1 Kitaen, ita napasamak iti maikainnem a pulo ket siam a tawen ti panagturay dagiti ukom kadagiti tattao dagiti Nephita, a nagsubli ni Nephi, a lalaki nga anak ni Helaman, iti daga a Zarahemla manipud iti daga nga agpaamianan.

2 Gapu ta napan isuna kadagiti tattao nga adda iti daga nga agpaamianan, ken inkasabana ti balikas ti Dios kadakuada, ken adu a bambanag ti impadtona kadakuada;

3 Ket inlaksidda amin a balikasna, isu a saan a makapagtalinaed isuna kadakuada, ngem nagsubli manen iti daga a nakayanakanna.

4 Ket idi nakitana nga adda iti kasta a nakaam-amak a kinadakes a kasasaad dagiti tattao, ken dagidiay mannanakaw a Gadianton ti nangokupar kadagiti tugaw-pagukoman—agsipud ta naagawda ti bileg ken turay iti daga; inwaksida dagiti bilin ti Dios, ken saanda nga umiso iti sanguanan ti Dios iti kabassitan a gundaway; awan ti kinahustisia ti ar-aramidda iti asinoman kadagiti annak ti tattao;

5 Panangkondenar kadagiti nalinteg gapu iti kinalintegda; ipalubos a saan a madusa ti nakabasol ken dakes gapu iti kuartada; ket kanayonanna maipaayan iti posision iti panangidaulo ti gobierno, nga agturay ken agaramid a maitunos kadagiti pagayatanda, tapno makagun-odda iti gunggona ken gloria ti lubong, ken, kayanonanna pay, tapno ad-adda a nalaklakada ti makiabig, ken agtakaw, ken pumatay, ken agaramid sigun kadagiti bukodda a pagayatan—

6 Ita dimteng daytoy nakaro a kinadakes kadagiti Nephita, iti las-ud ti saan nga adu a tawen; ket idi nakita ni Nephi daytoy, napno ti pusona iti ladingit iti uneg ti barukongna; ket impukkawna iti panagsagaba ti kararuana:

7 O, no nagbiagak koma bayat iti panagbiag idi damo a pimmanaw ti amak a ni Nephi manipud iti daga ti Jerusalem, ta nagragsakak koma a kadua isuna iti naikari a daga; iti panawen a nalaka a masusuruan dagiti tattaona, natibker a mangtungpal kadagiti bilin ti Dios, ken saan nga alisto a maiturong nga agaramid iti kinadakes; ket napartakda a dimngeg kadagiti balikas ti Apo—

8 Wen, no ti biagko mabalin koma a kas kadagidiay a panagbiag, no kasta naragsak koma ti kararuak iti kinalinteg dagiti kakabsatko.

9 Ngem kitaen, natuding a dagitoy ti panagbiagko, ken ta mapno ti kararuak iti ladingit gapu iti daytoy a kinadakes dagiti kakabsatko.

10 Ket kitaen, ita napasamak nga adda iti maysa a torre, nga adda iti minuyongan ni Nephi, nga asideg ti nalawa a kalsada nga agturong iti kangrunaan a paglakuan, nga adda iti siudad ti Zarahemla; ngarud, nagruknoy ni Nephi iti torre nga adda iti minuyonganna, nga asideg met daytoy a torre iti ruangan ti minuyongan nga asideg ti paglabsan ti nalawa a kalsada.

11 Ket napasamak nga adda lallaki a limmabas ket nakitada ni Nephi bayat ti panangibukbokna iti kararuana iti Dios iti torre; ket nagtarayda a napan nangibaga kadagiti tattao iti naimatanganda, ket napan dagiti tattao a sangsangkamaysa tapno maammuanda ti gapu ti nalaus a panagleddaang iti kinadangkes dagiti tattao.

12 Ket ita, idi timmakder ni Nephi nakitana dagiti adu a tao a naguummong.

13 Ket napasamak a linukatanna ti ngiwatna ket kinunana kadakuada: Kitaen, apay a naguummongkayo? Tapno maibagak kadakayo dagiti kinadakes?

14 Wen, gapu ta napannak iti torrek tapno maibukbokko ti kararuak iti Diosko, gapu iti kasta unay a ladingit ti pusok, a gapu kadagiti kinadangkesyo!

