Galilea
Iti nagkauna ken iti moderno a panawen, daytoy ti kaamiananen a distrito ti Israel a lauden ti Karayan Jordan ken ti Baybay ti Galilea. Agarup 60 milia (97 km) ti kaatiddog ket 30 milia (48 km) ti kaakaba ti Galilea. Idi un-unana, sakupna dagiti kasayaatan a daga ken dagiti kakumikoman nga ili iti Israel. Aglasat iti Galilea dagiti napateg a dadakkel a kalsada nga agturong iti Damasco, Egipto, ken akindaya a paset ti Israel. Makapatanur ti nasayaat a klima ken nataba a dagana iti adu a maapit nga olibo, trigo, sebada, ken ubas. Dakkel a tulong para iti komersio iti ruar ti pangikanan iti Baybay ti Galilea ta dakkel ti mapastrek. Binusbos ti Mannubbot ti dandani amin a panawenna iti Galilea.
Ti Baybay ti Galilea
Masarakan ti Baybay ti Galilea iti amianan nga Israel. Maaw-awagan met iti Baybay ti Cineret iti Daan a Tulag ken ti Dan-aw ti Genesaret wenno Tiberias iti Baro a Tulag. Nagsermon sadiay ni Jesus (Mat. 13:2). Nagsinan-peras ti baybay, 12.5 milia (20 km) ti kaatiddog ken 7.5 milia (12 km) ti kaakaba ti kaakabaan a pasetna. Nagunnat iti 680 kadapan (207 m) iti babaen ti patad ti baybay, a masansan a makaigapu iti kapudot ti napupok nga angin. Mangparnuay iti kellaat a bagyo ti agsabat nga agtapuak a nalamiis nga angin manipud kadagiti turod ken ti napudot nga angin iti ngatuen ti danum (Luc. 8:22–24).