Patarus ni Joseph Smith (PJS)

Ti nabalbaliwan wenno patarus iti Patarus ni Ari Santiago iti Biblia iti Ingles, a rinugian ni Propeta Joseph Smith idi Hunio 1830. Binilin ti Dios a mangipatarus ken naibilang a paset ti aramidna a kas propeta.

Nupay nalpas ni Joseph ti dandani amin a patarus idi Hulio 1833, intultuloyna agingga iti ipapatayna idi 1844 a nangpasayaat bayat ti panangisaganana iti manuskrito a maipablaak. Nupay naipablaakna ti sumagmamano a paset ti patarus idi sibibiag, posible nga adda koma nabaliwanna no nagbiag agingga a naipablaakna ti sibubukel nga aramid. Impablaak ti Nabalbaliwan a Simbaan ni Jesucristo Dagiti Santo iti Ud-udina nga Aldaw ti umuna nga edision ti naparegtaan a patarus ni Joseph Smith idi 1867. Nagipablaakda iti sumagmamano nga edision manipud iti dayta a panawen.

Adu a banag ti naadal ti Propeta bayat ti panagipatarusna. Adda dagiti benneg ti Doktrina ken Katulagan ti naawat gapu iti patarusna (kas iti DkK 76, 77, 91, ken 132). Kasta met, inikkan ti Apo ni Joseph iti naidumduma a panangiwardas para iti patarus, a naisurat iti Doktrina ken Katulagan (DkK 37:1; 45:60–61; 76:15–18; 90:13; 91; 94:10; 104:58; 124:89). Naggapu a mismo iti Patarus ni Joseph Smith ti libro ni Moises ken Joseph Smith—Mateo, a mairaman itan iti Perlas a Kapatgan.

Naisubli ti Patarus ni Joseph Smith ti sumagmamano a nalawag ken napateg a bambanag a mabalin a napukaw iti Biblia (1 Ne. 13). Nupay saan nga opisial a biblia ti Simbaan, adu ti makaawis iti sirmata nga itden daytoy a patarus ket napategda iti panangawat iti Biblia. Saksi pay iti nailangitan a pagrebbengan ken panangisuro ni Propeta Joseph Smith.