1 Ket ita napasamak nga idi naibaga ni Nephi dagitoy a balikas, kitaen, adda dagiti lallaki nga ukom, a kameng met ti nalimed nga armado a grupo ni Gadianton, ket nakapungtotda, ken nangpadakes kenkuana, a kunkunada kadagiti tattao: Apay a saanyo a tiliwen daytoy a lalaki ket idatagyo, tapno makondenar sigun iti krimen nga inaramidna?

2 Apay a buybuyaenyo daytoy a lalaki, ken dengdenggenyo a lalaisenna dagitoy a tattao ken mangkontra iti lintegtayo?

3 Agsipud ta kitaen, nagsao ni Nephi kadakuada maipanggep iti kinakorap ti lintegda; wen, adu a bambanag ti insao ni Nephi a saan a maisurat; ket awan ti insaona a maikontra kadagiti bilin ti Dios.

4 Ket nakapungtot dagidi ukom kenkuana gapu ta sipaparangka a panagsaona kadakuada maipanggep kadagiti nalimed nga aramidda iti kinasipnget; nupay kasta, saanda a naitured a mangsagid kenkuana, gapu ta nagbutengda kadagiti tattao ta amangan a kondinarenda ida.

5 Ngarud nagsoda a sipipigsa kadagiti tattao, a kunada: Apay a palubosanyo daytoy a lalaki insultuennatayo? Agsipud ta kondenarenna amin dagitoy a tattao, uray pay iti pannakadadael; wen, ken kasta met a maala kadatayo dagitoy a naindaklan a siudadtayo, nga awanto ti lugartayo kadagitoy.

6 Ket ita ammotayo nga imposible daytoy, ta kitaen, nabilegtayo, ken naindaklan dagiti siudadtayo, gapuna awan ti bileg dagiti kabusortayo kadatayo.

7 Ket napasamak a kastoy ti panangsugsogda kadagiti tattao nga agpungtot kontra ken Nephi, ken nangpataudda iti panagsususik kadakuada; gapu ta adda sumagmamano ti talaga a nagpukkaw: Bay-am daytoy a lalaki, ta isu ket naimbag a tao, ket dagidiay bambanag nga ibagbagana ket sigurado a mapasamakto malaksid no agbabawitayo;

8 Wen, kitaen, umayto kadatayo amin dagiti panangukom a pinaneknekanna kadatayo; gapu ta ammotayo a siuumiso a pinaneknekanna kadatayo maipanggep kadagiti kinadangkestayo. Ket kitaen aduda, ket ammona met amin a bambanag a mapasamak kadatayo a kas iti pannakaammona kadagiti kinadangkestayo;

9 Wen, ket kitaen, no saan a propeta isuna saanna koma a maipaneknek ti maipanggep kadagidiay a bambanag.

10 Ket napasamak a napilit dagidi tattao a nagikagumaan a mangpapatay ken ni Nephi gapu iti butengda, isu a saanda nasagid isuna; ngarud rinugianna manen nga agsao kadakuada, ta nabigbigna a nagun-odna iti pabor ti sumagmamano, iti kasta nagbuteng dagiti nabati kadakuada.

11 Ngarud napilitan isuna nga agsao iti ad-adu pay kadakuada a kunana: Kitaen, kakabsatko, saanyo kadi a nabasa a nangited ti Dios iti bileg iti maysa a tao, nga isu ni Moises, a saplitan dagiti danum ti Nalabaga a Baybay, ket nagsisinada iti agsumbangir, isu a limmabas dagiti Israelita, a kapuonantayo, iti namaga a daga, ket nagrikep dagiti danum kadagiti Egipsio ket inalun-onna ida?

12 Ket ita kitaen, no inted ti Dios iti daytoy a tao ti kasta a bileg, apay ngarud nga agsisinupiatkayo, ket kunaenyo nga awan ti intedna kaniak a bileg tapno maammuak ti maipanggep kadagiti panangukom a dumtengto kadakayo malaksid no agbabawikayo?

13 Ngem, kitaen, saanyo laeng nga ilibak dagiti balikasko, ngem ilibakyo pay amin dagiti balikas a naisao dagiti kapuonantayo, ken kasta met dagiti balikas nga insao daytoy a tao, a ni Moises, nga addaan iti kasta a naindaklan a bileg a naited kenkuana, wen, dagiti balikas nga insaona maipanggep iti yaay ti Mesias.

14 Wen, saan kadi a nangipaneknek nga umayto ti Anak ti Dios? Ket kas intag-ayna ti gambang nga uleg iti let-ang, kasta met a maitag-ayto ti siasinoman nga umay.

