Ukom, Libro Dagiti

Ti libro iti Daan a Tulag. Ti libro dagiti Ukom a maipanggep kadagiti Israelita manipud iti ipapatay ni Josue agingga iti pannakaipasngay ni Samuel.

Pakauna ti sibubukel a libro dagiti Ukom dagiti kapitulo 1–3. Ilawlawagda a gapu ta dida pinapanaw dagiti kabusorda (Uk. 1:16–35), nasken a lak-amen dagiti Israelita ti dusada: pannakapukaw ti pammati, pannakiasawa kadagiti awanan pammati, ken panagrukbab kadagiti didiosen. Masarita kadagiti kapitulo 3–5 dagiti padas da Debora ken Barak, a nangisalakan iti Israel kadagiti taga-Canaan. Kadagiti kapitulo 6–8 makaparegta iti pammati dagiti padas ni Gideon, a binendisionan ti Apo a mangisalakan iti Israel kadagiti Midianito. Kadagiti kapitulo 9–12, agduduma a tao ti nagbalin nga ukom ti Israel, kaaduanna a kimmalilis ken manangirarem. Ibaga dagiti kapitulo 13–16 ti panagparang ken pannakaabak ti naudi nga ukom, ni Samson. Dagiti maudi a kapitulo, 17–21, mailadawanda a kas apendiks a mangibutaktak iti kadagsen dagiti basol ti Israel.