Juda
Iti Daan a Tulag, ti maikapat nga anak a lalaki da Jacob ken Lea (Gen. 29:35; 37:26–27; 43:3, 8; 44:16; 49:8). Binendisionan ni Jacob ni Juda nga agbalin a gagangay a dadaulo kadagiti lallaki nga annak ni Jacob ket ni Silo (Jesucristo) ti kaputotanna (Gen. 49:10).
Ti tribu ni Juda
Ti tribu ni Juda ti nagpangulo kalpasan ti panagnaedda iti Canaan. Ti tribu ni Efraim ti kangrunaan a kabalubalna. Binendisionan ni Moises ti tribu ni Juda (Deut. 33:7). Kalpasan ti panagturay ni Solomon, nagbalin a pagarian ti Juda ti tribu ni Juda.
Ti pagarian ti Juda
Iti panagturay ni Rehoboam nabingay ti masakupan ni Solomon iti dua nga agsina a pagarian, kangrunaanna gapu iti ilem iti nagbaetan ti tribu da Efraim ken Juda. Sakupen ti akin-abagatan a pagarian, wenno ti pagarian ti Juda, ti tribu ni Juda ken ti nalawlawa a paset ti Benjamin. Ti Jerusalem ti kapituliona. Napigpigsa ti pammatida iti panagdayaw ken ni Jehova ngem iti akin-amianan a pagarian. Saan unay a nararaut ti Juda iti amianan ken daya, ket nagtalinaed ti kangrunaan a bileg iti ima ti kaamaan ni David agingga iti pannakasakup ti Babilonia. Nagbayag ti pagarian ti Juda iti 135 a tawen kalpasan ti pannakarebbek ti ad-adu ti taona ken nabilbileg a pagarian ti Israel.
Ti kasuratan ni Juda
Itudo daytoy ti Biblia a kas sinurat a maipanggep iti balay ti Juda (Eze. 37:15–19). Iti ud-udina nga aldaw, no naurnosen dagiti sanga ti balay ti Israel, mapagtitiponto met dagiti sagrado a sinuratanda. Agtitinnulong dagitoy naespirituan a sinurat ket buklenda ti sangsangkatunos a pammaneknek a Cristo ni Jesus, ti Dios ti Israel ken ti Dios ti sangalubongan (2 Ne. 3; 29; PJS, Gen. 50:24–36).