Isaias
Ti propeta iti Daan a Tulag a nagipadto iti nagbaetan ti 740–701 S.C. Kas pangulo a mamagbaga ni Ari Hezekias, napigsa ti pangawis ni Isaias iti relihion ken iti politika.
Ad-adu ti panangadaw ni Jesus iti balikas ni Isaias ngem iti asino man a propeta. Masansan met nga inadawan da Pedro, Juan ken Pablo iti Baro a Tulag. Linaon ti Libro ni Mormon ken ti Doktrina ken Katulagan ti ad-adu nga adaw manipud ken ni Isaias ngem kadagiti sabali a propeta ket dakdakkel ti tulong daytoy iti panangawat ken ni Isaias. Insuro ni Nephi dagiti taona babaen dagiti sinurat ni Isaias (2 Ne. 12–24; Isa. 2–14). Imbaga ti Apo kadagiti Nephite a “naindaklan dagiti balikas ni Isaias” ken matungpal amin nga impadto ni Isaias (3 Ne. 23:1–3).
Ti libro ni Isaias
Ti libro iti Daan a Tulag. Adu kadagiti padto ni Isaias ti maipanggep iti yaay ti Mannubbot, iti naindagaan a pagrebbenganna (Isa. 9:6) ken kas Naindaklan nga Ari iti maudi nga aldaw (Isa. 63). Impadtona pay ti maipanggep iti masakbayan ti Israel.
Prologo ti sibubukel a libro ti umuna a paset. Iparipirip ti Isaias 7:14; 9:6–7; 11:1–5; 53:1–12; ken 61:1–3 ti mision ti Mangisalakan. Maipanggep digiti kapitulo 2, 11, 12, ken 35 kadagiti pasamak iti ud-udina nga aldaw, iti pannakaisublinto ti ebanghelio, maummong ti Israel, ket agbukarto a kasla rosas ti mawaw a daga. Laonen ti kapitulo 29 ti padto iti yaay ti Libro ni Mormon (2 Ne. 27). Ipakdaar dagiti kapitulo 40–46 a nabilbileg ni Jehova a kas pudno a Dios ngem kadagiti didiosen dagiti mamatpati a pagano. Maipanggep dagiti nabati a kapitulo 47–66 kadagiti pasamak iti maudi a pannakaisubli ti Israel ken ti pannakabangon ti Zion, a pannakipagnaed ti Apo kadagiti taona.