Espiritu
Dayta paset ti nabiag nga addan sakbay ti pannakayanak a matay, a nagtaeng iti nainlasagan a bagi bayat ti pannakatay, ken adda kalpasan ti ipapatay a kas naisina a bagi agingga iti panagungar. Amin a nabiag—tattao, ayup, ken mulmula—espirituda sakbay nga immay iti daga ti ania man a sukog ti biag (Gen. 2:4–5; Moises 3:4–7). Kalanglanga ti bagi nga espiritu ti bagi a lasag, (1 Ne. 11:11; Ether 3:15–16; DkK 77:2; DkK 129). Banag ti espiritu, ngem napimpino wenno natartarnaw ngem iti matay nga elemento wenno banag (DkK 131:7).
Tunggal tao masao nga anak a lalaki wenno babai ti Dios, nayanakda a kas espiritu ti Nailangitan a Nagannak sakbay a nayanakda iti nainlasagan a nagannak iti daga (Heb. 12:9). Tunggal tao iti daga addaan di matay a bagi nga espiritu a mainayon iti bagi a lasag ken tulang. Kas nailawlawag no dadduma iti nasantuan a kasuratan, buklen ti espiritu ken ti bagi a lasag ti kararua (Gen. 2:7; DkK 88:15; Moises 3:7, 9, 19; Abr. 5:7). Makapagbiag ti espiritu uray awan ti bagi a lasag, ngem ti bagi a lasag saan a makapagbiag no awan ti espiritu (San. 2:26). Ti ipapatay ti bagi ti isisina ti espiritu iti bagi. Iti panagungar, makitipon ti espiritu iti isu met la a bagi a lasag ken tulang a limmukonanna, nga adda dua a kangrunaan a paggidiatan: saandanton nga agsina pay, ken saanton a matay ti bagi ken mapagbalin a naan-anay (Alma 11:45; DkK 138:16–17).