15 Ket naguummongkayo gapu iti panagleddaang ken panagdung-awko, ket nagsiddaawkayo; wen, ket kasapulanyo unay nga agsiddaaw; wen, nasken nga agsiddaawkayo gapu ta nagpabus-oykayo a matengngel ti sairo iti kasta unay dagiti pusoyo.

16 Wen, kasano koma a intedyo ti dalan iti panangallukoy daydiay agkagumaan a mangipan kadagiti kararuayo iti agnanayon a panagladingit ken awan patinggana a kinaay-ay?

17 O agbabawikayo, agbabawikayo! Apay a mataykayo? Mapankayo, mapankayo iti Apo a Diosyo. Apay a binaybay-annakayo?

18 Gapu ta pinatangkenyo dagiti pusoyo; wen, saanyo kayat a dumngeg iti timek ti naimbag a pastor; wen, inprobokaryo isuna a makapungtot kadakayo.

19 Ket kitaen, imbes nga ummongennakayo, malaksid no agbabawikayo, kitaen, iwarasnakayto tapno agbalinkayo ​​a taraon dagiti aso ken atap nga animal.

20 O, kasano koma a nalipatanyo ti Diosyo iti mismo nga aldaw nga insalakannakayo?

21 Ngem kitaen, tapno makagun-odkayo iti gunggona, tapno dayawenkayo dagiti tattao, wen, ken tapno makagun-odkayo iti balitok ken pirak. Ket tinarigagayan dagiti pusoyo dagiti kinabaknang ken awan serserbina a bambanag iti daytoy a lubong, gapu iti dayta a pumataykayo, ken agsamsam, ken agtakaw, ken mangsaksikayo iti ulbod kontra iti kaarrubayo, ken ar-aramidenyo ti amin a kita ti kinadangkes.

22 Ket gapu iti daytoy kinaay-ay ti dumteng kadakayo malaksid no agbabawikayo. Ta no saankayto nga agbabawi, kitaen, maalanto kadakayo daytoy a dakkel a siudad, ken kasta met amin dagidiay dadakkel a siudad nga adda iti aglawlaw, nga adda iti daga a tagikuatayo, awanto ti lugaryo kadagitoy; ta kitaen, saanto nga ipaay ti Apo kadakayo ti pigsa, kas iti inaramidna idi agingga ita, tapno masarangetyo kadagiti kabusoryo.

23 Agsipud ta kitaen, kastoy ti kuna ti Apo: Saankonto ipakita kadagiti dakes ti pigsak, iti maysa nga ad-adda ngem iti sabali, malaksid kadagiti agbabawi kadagiti basolda, ken dumngeg kadagiti balikasko. Ita ngarud, kayatko a kitaenyo, kakabsatko, a nasaysayaatto para kadagiti Lamanita ngem para kadakayo malaksid no agbabawikayo.

24 Agsipud ta kitaen, nalinlintegda ngem dakayo, gapu ta saanda a nagbasol a kontra iti dayta naindaklan a pannakaammo a naawatyo; ngarud kaasianto ida ti Apo; wen, paatiddogennanto dagiti biagda ken paaduenna ti kaputotanda, uray pay no mapapataykayo amin malaksid no agbabawikayo.

25 Wen, ay-aykayonto pay gapu iti dayta nakaro a kinarimon a dimteng kadakayo; ket pinagkaykaysayo ti bagbagiyo iti dayta, wen, iti dayta nalimed nga armado a grupo a binukel ni Gadianton!

26 Wen, kinay-ayto ti dumteng kadakayo gapu iti dayta a panagpannakkel nga impabus-oyyo a simrek kadagiti puspusoyo, a nangitag-ay kadakayo iti labes pay iti dayta a kinasayaat gapu iti kasta unay a kinabaknangyo!

27 Wen, ay-aykayonto pay gapu iti kinadakes ken kinarimonyo!

28 Ket malaksid no agbabawikayo mataykayto; wen, maala kadakayo uray dagiti dagayo, ket mapapataykayto manipud iti rabaw ti daga.

29 Kitaen ita, saanko ibaga a mapasamak dagitoy a bambanag, iti bagik, gapu ta saan a ti bagik nga ammok dagitoy a bambanag; ngem kitaen, ammok a pudno dagitoy a bambanag gapu ta impakaammo kaniak ti Apo a Dios, gapuna paneknekak a mapasamakto.