Abraham
Anak ni Tera, naipasngay iti Ur dagiti Caldeano (Gen. 11:26, 31; 17:5). Ti propeta ti Apo a nangtedan ti Apo iti agnanayon a katulagan, a nakabendisionan amin dagiti pagilian iti daga. Sigud a nanaganan ni Abraham iti Abram.
Ti libro ni Abraham
Nagkauna a sinurat nga insurat ni Abraham a nagun-od ti Simbaan idi 1835. Nasarakan dagiti sinurat ken sumagmamano a timmangken a bangkay kadagiti tanem dagiti Egipsio ni Antonio Lebolo, a nangted kadakuada ken ni Michael Chandler. Impabuya ida ni Chandler iti Estados Unidos idi 1835. Sumagmamano a gayyem ni Joseph Smith ti nanggatang kadakuada ken ni Chandler ket intedda iti Propeta, a nangipatarus kadakuada. Sumagmamano kadagitoy a sinurat ti masarakan ita iti Perlas a Kapatgan.
Ipakita ti Kapitulo 1 dagiti padas ni Abraham iti Ur ti Caldeano, a nangpanggepan dagiti nadangkes a saserdote a mangisakripisio kenkuana. Ibaga ti Kapitulo 2 ti panagdaliasatna iti Canaan. Nagpakita kenkuana ti Apo ket nakitulag kenkuana. Ipakita ti Kapitulo 3 a nakita ni Abraham ti sangalubongan ket naimatanganna ti panagkakanaig dagiti nailangitan a bagi. Sabali a pakaammuan ti Pannakaparsua dagiti kapitulo 4–5.
Ti Bukel ni Abraham
Dagiti tao nga, babaen ti panagtungpal kadagiti paglintegan ken ordinansa ti ebanghelio ni Jesucristo, umawat iti karkari ken katulagan nga inaramid ti Dios ken ni Abraham. Umawat dagiti lallaki ken babbai no talaga a nagtaudda ken ni Abraham wenno natarakenda iti kaamaanna babaen ti panangawatda iti ebanghelio ken nabuniaganda (Gal. 3:26–29; 4:1–7; DkK 84:33–34; 103:17; 132:30–32; Abr. 2:9–11). Mabalin a mapukaw dagiti nagtaud ken ni Abraham dagiti bendisionda babaen ti di panagtungpal (Rom. 4:13; 9:6–8).