Doktrina ken Katulagan

Ti nakaurnongan dagiti nailangitan a paltiing ken naparegta a palawag iti ud-udina nga aldaw. Inted ti Apo dagitoy ken ni Joseph Smith ken sumagmamano kadagiti simmaruno kenkuana para iti pannakabukel dagiti pagalagadan iti pagarian ti Dios iti daga kadagiti maudi nga aldaw. Maysa ti Doktrina ken Katulagan kadagiti naisangrat nga aramid ti nasantuan a kasuratan iti Ti Simbaan ni Jesucristo Dagiti Santo iti Ud-udina nga Aldaw, a pakaibilangan ti Biblia, ti Libro ni Mormon, ken ti Perlas a Kapatgan. Naisalsalumina ti Doktrina ken Katulagan, nupay kasta, ngamin saan a patarus dagiti nagkauna a dokumento; inted ti Apo dagitoy a paltiing kadagiti napili a propetana iti agdama a panawen tapno mapasubli ti pagarianna. Mangngeg kadagiti paltiing ti nalamuyot ngem napinget a timek ni Apo Jesucristo (DkK 18:35–36).

Kinuna ni Propeta Joseph Smith a ti Doktrina ken Katulagan ti pamuon ti Simbaan kadagiti maudi nga aldaw ken pakairanudan ti lubong (DkK 70:paulo). Irugi dagiti paltiing a linaonna ti panangisagana ti Apo ti dana iti maikadua a yaayna, kas panangtungpal kadagiti amin a nasao dagiti propeta manipud idi punganay ti lubong.