Iti Griego, “naibaon” ti kayat a sawen ti Apostol. Daytoy ti awag nga inted ni Jesus kadagiti Sangapulo-ket-dua a pinili ken inordenanna a kadekketan a disipulo ken katulongan bayat ti naespirituan a panagserbina iti daga (Luc. 6:13; Jn. 15:16). Imbaonna ida a mangibagi kenkuana ken mangipatungpal kadagiti aramidna kalpasan ti yuulina iti langit. Idi man un-unana wenno iti Korum dagiti Sangapulo-ket-dua nga Apostol iti naisubli a Simbaan iti agdama, ti Apostol ti naisangsangayan a saksi ni Jesucristo iti sangalubongan a mangipaneknek iti kinadiosna ken ti panagungarna (Ara. 1:22; DkK 107:23).