1 Ket ngarud makitatayo no kasano a saan a pudno, ken kasta met ti kinaawan ti kinatalged ti panagpuspuso ti annak ti tattao; wen, mabalin a makitatayo nga iti kinaindaklan nga awan patingga a kinasayaat ti Apo bendisionan ken rumang-ay dagidiay agtalek kenkuana.

2 Wen, mabalina a makitatayo iti dayta a panawen a rumang-ay ti tattaona, wen, umado ti magun-od a gunggona manipud kadagiti talonda, dagiti arban ken pangenna, ken iti balitokda, ken iti pirakda, ken iti amin a kita dagiti napateg a bambanag iti tunggal kita ken klase; isalakanna dagiti biagda, ken isalakanna ida manipud kadagiti kabusorda; paluknengenna ti puspuso dagiti kabusorda tapno saanda a makigubat kontra kadakuada; wen, ken iti kamaudiananna, aramidenna amin a bambanag para iti pagimbagan ken pagragsakan dagiti tattaona; wen, isunto met ti panawen a patangkenenda dagiti pusoda, ken malipatanda ti Apo a Diosda, ken payatpayatanda ti Maysa a Nasantuan—wen, ket gapu daytoy iti kinanam-ayda, ken kasta unay a kinarang-ayda.

3 Ket ngarud makitatayo a malaksid no dusaen ti Apo dagiti tattaona iti adu a pammarigat, wen, malaksid no sarungkaranna ida nga adddaan iti ipapatay ken panagbuteng, ken addaan iti panagbisin ken iti amin a kita ti angol, saandanto a malagip isuna.

4 O anian ti kinamaag, ken anian ti kinaawan serbina, ken anian a kinadakes, ken kinasairo, ken anian a kinapardas nga agaramid iti kinadangkes, ken anian a kinabannayat nga agaramid iti naimbag, dagiti annak ti tattao; wen, anian a napardas a dumngeg kadagiti balikas ti maysa a dakes, ken tarigagayan dagiti pusoda dagiti awan serbina a bambanag ti lubong!

5 Wen, anian a kapardas nga agbalin ti kinapalangguad; wen, anian a kapardas nga agpasindayag, ken anian ti kinabannayadda a manglagip iti Apo a Diosda, ken dumngeg kadagiti pammagbagana, wen, anian a kinabannayad a magna kadagiti dana ti kinasirib!

6 Kitaen, saanda a tarigagayan a ti Apo a Diosda, a nangparsua kadakuada, ti nasken nga agpannuray ken agturay kadakuada; iti laksid ti naindaklan a kinaimbagna ken ti asina kadakuada, ket ibilangda nga awan serbina dagiti pamagbagana, ket saanda kayat a nasken nga isu ti mangiwanwan kadakuada.

7 O Anian a naindaklan ti kinaawan pateg dagiti annak ti tattao; wen, isu ngarud a basbassitda ngem iti tapok iti daga.

8 Agsipud ta kitaen, aggaraw ti tapok ti daga iti nadumaduma a pagturongan, iti kasta masinasinada, babaen iti bilin ti naindaklan ken agnanayon a Diostayo.

9 Wen, kitaen babaen iti timekna dagiti turod ken bantay ket agtigerger ken agkintayeg.

10 Ket babaen iti bileg ti timekna maburakda, ket agbalinda a patag, wen, uray pay a kas iti tanap.

11 Wen, babaen iti bileg ti timekna agkintayeg ti intero a daga;

12 Wen, babaen iti bileg ti timekna, aggungon dagiti pundasion, uray agingga iti mismo a tengngana.

13 Wen, ket no ibagana iti daga—Agrikus—agrikusto.

14 Wen, no ibagana iti daga—inka agsubli, tapno paatidogenna ti aldaw iti adu nga oras—maaramidto;

15 Ket ngarud, mayannurot iti balikasna agsubli ti daga, ket agparang iti tao a saan nga agaraw ti init; wen, ket kitaen, kasta daytoy; gapu ta agpayso a ti daga ti aggaraw ket saan a ti init.

16 Ket kitaen, kasta met, no ibagana kadagiti danum ti taaw—agbalinka a namaga—maarmidto.

17 Kitaen, no ibagana iti daytoy a bantay—Agpangatoka, ket bumallasiwka agtinnagka iti dayta a siudad, tapno magaburan daytoy—kitaen naaramiden.

18 Ket kitaen, no mangilemmeng ti maysa a tao iti kinabaknang iti daga, ket ibaga ti Apo—daytoy ket mailunod, gapu iti kinadangkes ti nangilemmeng iti daytoy—kitaen, mailunodto.

19 Ket no ibaga ti Apo—Mailunodka, tapno awan ti tao a makasarak kenka manipud ita a panawen ken iti agnanayon—kitaen, awan ti tao a makagun-od iti daytoy manipud ita ken iti agnanayon.

20 Ket kitaen, no ibaga ti Apo iti maysa a tao—Gapu kadagiti kinadangkesmo, mailunodka iti agnanayon—maaramidto.

21 Ket no ibaga ti Apo—Gapu kadagiti kinadangkesmo mailaksidkanto iti imatangko—ibilinnanto a mapasamak.

22 Ket ay-ay pay ti siasinoman a pangibagaanna daytoy, gapu ta mapasamak daytoy ti siasinoman nga agaramid iti kinadangkes, ket saanto a maisalakan; ngarud, gapu iti daytoy, tapno maisalakan dagiti tattao, isu a maipakaammo a nalawag ti panagbabawi.

23 Ngarud, nabendisionan dagiti agbabawi ken dumngeg iti timek ti Apo a Diosda; gapu ta isuda dagiti maisalakan.

24 Ket ipaay koma ti Dios, iti naindaklan a kinasantona, ta mabalin a maiturong dagiti tattao iti panagbabawi ken kadagiti naimbag nga aramid, tapno maisubli kadakuada ti parabur a para iti parabur, a mayannurot kadagiti aramidda.

25 Ket kayatko koma a maisalakan dagiti amin a tattao. Ngem mabasatayo nga iti naindaklan ken maudi nga aldaw adda sumagmamano a mailaksid, wen, mailaksid iti sanguanan ti Apo;

26 Wen, nga isu ti maituding iti kasasaad nga awan patingga a ladingit, a mangtungpal kadagiti balikas a mangibagbaga: Dagidiay nagaramid iti naimbag ket maaddaandanto iti biag nga agnanayon; ket dagiti nagaramid iti dakes maaddaandanto iti agnanayon a a pannakadusa. Ket kastan. Amen.