1 Ket napasamak iti maikalimapulo ket uppat a tawen adu ti panagsiasi iti simbaan, ket adda met panagsususik kadagiti tattao, isu nga adu ti pammapatay.

2 Ket napapatay dagiti rebelioso a paset ken napapanaw iti daga, ket napanda iti ari dagiti Lamanita.

3 Ket napasamak nga inkagumaanda a mangsugsog kadagiti Lamanita a makigubat kadagiti Nephita; ngem kitaen, kasta unay ti buteng dagiti Lamanita, isu a saanda a dumngeg kadagiti balikas dagidiay simiasi.

4 Ngem napasamak iti maikalimapulo ket innem a tawen ti panagturay dagiti ukom, adda dagiti simiasi a nagsiasi manipud kadagiti Nephita a napan kadagiti Lamanita; ket nagballigida a kadua dagidiay dadduma a mangsugsog kadakuada nga agpungtot kontra kadagiti Nephita; ket nagsagsaganada amin para makigubat iti dayta a tawen.

5 Ket iti maikalimapulo ket pito a tawen napanda nakigubat kontra kadagiti Nephita, ket inrugida ti aramid ti panangpapatay; wen, isu a iti maikalimapulo ket walo a tawen ti panagturay dagiti ukom nagballaigida a nanggun-od iti panangtagikua iti daga ti Zarahemla; wen, ken kasta met dagiti amin a daga, agingga iti daga nga asideg iti daga a Bountiful.

6 Ket napagsanud dagiti Nephita ken dagiti armada ni Moronihah agingga iti daga ti Bountiful;

7 Ket sadiay a nangsarikedkedda kontra kadagiti Lamanita, manipud iti laud a baybay, agingga iti daya; maysa nga aldaw daytoy a panagdaliasat para iti maysa a, iti beddeng a nasarikedkeddanda ken nangipuestoda kadagiti soldadoda a mangdepensa iti amianan a pagilianda.

8 Ket isu a nagun-od dagidiay simiasi dagiti amin a sanikua dagiti Nephita nga adda iti daga nga agpaabagatan, babaen ti tulong ti adu nga armada dagiti Lamanita. Ket naaramid amin dagitoy iti maikalimapulo ket walo ken siam a tawen ti panagturay dagiti ukom.

9 Ket napasamak nga iti maikainnem a pulo a tawen ti panagturay dagiti ukom nagballigi ni Moronihah a kadua dagiti soldadona a nanggun-od kadagiti adu a paset ti daga; wen, nagun-odda manen ti adu a siudad a natnag kadagiti ima dagiti Lamanita.

10 Ket napasamak iti maikainnem a pulo ket maysa a tawen ti panagturay dagiti ukom nagballigida a nanggun-od agingga ti kagudua ti amin a sanikuada.

11 Ita daytoy dakkel a pannakapukaw dagiti Nephita, ken ti dakkel a pannakapapatay a napasamak kadakuada, a saan koma a napasamak no saan a gapu iti kinadakesda ken ti kinarimonda; wen, ket kasta met daytoy kadagidiay nagpammarang a kamengda iti simbaan ti Dios.

12 Ket gapu daytoy iti panagpannakkel ti puspusoda, gapu iti kasta unay a kinabaknangda, wen, gapu daytoy iti panangirurumenda kadagiti napanglaw, panangipaidamda iti taraonda kadagiti mabisin, panangipaidamda iti kawesda kadagiti lamolamo, ken panangkabilda kadagiti napakumbaba a kabsatda iti pingping, pananguyaw iti sagrado, panangilibak iti espiritu ti padto ken ti paltiing, panangpapatay, panagsamsam, panagulbod, panagtakaw, pannakikamalala, panagiyaalsa iti nakaro a panagsususik, ken panagsiasi iti daga ni Nephi, kadagiti Lamanita—

13 Ket gapu daytoy iti nakaro a kinadakesda, ken ti panangpasindayagda iti bukodda a pigsa, nabaybay-anda iti bukodda a pigsa; ngarud saanda a rimmang-ay, ngem ketdi naparigat ken nasaplitda, ken napapanawda iti sanguanan dagiti Lamanita, agingga a napukawda ti panagtagikua iti dandani amin a dagada.

