1 Ket ita napasamak a kimmaro ti panagsisinnusik iti maikapitopulo ket dua a tawen ti panagturay dagiti ukom, uray agingga a timmaud dagiti gubgubat kadagiti amin a tao ni Nephi iti intero a daga.

2 Ket intultuloy daytoy nalimed nga armado a grupo dagiti mannanakaw ti panagdadael ken kinadakes. Ket nagpaut daytoy a gubat iti intero dayta a tawen; ken kasta met a nagpaut iti pitopulo ket maikatlo a tawen.

3 Ket napasamak a nagpakaasi ni Nephi iti Apo iti daytoy a tawen, a kunana:

4 O Apo, saanmo ipalubos a mapapatay dagitoy a tattao babaen ti espada; ngem ket di O Apo, maaddaan koma iti panagbisin iti daga, a mamagtignay kadakuada a manglagip iti Apo a Diosda, ket nalabit agbabawidanto ken agtalekto kenka.

5 Ket kasta ti pannakaaramidna, a mayannurot kadagiti balikas ni Nephi. Ket adda nakaro a bisin iti daga, kadagiti amin a tattao ni Nephi. Ket isu nga iti maikapitopulo ket uppat a tawen nagtultuloy ti panagbisin, ket nagsardeng ti aramid ti panagdadael babaen ti espada ngem kimmaro ti panagbisin.

6 Ket kasta met a daytoy nga aramid ti pannakadadael ket nagtultuloy iti maikapitopulo ket lima a tawen. Agsipud ta nasaplit ti daga ket natikag daytoy, ken saan a nagpataud iti bukbukel iti panawen ti bukbukel; ket nasaplit ti intero a daga, uray pay kadagiti Lamanita ken kasta met kadagiti Nephita, isu a nasaplitda ta rinibu dagiti natay kadagiti nadakdakes a paset ti daga.

7 Ket napasamak a nakita dagiti tattao a dandanin a matayda gapu iti panagbisin, ket rinugianda a lagipen ti Apo a Diosda; ket rinugianda a lagipen dagiti balikas ni Nephi.

8 Ket rinugian dagiti tattao ti agpakaasi kadagiti kangatuan nga ukomda ken dagiti dadauloda, nga ibagada ken ni Nephi a: Kitaen, ammomi a taoka ti Dios, ket ngarud ipakaasim iti Apo a Diosmi nga isardengna daytoy a panagbisin kadakami, ta amangan a mapasamak amin dagiti balikas nga imbagam maipanggep iti pannakadadaelmi.

9 Ket napasamak nga imbaga dagiti ukom ken ni Nephi, a mayannurot kadagiti balikas a tinarigagayanda. Ket napasamak nga idi nakita ni Nephi a nagbabawi dagiti tattao ken nagpakumbabada babaen iti panagkawesda iti sako, nagpakaasi manen iti Apo, a kunana:

10 O Apo, kitaen agbabawi dagitoy a tattao; ket naikkatda kadakuada ti armado a grupo ni Gadianton agingga a naungawda, ket inlemmengda dagiti nalimed a planoda iti daga.

11 Ita, O Apo, gapu daytoy panagpakumbabada isardengmo koma ti pungtotmo, ket ipalubosmo koma a maibsan ti pungtotmo iti pannakadadael dagidiay dakes a tattao a dinadaelmon.

12 O Apo, isardengmo koma ti pungtotmo, wen, ti narungsot a pungtotmo, ket ibilinmo nga agsardeng daytoy panagbisin iti daytoy a daga.

13 O Apo, dengngennak koma, ket ibilinmo a maaramid a mayannurot kadagiti balikasko, ken ibaonmo ti tudo iti rabaw ti daga, tapno maipataudna ti bungana, ken ti bungana iti panawen ti bukel.

14 O Apo, nangngegmo dagiti balikasko idi imbagak, Agadda koma ti panagbisin, tapno agsardeng ti angol babaen iti espada; ket ammok a maaramid mo, uray iti daytoy a panawen, denggem dagiti balikasko, gapu ta imbagam a: No agbabawi dagitoy a tattao isalakankonto ida.

15 Wen, O Apo, ket makitam a nagbabawida, gapu iti panagbisin ken angol ken pannakadadael a napasamak kadakuada.

16 Ket ita, O Apo, isardengmo kadi ti pungtotmo, ket padasem manen no agserbidanto kenka? Ket no kasta, O Apo, mabalin a mabendisionam ida a mayanuurot kadagiti balikasmo a nasaomon.

17 Ket napasamak nga iti maikapitopulo ken innem a tawen insardeng ti Apo ti pungtotna kadagiti tattao, ket imbilinna nga agtudo iti daga, isu a nagtaud iti bungana iti panawen iti panagbungana. Ket napasamak a nagpataud daytoy iti bukelna iti panawen ti bukbukelna.

18 Ket kitaen, nagragsak ken indaydayaw dagiti tattaot ti Dios, ket napno ti intero a rabaw ti daga iti ragsak; ket saandan nga inkagumaan a papatayen ni Nephi, ngem impategda ketdi isuna a maysa a naindaklan a propeta, ken maysa a tao ti Dios, nga addaan iti naindaklan a bileg ken turay a naited kenkuana ti Dios.

19 Ket kitaen, ni Lehi, ti lalaki a kabsatna, ket awan ti sangkabassit a pakaudiananna no maipapan kadagiti bambanag a maipanggep iti kinalinteg.

20 Ket napasamak a nangrugi manen a rimmang-ay dagiti tattao ni Nephi iti daga, ket rinugianda a binangon dagiti langalang a lugarda, ket nangrugida nga umadu ken nagwaras, agingga a nagwarasda iti intero ti daga, agpadpada nga agpaamianan ken agpaabagatan, manipud iti laud a baybay agingga iti daya a baybay.

