Samuel, Propeta iti Daan a Tulag
Anak da Elkana ken Hanna, naipasngay ni Samuel kas sungbat ti kararag ti inana (1 Sam. 1). Iti panagubingna tinaraken ni Eli, ti nangato a saserdote iti tabernakulo ti Shilo (1 Sam. 2:11; 3:1). Tinudingan ti Apo ni Samuel a propeta idi ubing pay (1 Sam. 3). Kalpasan ti ipapatay ni Eli nagbalin a naindaklan a propeta ken ukom ni Samuel iti Israel ket insublina ti paglintegan, urnos, ken ti masansan a napammatian a panagdaydayaw iti daga (1 Sam. 4:15–18; 7:3–17).
Laonen ti 1 Sam. 28:5–20 ti pakaammo ni Samuel iti panangpagungar ti manggagamud ti Endor babaen ti dawat ni Ari Saulo. Saan a mabalin a parmata daytoy a nagtaud iti Dios, gapu ta saan a maaramid ti manggagamud wenno ania pay nga aramid ti sabali nga espiritu a mangsugsog iti propeta nga agparang babaen ti dawatna (1 Sam. 28:20; 31:1–4).
Dagiti libro ti 1 ken 2Â Samuel
Kadagiti sumagmamano a Biblia, maymaysa a libro ti 1 ken 2Â Samuel. Dua a libro kadagiti dadduma. Sinakup dagiti libro ti panawen nga agarup 130 a tawen, manipud iti pannakayanak ni Samuel agingga iti sakbay la unay ti pannakatay ni Ari David.
Ti libro ti 1Â Samuel
Iladawan dagiti kapitulo 1–4 nga inlunod ken dinusa ti Apo ti kaamaan ni Eli ket tinudinganna ni Samuel a nangato a saserdote ken ukom. Ipakaammo dagiti kapitulo 4–6 no kasano a natnag ti lakasa ti tulag kadagiti ima dagiti Filisteo. Naisurat kadagiti kapitulo 7–8 ti ballaag ni Samuel maipanggep iti kaadda dagiti sinsinan dios ken nadangkes nga ari. Ilawlawag dagiti kapitulo 9–15 ti pannakakorona ni Saulo ken ti panagturayna nga ari. Ibaga dagiti kapitulo 16–31 ti pakasaritaan ni David ken ti pannakagun-odna iti bileg—Linanaan ni Samuel ni David a nangpapatay ken ni Goliat. Kinagura ni Saulo ni David, ngem nagkedked ni David a mangpatay ken ni Saulo uray no adda koma gundawayna.
Ti libro ti 2Â Samuel
Laonen ti libro dagiti detalye ti panagturay ni David a kas ari ti Juda ken idi agangay iti intero nga Israel. Ipakita dagiti kapitulo 1–4 ti napaut a panagrigat dagiti pasurot ni David, kalpasan ti pannakakorona kenkuana ni Juda, ken dagiti pasurot ni Saulo. Ipakita dagiti kapitulo 5–10 ti panagbalin ni David a nabileg iti adu a dagdaga. Ipakita dagiti kapitulo 11–21 ti panagbaba ti naespirituan a pigsa ni David gapu kadagiti basolna ken ti yaalsa iti kaamaanna. Iladawan dagiti kapitulo 22–24 ti panagpanggep ni David a makikinnaawatan iti Apo.