (1) iti Betlehem, a nagbalinanna nga agpaspastor (1 Sam. 16–17); (2) iti korte ni Ari Saulo (1 Sam. 18–19:18); (3) kas naglibas (1 Sam. 19:18–31:13; 2 Sam. 1:27); (4) kas ari iti Juda iti Hebron (2 Sam. 2–4), sa kas ari iti intero nga Israel idi agangay (2 Sam. 5–24;1 Ari 1:1–2:11).

Simmaruno iti basol ni David a pannakiabig ken ni Batseba ti nagsasaruno a malas a nangdadael iti naudi a duapulo a tawen ti biagna. Nasaliwanwan ti sangabukel a pagilian bayat ti panagturayna, ngem inkaro ni David ti supapak dagiti basolna. Masansan nga adda riri iti kaamaanna, nga, iti kaso da Absalom ken Adoniha, nagbanag iti yaalsa. Dagitoy a pasamak ti bunga dagiti imbaga ni Natan a propeta ken ni David gapu iti basolna (2 Sam. 12:7–13).

Iti laksid dagitoy a didigra, ti panagturay ni David ti karimatan iti pakasaritaan ti Israel, ta (1) pinagkaykaysana dagiti tribu a kas pagilian, (2) pinatalgedanna ti di marubsi a panagtagikua iti pagilian, (3) immuntarna ti gobierno iti pudno a relihion tapno ti pagayatan ti Dios ti paglintegan ti Israel. Gapu kadagitoy a rason, naibilang idi agangay a ti panagturay ni David ti nabalitokan a panawen ken ti kita ti nangayngayed a panawen iti idadateng ti Mesias (Isa. 16:5; Jer. 23:5; Eze. 37:24–28).

Iladawan ti biag ni David a kasapulan ti tunggal tao ti agitured a nalinteg agingga iti panungpalan. Kas agtutubo, masasao nga isu ti tao a nagtaud iti “bukod a puso” ti Apo (1 Sam. 13:14); kas tao, nakisao iti Espiritu ket adu ti paltiingna. Ngem nagbayad iti nangina iti kinasubegna kadagiti bilin ti Dios (DkK 132:39).