Kinasaserdote a Melchizedek

Ti Kinasaserdote a Melchizedek ti nangatngato wenno nabilbileg a kinasaserdote; nababbaba a kinasaserdote ti Kinasaserdote nga Aaron. Iraman ti Kinasaserdote a Melchizedek dagiti tulbek ti naespirituan a bendision ti Simbaan. Babaen ti ordinansa ti nangatngato a kinasaserdote, maipakita kadagiti tao ti bileg ti kinadios (DkK 84:18–25; 107:18–21).

Immuna nga impakita ti Dios daytoy a nangatngato a kinasaserdote ken ni Adan. Adda daytoy a turay kadagiti patriarka ken propeta iti tunggal dispensasion (DkK 84:6-17). Immuna a naawagan iti Nasantuan a Kinasaserdote, a mainugot iti Urnos ti Anak ti Dios. Naawagan idi agangay a Kinasaserdote a Melchizedek (DkK 107:2–4).

Idi saan a natungpal dagiti annak ti Israel dagiti gundaway ken katulagan ti Kinasaserdote a Melchizedek, imbabawi ti Apo ti nangatngato a paglintegan ket intedna kadakuada ti nababbaba a kinasaserdote ken nababbaba a paglintegan (DkK 84:23–26). Naawagan dagitoy iti Kinasaserdote nga Aaron ken ti paglintegan ni Moises. Idi immay ni Jesus iti daga, insublina ti Kinasaserdote a Melchizedek kadagiti Hudio ket rinugianna a binangon ti Simbaan kadakuada. Nupay kasta, napukaw manen ti kinasaserdote ken ti Simbaan babaen ti ikakalilis. Naisublida idi agangay babaen ni Joseph Smith, Jr. (DkK 27:12–13; 128:20; JS—P 1:73).

Sakup ti Kinasaserdote a Melchizedek dagiti saad ti elder, nangato a saserdote, patriarka, pitopulo, ken Apostol (DkK 107). Kanayon a paset ti pagarian ti Dios iti daga ti Kinasaserdote a Melchizedek.

Ti Presidente ti Ti Simbaan ni Jesucristo Dagiti Santo iti Ud-udina nga Aldaw ti presidente ti nangato wenno Kinasaserdote a Melchizedek, ket iggemna dagiti tulbek a mainaig iti pagarian ti Dios iti daga. Maysa a tao laeng iti maysa a panawen ti agtakem a Presidente, ket isu laeng ti tao iti daga nga addaan iti bileg a mangaramat iti amin a tulbek ti kinasaserdote (DkK 107:64–67; DkK 132:7).