Smith, Joseph, Jr.

Napili ti propeta a mangisubli iti pudno a Simbaan ni Jesucristo iti daga. Nayanak ni Joseph Smith iti estado ti Vermont iti Estados Unidos ti America ket nagbiag manipud 1805 agingga iti 1844.

Idi 1820, nagparang da Dios Ama ken Jesucristo ken ni Joseph, ket naammuanna nga awan kadagiti simbaan iti daga ti pudno (JS—P 1:1–20). Sinarungkaran idi agangay ni anghel Moroni, a nangipalgak iti nakaidulinan dagiti balitok a pinanid a naglaon kadagiti sinurat maipanggep kadagiti nagkauna a tao iti kontinente ti America (JS—P 1:29–54).

Impatarus ni Joseph dagiti balitok a pinanid ket impablaakna idi 1830 kas Libro ni Mormon (JS—P 1:66–67, 75). Idi 1829, inawatna ti rebbengen ti kinasaserdote ken ni Juan a Mammuniag ken kada Pedro, Santiago, ken Juan (DkK 13; 27:12; 128:20; JS—P 1:68–70).

Babaen ti panangiturong ti Dios, idi 6 ti Abril 1830, binangon da Joseph ken dadduma pay ti naisubli a Simbaan ni Jesucristo (DkK 20:1–4). Babaen ti panangidaulo ni Joseph, nagsantak ti Simbaan iti Canada, Inglatera, ken iti dumaya a paset ti Estados Unidos, kangrunaanna iti Ohio, Missouri, ken Illinois. Simmaruno ti nakaro a pannakaidadanes da Joseph ken dagiti Santo iti sadino man a papananda. Idi 27 ti Hunio 1844, napapatay a kas martir da Joseph ken ni Hyrum a kabsatna iti Carthage, Illinois, iti Estados Unidos ti America.

Gapu iti pannakaammona iti yaay ti didigra, inawagan ti Apo ti katulonganna a ni Joseph Smith, DkK 1:17 (DkK 19:13).
Naordenan ni Joseph Smith nga Apostol ni Jesucristo ken umuna nga elder daytoy a Simbaan, DkK 20:2.
Inordenan da Pedro, Santiago, ken Juan ni Joseph nga apostol, DkK 27:12.
Pinaneknekan da Joseph ken Sidney Rigdon a nakitada ti Bugbugtong ti Ama, DkK 76:23.
Kadua ni Joseph Smith ni Oliver Cowdery a nakakita iti Apo iti parmata, DkK 110:1–4.
Tinudingan ti Apo ni Joseph a mangiturong nga elder, agipatpatarus, mamaltiing, mammadto, ken propeta, DkK 124:125.
Ad-adu ti naaramid ni Joseph Smith para iti pannakaisalakan dagiti tao ngem iti asino man, malaksid laeng ni Jesus, DkK 135:3.

Ti nasantuan a kasuratan nga inyeg ni Propeta Joseph Smith

Impatarus ni Joseph ti paset dagiti balitok a pinanid nga inted kenkuana ni anghel Moroni, patarus a naipablaak idi 1830 a kas Libro ni Mormon. Immawat pay iti adu a paltiing manipud iti Apo a nangbinsabinsa iti pangrugian a doktrina ken organisasion ti Simbaan. Adu kadagitoy a paltiing ti naurnong iti ammo itan a kas Doktrina ken Katulagan. Isu pay ti nakairuar iti Perlas a Kapatgan, a naglaon kadagiti pammaregta a patarus ti sumagmamano a sinurat da Moises, Abraham, ken Mateo, dagiti naadaw kadagiti pakasaritaan a bukbukod ken pammaneknek, ken sangapulo-ket-tallo a palawag iti doktrina ken pammati a pagbatayan ti Simbaan.