Sakripisio

Kadagiti nagkauna nga aldaw, panangpasanto iti maysa a banag wenno maysa a tao ti kaipapanan ti sakripisio. Makuna itan a panangisuko wenno panagitured iti pannakapukaw ti nailubongan a bambanag para iti Apo ken ti pagarianna. Nasken a siaayat dagiti kameng ti Simbaan ti Apo a mangisakripisio iti amin a banag para iti Apo. Insuro ni Joseph Smith a “ti relihion a di agsakripisio iti amin a banag awanan iti umdas a bileg a mamataud iti pammati a nasken iti biag ken pannakaisalakan.” Iti agnanayon a panirigan, nabilbileg ti bendision a magun-od ngem ti ania man a banag nga ited.

Kalpasan ti pannakapapanaw da Adan ken Eva iti Minuyongan ti Eden, inikkan ida ti Apo iti paglintegan a panagidaton. Mairaman iti daytoy a paglintegan ti sakripisio iti inauna kadagiti arbanda. Simbulo daytoy a sakripisio ti sakripisio nga aramiden ti Bugbugtong nga Anak ti Dios (Moises 5:4–8). Nagtultuloy daytoy a kannawidan agingga iti ipapatay ni Jesucristo, a nangigibus iti panagidaton iti ayup a kas ordinansa ti ebanghelio (Alma 34:13–14). Iti Simbaan ita makiranud dagiti kameng iti sakramento iti tinapay ken danum kas panglagip iti sakripisio ni Jesucristo. Maidawat met kadagiti kameng ti Simbaan ni Cristo ita a mangidaton a sipapakumbaba ti pusoda ken sibababawi ti espirituda (3 Ne. 9:19–22). Kayat a sawen daytoy a napakumbabada, nagbabawi, ken siaanamongda nga agtungpal kadagiti bilin ti Dios.