Silaw, Silaw ni Cristo

Nailangitan a pigsa, bileg, wenno pangawis nga aggapu iti Dios babaen ni Cristo ken mangted biag ken silaw kadagiti amin a banag. Daytoy ti paglintegan a pakaiturayan amin a banag iti langit ken iti daga (DkK 88:6–13). Tulonganna pay dagiti tao a mangawat iti kinapudno ti ebanghelio ken tumulong a mangikabil kadakuada iti dana ti ebanghelio a mangiturong kadakuada iti pakaisalakanan (Jn. 3:19–21; Jn. 12:46; Alma 26:15; Alma 32:35; DkK 93:28–29, 31–32, 40, 42).

Saan koma a pakatikawan ti silaw ni Cristo iti Espiritu Santo. Saan a tao ti silaw ni Cristo. Daytoy ti pangawis nga aggapu iti Dios ken isaganana ti tao nga umawat iti Espiritu Santo. Daytoy ti pangawis iti nasayaat iti biag dagiti tao (Jn. 1:9; DkK 84:46–47).

Ti pakinakem ti maysa a mangipakita iti silaw ni Cristo; a mangtulong iti tao nga agpili iti nasayaat wenno dakes (Moro. 7:16). Bayat ti panangadal ti tao iti ebanghelio, ad-adda a sensitibo ti pakinakemda (Moro. 7:12–19). Maiturong dagiti tao a dumngeg iti silaw ni Cristo iti ebanghelio ni Jesucristo (DkK 84:46–48).