15 Ket kas iti kaadu a mangkita iti dayta nga uleg ti agbiagto, kasta met ti kaadu a mangkita iti Anak ti Dios nga addaan iti pammati, nga addaan iti sibabawi nga espiritu, ti mabalin nga agbiag, uray pay iti dayta a biag nga agnanayon.

16 Ket ita kitaen, saan laeng a pinaneknekan ni Moises dagitoy a bambanag, ngem amin met kadagiti nasantuan a propeta, manipud iti panagbiagna agingga iti panagbiag ni Abraham.

17 Wen, ket kitaen, nakita ni Abraham ti yaayna, ket napno iti ragsak ket nagrag-o.

18 Wen, ket kitaen kunak kadakayo, a saan laeng nga ammo ni Abraham dagitoy a bambanag, ngem adu idi sakbay iti panagbiag ni Abraham a naawagan babaen ti orden ti Dios; wen, uray pay iti orden ti Anakna; ket kastoy daytoy ta masapul a maipakita kadagiti tattao, iti nakad-adu a ribu a tawen sakbay ti yaayna, ta uray ti pannakasubbot masapul a dumtengto kadakuada.

19 Ket ita kayatko koma a maammuanyo, nga uray pay manipud iti panagbiag ni Abraham adu dagiti propeta a nangpaneknek kadagitoy a bambanag; wen, kitaen, a ti propeta a ni Zenos ti talaga a situtured a nangpaneknek; ta gapu iti dayta napapatay isuna.

20 Ket kitaen, kasta met ni Zenock, ken ni Ezias pay, ken kasta met ni Isaias, ken Jeremias, (ni Jeremias isu met laeng a propeta a nangpaneknek iti pannakadadael ti Jerusalem) ket ita ammotayo a nadadael ti Jerusalem sigun kadagiti balikas ni Jeremias.O ngarud apay a saan nga umay ti Anak ti Dios, sigun iti padtona?

21 Ket ita, supiatenyo kadi a ti Jerusalem ket madadael? Kunaenyo kadi a saan a napapatay dagiti lallaki nga annak ni Sedekias, amin malaksid ni Mulek? Wen, ket saanyo kadi a makita a kaduatayo dagiti kaputotan ni Zedekias, ket napapanawda iti daga ti Jerusalem? Ngem kitaen, saan laeng a dagitoy—

22 Napapanaw ni amami a Lehi iti Jerusalem gapu ta pinaneknekanna dagitoy a bambanag. Pinaneknekan met ni Nephi dagitoy a bambanag, ken kasta met ti dandani amin a kapuonontayo, uray agingga iti daytoy a panawen; wen, pinaneknekanda ti yaay ni Cristo, ket napakpakadaandan, ken nagragsakda iti aldawna nga umayto.

23 Ket kitaen, isu ti Dios, ket isu ti mangay-aywan kadakuada, ket imparangarangna ti bagina kadakuada, a sinubbotna ida; ket indaydayawda isuna, gapu iti dayta nga umayto.

24 Ket ita, gapu ta ammoyo dagitoy a bambanag ket saanyo a mailibak ida malaksid no agulbodkayo, ngarud nagbasolkayo gapu iti daytoy, gapu ta inlaksidyo amin dagitoy a bambanag, nupay kasta ti kaadu dagiti pammaneknek nga inawatyo; wen, uray a naawatyo amin a bambanag, agpadpada dagiti bambanag iti langit, ken amin a bambanag nga adda iti daga, kas pammaneknek a pudnoda.

25 Ngem kitaen, inlaksidyo ti kinapudno, ket nagrebeldekayo iti nasantoan a Diosyo; ket uray iti daytoy a panawen, imbes nga agurnongkayo kadagiti gameng para iti bagbagiyo idiay langit, nga awan ti aniaman a mangdadael, ken awan ti mabalin nga umay a narugit, agbuntonkayo ​​iti pungtot para iti bagbagiyo a kontra iti aldaw ti panangukom.

26 Wen, agluomkayo para iti agnanayon a pannakadadael uray iti daytoy a panawen, gapu kadagiti pammapatayyo ken ti maikontra iti linteg a seksual a pannakidennayo ken kinadakesyo; wen, ket malaksid no agbabawikayo umayto kadakayo iti mabiit.

27 Wen, kitaen adda itan uray kadagiti ruanganyo; wen, sumrekkayo iti tugaw-pagukoman, ket sukimatenyo; ket kitaen, napapatay ti ukomyo, ket nakaidda iti darana; ket pinapatay babaen iti lalaki a kabsatna, a nagkalikagum nga agtugaw iti tugaw-pagukoman.

28 Ket kitaen, agpadada a kameng ti nalimed nga armado a grupo, a ni Gadianton ti nagtaudanna ken maysa a dakes nga agkalikagum a mangdadael kadagiti kararua dagiti tattao.