Paltiing ni Juan

Ti maudi a libro iti Baro a Tulag, a naglaon iti paltiing a naited ken ni Apostol Juan. Napalubosan a mangkita iti pakasaritaan ti lubong, a nangnangruna dagiti maudi nga aldaw (Apoc. 1:1–2; 1 Ne. 14:18–27; DkK 77). Am-ammo pay ti Paltiing ni Juan a kas Paltiing.

Inawat ni Juan daytoy a paltiing iti aldaw ti Apo iti puro ti Patmos (Apoc. 1:9–10), iti ballasiw ti Asia, nga asideg ti Efeso. Saan nga ammo ti husto a petsa ti paltiing.

Nairaman dagiti pangiwanwan iti panangawat iti libro iti 1 Nephi 14:18–27 ken iti DkK 77 (Ether 4:15–16).

Pakauna dagiti kapitulo 1–3 ti libro ken surat kadagiti pito a simbaan iti Asia. Insurat ni Juan ti surat a pangtulong kadagiti Santo a mangrisut kadagiti parikut. Naisurat kadagiti kapitulo 4–5 dagiti parmata nga inawat ni Juan a mangipakita iti kinadayag ken nalinteg a bileg ti Dios ken ni Cristo. Insurat ni Juan kadagiti kapitulo 6–9, 11, ti pannakakitana iti libro a natimbrean iti pito, a tunggal timbre ibagianna ti sangaribu a tawen ti daga iti nailubongan a pakasaritaanna. Ad-adda nga inagapad dagitoy a kapitulo dagiti pasamak a linaon ti maikapito a timbre (kitaen Apoc. 8-9, 11:1–15). Iladawan ti kapitulo 10 ti libro a kinnan ni Juan. Ibagian ti libro ti masanguanan a misionna. Naisurat iti kapitulo 12 ti parmata ti dakes a nangrugi iti langit idi immalsa ni Satanas ket napapanaw. Nagtultuloy iti daga ti gubat a narugian idiay. Kadagiti kapitulo 13, 17–19, inladawan ni Juan dagiti nadangkes a naindagaan a pagarian nga iggem ni Satanas ket naisurat ti gasatda, a pakairamanan ti naudi a panangdadael ti dakes. Iladawan dagiti kapitulo 14–16 ti kinalinteg dagiti Santo iti baet ti kinadakes sakbay ti maikadua a yaay ni Cristo. Iladawan dagiti kapitulo 20–22 ti Millennium, ti napintas a siudad ti Baro a Jerusalem, ken dagiti maudi a pasamak iti pakasaritaan ti daga.