Alma, Lalaki nga Anak ni Alma
Iti Libro ni Mormon, ti immuna a pangulo ti ukom ken propeta iti pagilian dagiti Nephite. Kadagiti immuna a tawen ti panagturayna kayatna a dadaelen ti simbaan (Mosiah 27:8–10). Nupay kasta, nagpakita ti maysa nga anghel kenkuana ket napasurot iti ebanghelio (Mosiah 27:8–24; Alma 36:6–27). Iti saan a nabayag inibbatanna ti saadna a kas pangulo iti ukom tapno makaisuro kadagiti tao (Alma 4:11-20).
Ti libro ni Alma
Nailasin a libro iti Libro ni Mormon, naglaon iti pakayababaan kadagiti sinurat ni Propeta Alma, ti anak a lalaki ni Alma, ken ti anakna a lalaki a ni Helaman. Dagiti pasamak a linaon ti libro ket maipapan iti agarup wenno kumurang a 91 agingga iti 52 sakbay a mayanak ni Cristo. Aglaon ti libro iti 63 a kapitulo. Iladawan dagiti Kapitulo 1–4 ti yaalsa dagiti pasurot ni Nehor ken Amlici a maibusor kadagiti Nephite. Dagitoy a gubat ti kaamesan iti pakasaritaan ti Nephite. Aglaon dagiti Kapitulo 5–16 ti pannakailawlawag ti nasapa a panagdaliasat ni Alma a kas misionario, agraman iti sermonna maipapan iti Nasayaat a Pastor (Alma 5) ken ti panangaskasabada ken ni Amulek iti siudad ti Ammonihah. Aglaon dagiti kapitulo 17–27 kadagiti sinurat maipapan kadagiti annak a lallaki ni Mosiah ken kadagiti panagserbida kadagiti Lamanite. Aglaon dagiti kapitulo 28–44 kadagiti sumagmamano a kapatgan a sermon ni Alma. Iti kapitulo 32 inyarig ni Alma ti balikas iti bukel; iti kapitulo 36 linagipna ti estoria ti pannakapasurotna ken ni anakna a Helaman. Kadagiti kapitulo 39–42 insurat ni Alma dagiti pammalakadna iti anakna a ni Corianton, a nairamraman iti panagbasol; inlawlawag daytoy napateg a sermon maipapan iti linteg, kaasi, panagungar, ken ti Pannakasubbot. Iladawan dagiti kapitulo 45–63 dagiti gubat ti Nephite kadagidi a panawen ken yaakar iti babaen ni Hagoth. Dagiti naindaklan a pangulo a kas kada Kapitan Moroni, Tenacum, ken Lehi nakatulongda a nangtaginayon kadagiti Nephite babaen kadagiti kinaturedda ken naridam a panaggunayda.