Propeta Elias

Propeta iti Daan a Tulag a nagsubli iti ud-udina nga aldaw tapno yawatna dagiti tulbek ti bileg a mamaglantip kada Joseph Smith ken Oliver Cowdery. Iti aldawna, nangiwanwan ni Propeta Elias iti Akin-amianan a Pagarian ti Israel (1 Ari 17–22; 2 Ari 1–2). Nabileg ti pammatina iti Apo ket nalatak iti adu a milagrona. Dina pinagtudo iti uneg ti tallo-ket-gudua a tawen. Pinagungarna ti ubing a lalaki ken pinagtudona iti apuy (1 Ari 17–18). Ur-urayen pay laeng dagiti Hudio ti panagsubli ni Propeta Elias, kas impadto ni Malakias (Mal. 4:5). Kanayon a maawis ket adda latta agur-uray a ruangan ken tugaw para kenkuana tunggal agpiesta dagiti Hudio.

Kinuna ni Propeta Joseph Smith nga iggem ni Propeta Elias ti bileg a mamaglantip nga adda iti Kinasaserdote a Melchizedek ket isu ti kaudian a propeta a nangaramid iti dayta sakbay ni Jesucristo. Nagparang iti Bantay ti Panagbalbaliw a kaduana ni Moises a nangted kadagiti tulbek ti kinasaserdote kada Pedro, Santiago, ken Juan (Mat. 17:3). Nagparang manen, a kaduana ni Moises ken dadduma pay, idi Abril 3, 1836, idiay Kirtland Ohio Temple ket intedna ti isu met la a tulbek kada Joseph Smith ken Oliver Cowdery (DkK 110:13–16). Panangisagana amin dagitoy iti maikadua a yaay ti Apo, kas nasao iti Malakias 4:5–6.

Ti bileg ni Propeta Elias ti bileg a mamaglantip iti kinasaserdote a dagiti banag a mapagreppeng wenno mawarwar iti daga kasta met laeng iti langit (DkK 128:8–18). Kadagiti napili a katulongan ti Apo iti daga ita a panawen addaanda iti bileg a mamaglantip ket aramatenda dagiti ordinansa ti pannakaisalakan ti ebanghelio para kadagiti sibibiag ken natay (DkK 128:8).