Exodo

Ti libro nga insurat ni Moises iti Daan a Tulag a mangiladawan iti ipapanaw dagiti Israelita iti Egipto. Mabalin a mabingay iti tallo a paset ti nagkauna a pakasaritaan ti Israel a naisurat iti Exodo: (1) ti pannakaadipen dagiti tao iti Egipto, (2) ti ipapanawda iti Egipto babaen ti panangidaulo ni Moises, ken (3) ti ganetgetda nga agserbi iti Dios iti napammatian a biag ken ti biagda iti politika.

Ilawlawag ti umuna a benneg, kapitulo 1–15, ti pannakailupitlupit ti Israel iti Egipto; ti nagkauna a pakasaritaan ken akem ni Moises; ti Ipapanaw ken ti pannakaaramid ti Piesta ti Paskua; ken ti panagturong iti Nalabaga a Baybay, ti pannakaparmek ti buyot ni Faraon, ken ti kanta ni Moises para iti balligi.

Ibaga ti maikadua a benneg, kapitulo 15–18, ti pannakasubbot ti Israel ken dagiti pasamak iti panagdaliasatda manipud iti Nalabaga a Baybay agingga iti Sinai; ti napait a danum ti Mara, ti pannangted iti pugo ken mana, ti panangngilin iti Aldaw a Panaginana, ti nakaskasdaaw a sagut ti danum iti Refidim, ken ti dangadang idiay kadagiti Amalekite; ti isasangpet ni Jetro iti kampo ken ti balakadna maipanggep iti gobierno sibil dagiti tao.

Agapaden ti maikatlo a benneg, kapitulo 19–40, ti pannakaited-pateg ti Israel iti serbisio ti Dios bayat dagiti nadaeg a pasamak iti Sinai. Tinudingan ti Apo dagiti tao a kas pagarian dagiti saserdote ken nasantuan a pagilian; intedna dagiti Sangapulo a Bilin; ken nangiwanwan maipanggep iti tabernakulo, dagiti ramitna, ken panagdaydayaw ditoy. Sa simmaruno ti pakaammo iti basol dagiti tao iti panagdaydayawda iti balitok a baka, sa kamaudiananna ti pakaammo iti pannakabangon ti tabernakulo ken ti masapsapul iti panagserbi ditoy.