14 Ngem kitaen, adu a bambanag ti inkasaba ni Moroniha kadagiti tattao gapu iti kinadangkesda, ken kasta met da Nephi ken Lehi, a lallaki nga annak ni Helaman, ket nangikasaba iti adu a bambanag kadagiti tattao, wen, ken adu a bambanag ti impadto kadakuada maipanggep kadagiti kinadangkesda, ken no ania ti nasken a mapasamak kadakuada no saanda nagbabawi kadagiti basolda.

15 Ket napasamak a nagbabawida, ket isu nga idi nagbabawida nangrugida a rimmang-ay.

16 Ta idi nakita ni Moroniha a nagbabawida nga impadasna nga indauluan ida manipud iti nadumaduma a lugar, ken nadumaduma a siudad, agingga a nagun-odda manen ti kagudua ti sanikuada ken ti kagudua ti amin a dagada.

17 Ket kasta ti panaggibus ti innem a pulo ket maysa a tawen ti panagturay dagiti ukom.

18 Ket napasamak iti maikainnem a pulo ket dua a tawen ti panagturay dagiti ukom, saanen a magun-od ni Moroniha dagiti sanikua dagiti Lamanita.

19 Ngarud binaybay-anda ti planoda a manggun-od kadagiti nabati a dagada, gapu ta imposible para kadagiti Nephita a magun-od ti ad-adu pay a bileg kadakuada; ngarud impakat ni Moroniha kadagiti amin soldadona a mangmantener kadagidiay paset a naaladan.

20 Ket napasamak, a nakaro ti buteng dagiti Nephita gapu iti kinadakkel ti bilang dagiti Lamanita, ta amangan no maparmekda, ken mabaddebaddekanda, ken mapapatay, ken madadaelda.

21 Wen, rinugianda a lagipen dagiti padto ni Alma, ken kasta met dagiti balikas ni Mosiah; ket naamirisda a nasukirda a tattao, ken imbilangda a saan a napateg dagiti bilin ti Dios;

22 Ken binalbaliwanda ken awan panagraemda kadagiti linteg ni Mosiah, wenno daydi imbilin ti Apo nga itedna kadagiti tattao; ket naamirisda a nagbalin a saan a patas dagiti lintegda, ken nagbalinda a dakes a tattao, isu a dakesda a kas kadagiti Lamanita.

23 Ken gapu iti kinadangkesda ti iglesia ket nangrugin a bimmassit; ket nangrugi a saanda patien iti espiritu ti padto ken iti espiritu ti paltiing; asidegen ken saanda maliklikan dagiti panangukom ti Dios.

24 Ket nakitada a nagbalinda a nakapuy, a kas kadagiti kakabsatda, dagiti Lamanita, ken asaanen a sinalakniban ida ti Espiritu ti Apo; wen, pimmanawen daytoy kadakuada gapu ta saan nga agnanaed ti Espiritu ti Apo kadagiti saan a nasantuan a templo—

25 Ngarud insardeng ti Apo a mangsalaknib kadakuada babaen ti namilagruan ken awan kapadana a bileg, ta natnagda iti saan a panamati a kasasaad ken nakaam-amak a kinadakes; ket nakitada nga ad-adu unay dagiti Lamanita ngem kadakuada, ket malaksid no kumpetda iti Apo a Diosda nasken a saanda maliklikan a matay.

26 Ta kitaen, naamirisda a ti pigsa dagiti Lamanita ket kas kadakkel ti pigsada, uray a kas tunggal maysa ti soldadoda. Ket isu a natnagda iti daytoy nakaro a basol; wen, isu a nagbalinda a nakapuy, gapu iti basolda, iti las-ud ti saan nga adu a tawen.