Nauvoo, Illinois (EUA)

Ti siudad a binangon dagiti Santo iti Ud-udina nga Aldaw idi 1839 iti estado ti Illinois. Masarakan iti Karayan Mississippi, agarup 200 a milia manipud iti St. Louis.

Gapu iti pannakaidadanesda iti estado ti Missouri, nagpaamianan-a-daya dagiti Santo iti agarup 200 a milia, a bimmallasiw iti Karayan Mississippi, ken iti Illinois, a nakasarakanda iti nasaysayaat a kasasaad. Idi agangay, gimmatang dagiti Santo iti daga iti asideg ti di pay napalanas a siudad ti Commerce. Langalang a kadandanuman daytoy a daga a manmano ti adda a babassit a patakder. Kinarsan dagiti Santo ti daga sada nagbangon iti pagtaenganda. Inyakar ni Joseph Smith ti kaamaanna iti bassit a nagtarikayo a pagtaengan. Ti siudad a nanaganan iti Commerce nagbalin a Nauvoo, ti balikas a Hebreo a “napintas” ti kayuloganna.

Sumagmamano a benneg ti Doktrina ken Katulagan ti naisurat idiay Nauvoo (DkK 124–129, 132, 135). Naibaga kadagiti Santo a mangbangonda iti templo idiay Nauvoo (DkK 124:26–27). Binangonda ti templo ken nangbukelda kadagiti istaka ti Zion sakbay a napapanawda kadagiti pagtaenganda idi 1846. Kas bunga daytoy a pannakaidadanes, pinanawan dagiti Santo ti lugar ket nagdaliasatda iti laud.