Pagadalan dagiti Propeta

Iti Kirtland, Ohio (EUA), bayat ti panawen ti lam-ek ti 1832–1833, binilin ti Apo ni Joseph Smith a mangbangon iti pagadalan a pakasaranayan dagiti kakabsat a lallaki iti amin a banag maipanggep iti ebanghelio ken ti pagarian ti Dios. Nagtaud iti daytoy a pagadalan ti adu kadagiti immuna a dadaulo ti Simbaan. Sabali pay a pagadalan dagiti propeta ken elder ti iniggaman ni Parley P. Pratt idiay Jackson County, Missouri (DkK 97:1–6). Mayasping pay a pagadalan ti nabuangay iti saan a nabayag kalpasan ti panagdappat dagiti Santo iti Laud; nupay kasta, saan a nagbayag dagitoy. Maar-aramid ita ti pannakaisuro ti ebanghelio kadagiti pagtaengan, iti korum dagiti kinasaserdote, ken kadagiti dadduma pay a timpuyog, ken babaen ti pagadalan ti Simbaan ken klase iti seminario ken institiut.