21 Ket napasamak a sitatalna a nagpatingga ti maikapitopulo ket innem a tawen. Ket nangrugi a sitatalna ti maikapitopulo ket pito a tawen; ket nagwaras ti simbaan iti intero a rabaw ti amin a daga; ket iti ad-adu a paset dagiti, agpadpada a kameng ti simbaan dagiti Nephita ken dagiti Lamanita; ket naaddaanda iti kasta unay a naindaklan a kappia ti daga; ket kasta a nagpatingga ti maikapitopulo ket pito a tawen.

22 Ket kasta met a naaddaanda iti kappia iti maikapitopulo ket walo a tawen, malaksid iti sumagmamano a panagsisinnusik maipapan kadagiti paset ti doktrina nga inlanad dagiti propeta.

23 Ket iti maikapitopulo ket siam a tawen nangrugi ti adu a riri. Ngem napasamak a da Nephi ken Lehi, ken adu kadagiti kakabsatda a makaammo maipanggep kadagiti pudno a paset ti doktrina, gapu ta addaanda iti adu a paltiing iti inaldaw, ngarudnangasabada kadagiti tattao, isu a napagsardengda ti panagririri iti dayta met laeng tawen.

24 Ket napasamak nga iti maikawalopulo a tawen ti panagturay dagiti ukom kadagiti tattao ni Nephi, adda sumagmamano a bilang dagiti simiasi manipud kadagiti tattao ni Nephi, a sumagmamano a tawenen idi a nakikadua kadagiti Lamanita, ken inawat dagiti bagida ti nagan a dagiti Lamanita, ken kasta met ti sumagmamano a bilang ti pudno a kaputotan dagiti Lamanita, a nasugsogan nga agpungtot babaen kadakuada, wenno dagidiay nagsiasi, ngarud rinugianda ti pannakigubat kadagiti kakabsatda.

25 Ket nagaramidda iti pammapatay ken panagsamsam; ket kalpasanna agsanudda manen kadagiti bambantay, ken kadagiti let-ang ken nalimed a lugar, inlemmengda ti bagbagida tapno saanda a matakuatan, inaldaw nga umawatda iti nayon iti bilangda, no la ket adda dagiti simiasia a napan kadakuada.

26 Ket iti kasta iti panaglabas ti panawen, wen, uray pay iti uneg ti saan unay nga a adu a tawen, panagbalinda a kasta unay a dakkel nga armado a grupo a mannanakaw; ket binirokda amin dagiti nalimed a plano ni Gadianton; ket ngarud nagbalinda a mannanakaw ni Gadianton.

27 Ita kitaen, nakaigapuan iti nakaro a riribuk, wen, uray pay iti nakaro a pannakadadael kadagiti tattao ni Nephi, ken kasta met kadagiti tattao dagiti Lamanita.

28 Ket napasamak a masapul nga agsardeng daytoy nga aramid ti panangdadael; ngarud nangibaonda kadagiti napipigsa a soldado a mapan iti let-ang ken kadagiti bambantay tapno birokenda dagitoy armado a grupo dagiti mannanakaw, ken papatayen ida.

29 Ngem kitaen, napasamak nga iti dayta met la a tawen napasanudda agingga kadagiti bukodda a daga. Ket kasta a nagpatingga ti maikawalopulo a tawen ti panagturay dagiti ukom kadagiti tattao ni Nephi.

30 Ket napasamak nga iti panangrugi ti maikawalopulo ket maysa a tawen napanda manen nakilaban kontra kadagiti armado a grupo dagiti mannanakaw, ket adu ti napapatayda; ket nagsagabada met iti nakaro a pannakadadael.

31 Ket napilitanda manen nga agsubli manipud iti let-ang ken manipud kadagiti bambantay agingga kadagiti bukodda a daga, gapu iti nakaro a kinaadu ti bilang dagidiay mannanakaw a nagnaed kadagiti bambantay ken let-ang.

32 Ket napasamak a kasta ti panagpatingga daytoy a tawen. Ket immadu ken pimmigsa latta dagiti mannanakaw, nga iti kasta sinarangetda ti intero a soldado dagiti Nephita, ken kasta met dagiti Lamanita; ket nakaigapuan ti nakaro a panagbuteng kadagiti tattao iti amin a rabaw ti daga.

33 Wen, gapu ta napanda kontra kadagiti adu a paset ti daga, ken nangaramidda iti nakaro a pannakadadael kadakuada; wen, adu ti pinapatayda, ken inalada a balud dagiti dadduma iti let-ang, wen, ken nangnangruna dagiti babbai ken dagiti annakda.

34 Ita daytoy nakaro a kinadakes, a napasamak kadagiti tattao gapu iti kinadangkesda, nangtignay manen kadakuada a manglagip iti Apo a Diosda.

35 Ket kasta a nagpatingga ti maikawalopulo ket maysa a tawen ti panagturay dagiti ukom.

36 Ket iti maikawalopulo ket dua a tawen nangrugida manen a malipatan ti Apo a Diosda. Ket iti maikawalopulo ket tallo a tawen nangrugi a kimmaro ti kinadakesda. Ket iti maikawalopulo ket uppat a tawen saanda pinasayaat dagiti panagbiagda.

37 Ket napasamak iti maikawalopulo ket lima a tawen ad-adda a kimmaro ti panagpannakkelda, ken ti kinadakesda; ket iti kasta agluomda manen para iti pannakadadael.

38 Ket kasta a nagpatingga ti maikawalopulo ket lima a tawen.