Pakauna

Ilawlawag ti Pangiwanwan iti Nasantuan a Kasuratan dagiti napili a doktrina, pagbatayan, tao, ken lugar a makita iti Biblia, iti Libro ni Mormon, iti Doktrina ken Katulagan, ken iti Perlas a Kapatgan. Mangipaay pay iti napateg a reperensia iti nasantuan a kasuratan iti panangadalmo iti tunggal topiko. Makatulong kenka daytoy a Pangiwanwan iti bukodmo ken iti sangkaamaan a panangadal iti nasantuan a kasuratan. Matulongannaka a mangsungbat kadagiti saludsod maipapan iti ebanghelio, mangadal kadagiti topiko iti nasantuan a kasuratan, mangisagana kadagiti bitla ken leksion, ken mangpabaknang iti ammom ken pammaneknekmo iti ebanghelio.

Addaan iti uppat a benneg ti Pangiwanwan: (1) listaan dagiti napagsasaganad a topiko, (2) dagiti napili manipud iti Patarus ni Joseph Smith iti Biblia (PJS), (3) dagiti mapa ken pagsurotan ti lugar-nagnagan, ken (4) ladladawan dagiti nakapasamakan ti nasantuan a kasuratan.

1. Listaan dagiti napagsasaganad a topiko. Mangted daytoy iti ababa a pangilawlawag ti tunggal topiko ken mangipaay kadagiti kapatgan a reperensia iti nasantuan a kasuratan maipapan iti dayta a topiko. Sumaruno iti tunggal reperensia ti ababa nga adaw wenno nakayababaan ti nasantuan a kasuratan. Kastoy ti pannakaurnos dagiti reperensia iti nasantuan a kasuratan. Daan a Tulag, Baro a Tulag, Libro ni Mormon, Doktrina ken Katulagan, ken Perlas a Kapatgan.

2. Dagiti napili manipud iti Patarus ni Joseph Smith iti Biblia. Idi 1830, binilin ti Apo ni Propeta Joseph Smith a mangrugi nga agtrabaho maipapan iti pannakabalbaliw wenno pannakaipatarus ti Bersion ni Ari Santiago iti Biblia. Ti panggep ti Propeta isu ti pannakaisubli ti sumagmamano kadagiti nalawag ken napateg a kinapudno a napukaw manipud kadagiti orihinal a tekso ti Biblia. Inleppasna ti kaaduan ti trabaho idi 1833 ti Hulio. Nupay kasta, agingga iti ipapatayna idi 1844, intultuloyna ti nagaramid kadagiti panagbalbaliw bayat ti panangisaganana iti manuskrito para iti pannakaimaldit. Nupay saan pay a nalpas ti sibubukel a libro, wenno saan pay unay nga inawat ti Simbaan, naglaon ti Patarus ni Joseph Smith iti adu a pannakaawat kadagiti kaipapanan ti nasantuan a kasuratan ken maysa a napateg a pangtulong iti panagawat iti Biblia. Sumagmamano kadagiti napatpateg a pannakabalbaliw ti nairaman iti Pangiwanwan iti Nasantuan a Kasuratan. (Para iti ad-adu pay a pakaammo, kitaen ti topiko “Patarus ni Joseph Smith” iti napagsasaganad a listaan dagiti topiko.)

   Ar-aramaten ti Simbaan ni Jesucristo dagiti Santo iti Ud-udina nga Aldaw a kas opisial a patarus iti Ingles ti Bersion ni Ari Santiago iti Biblia. Napateg ti papel daytoy iti pannakaisubli ti ebanghelio ken agtultuloy a maaddaan iti napateg a pangaring iti amin a pagilian ken kadagiti kabagian, pagsasao, ken tattao.

3. Dagiti mapa ken pagsurotan ti lugar-nagnagan. Iraman laeng dagiti mapa dagiti napatpateg a disso iti geograpia a makita kadagiti nasantuan a kasuratan. Babaen ti panangammo iti geograpia dagiti daga a nailawlawag kadagiti nasantuan a kasuratan, ad-adda a maawatanyo dagiti pasamak iti nasantuan a kasuratan. Iraman ti Pangiwanwan dagiti walo a mapa ti dagdaga ken uppat a mapa dagiti lugar a napateg iti pakasaritaan ti Simbaan ni Jesucristo dagiti Santo iti Ud-udina nga Aldaw. Tapno masapulan ti maysa a disso, lukiben ti pagsurotan. Ti pagsurotan ti mangitudo kadakayo iti mayannatup a mapa ken dagiti panagtutunos dagiti disso iti dayta a mapa.

   4. Ladladawan dagiti nakapasamakan ti nasantuan a kasuratan. Mayam-ammonakayo dagitoy tallopulo-ket-dua a ladawan dagiti napateg a nakapasamakan ti nasantuan a kasuratan kadagiti daga a nagnaan ni Jesus, a nagnaedan ken nangisuruan dagiti propetana, ken nakaaramidan dagiti adu a pasamak iti nasantuan a kasuratan. Karagpin ti ababa a pangilawlawag dagiti ladawan mismo ken dagiti kapatgan a pasamak a naaramid iti dayta a lugar. Makatulong dagitoy kadakayo a mangtakuat iti nasinged a pannakainaig dagiti nasantuan a kasuratan ken dagdaga a nakaparsuaanda.

Tapno ad-adda a makatulong iti panangadal iti nasantuan a kasuratan, linaon ti Pangiwanwan dagiti dadduma pay a makatulong. Kas koma no kitaen ti “Jesucristo,” masarakam ti nalaka a maawatan a listaan ti tunggal topiko iti Pangiwanwan a mangted iti impormasion a mainugot a mismo iti naespirituan a panagserbi ti Mangisalakan. Daytoy laeng a topiko iti Pangiwanwan ti addaan iti adu a listaan, a mangigunamgunam iti kinapateg ni Cristo iti sangkataw-an. Mainayon pay, iti babaen ti topiko a “Panagsasaganad dagiti Pasamak,” nailista dagiti kapatgan a pasamak iti panawen ti biblia ken ti Libro ni Mormon, a kakuyog dagiti pattapatta a petsa. Mainayon iti topiko a “Ebanghelio, Dagiti” ti pannakiayon dagiti Ebanghelio. Idasig daytoy a pannakiayon ti pannursuro ti Mangisalakan kas masarakan iti Mateo, Marcos, Lucas, Juan, ken paltiing iti ud-udina nga aldaw.