1 Ket ita, napasamak nga adu ti nakangngeg kadagiti balikas ni Samuel, ti Lamanita, nga insaona iti kaaddana kadagiti pader ti siudad. Ket kas kaadu kadagiti namati iti balikasna ti napan ken nangsapul ken ni Nephi; ket idi nakadanonda ket nasarakanda isuna impudnoda kenkuana dagiti basolda ket saanda inlibak dagitoy, ta tinarigagayanda a mabuniaganda iti Apo.

2 Ngem kas kaadu kadagiti saan a namati kadagiti balikas ni Samuel dagiti nakapungtot kenkuana; ket binatoda isuna iti kaadana iti pader, ken adu pay ti nangitiro kadagiti pana kenkuana idi nakatakder isuna iti pader; ngem adda kenkuana ti Espiritu ti Apo, isu a saanda matiro isuna kadagiti batoda wenno kadagiti panada.

3 Ita idi nakitada a saanda matiro isuna, ad-adu pay dagiti namati kadagiti balikasna, isu a napanda ken ni Nephi tapno mabuniagan.

4 Ta kitaen, mangbumbuniag ni Nephi, ken mangipadpadto, ken mangikaskasaba, idagadagna ti panagbabawi kadagiti tattao, a mangipakpakita kadagiti pagilasinan ken pagsidsiddaawan, agar-aramid kadagiti milagro kadagiti tattao, tapno maammuanda nga iti mabiit ket masapul nga umay ni Cristo—

5 Ibagbagana kadakuada dagiti bambanag a masapul nga umay iti mabiit, tapno maammuan ken malagipda ti panawen ti yaayda dagitoy naipasakbay a naipakaammo kadakuada, iti panggep a mamatida; ngarud kas kaadu kadagiti namati kadagiti balikas ni Samuel ti napan kenkuana tapno mabuniagan, ta immayda nga agbabawi ken nangipudno kadagiti basbasolda.

6 Ngem ad-adu iti pasetda dagiti saan a namati kadagiti balikas ni Samuel; ngarud idi nakitada a saanda a matiro isuna babaen kadagiti batoda ken panada, impukkawda kadagiti kapitanda, nga ibagbagada: Alaenyo daytoy a tao ket igalutyo, gapu ta kitaen addaan kenkuana ti diablo; ket gapu iti bileg ti diablo nga adda kenkuana saantayo a matiro babaen kadagiti bato ken panatayo; ngarud tiliwenyo ket igalutyo, ket alaenyo isuna.

7 Ket idi napanda tapno gammatan isuna, kitaen, pudno a timmappuak isuna manipud iti pader, ket naglibas kadagiti dagada, wen, agingga iti bukodna a pagilian, ket rinugianna ti nangasaba ken nagipadto kadagiti bukodna a tao.

8 Ket kitaen, saanen a pulos a nangngegan isuna kadagiti Nephita; ket kasta ti kasasaad dagiti tattao.

9 Ket kasta a nagpatingga ti maikawalopulo ket innem a tawen ti panagturay dagiti ukom kadagiti tattao ni Nephi.

10 Ket kasta met a nagpatingga ti maikawalopulo ket pito a tawen ti panagturay dagiti ukom, nagtalinaed ti ad-adu a paset dagiti tattao iti kinapalangguad ken kinadakesda, ket agbiag a siaannad ti basbassit a paset kadakuada iti sanguanan ti Dios.

11 Ket dagitoy met ti kasasaad, iti maikawalopulo ket walo a tawen ti panagturay dagiti ukom.

12 Ket bassit laeng ti panagbaliw iti kasasaad dagiti tattao, malaksid a nangrugi nga ad-adda a natangken ti kinadangkes dagiti tattao, ken ad-adda nga agaramid iti dayta a maikanniwas kadagiti bilin ti Dios, iti maikawalopulo ket siam a tawen ti panagturay dagiti ukom.

13 Ngem napasamak iti maikasiam a pulo a tawen ti panagturay dagiti ukom, adda dagiti naindaklan a pagilasinan a naited kadagiti tattao, ken dagiti pagsidsiddaawan; ket nangrugi a matungpal dagiti balikas dagiti propeta.

14 Ket nagparang dagiti anghel kadagiti tattao, masirib a tao, ket pudno a naipakaammo a nalawag kadakuada dagiti naragsak a damag ti naindaklan a rag-o; isu nga iti daytoy a tawen nangrugi a matungpal dagiti nasantuan a kasuratan.

15 Nupay kasta, nangrugi a pinatangken dagiti tattao ti puspusoda, isuda amin malaksid ti kaaduan a mamati a paset kadakuada, agpadpada kadagiti Nephita ken kasta met kadagiti Lamanita, ket nangrugi nga agpannuray iti bukodda a pigsa ken iti bukodda a sirib, ta ibagbagada:

16 Mabalin a husto ti impagarupda kadagiti sumagmamano a bambanag, kadagiti kaaduanna; ngem kitaen, ammotayo a saan a mapasamak amin dagitoy a naindaklan ken nakaskasdaaw nga aramid, a naisaon.

17 Ket rinugianda ti nagsasarita ken nagsusupiat, nga ibagada:

18 Nga saan a nainsiriban nga umay ti kasta a parsua a kas ken Cristo; no kasta, ket isu ti Anak ti Dios, ti Ama ti langit ken daga, kas iti naisao, apay a saanna ipakita ti bagina kadatayo a kas met kadagidiay addanto idiay Jerusalem?

19 Wen, apay a saanna nga ipakita ti bagina iti daytoy a daga kasta met iti daga ti Jerusalem?

20 Ngem kitaen, ammotayo a daytoy ket maysa a dakes a tradision, nga impatawid kadatayo dagiti ammatayo, tapno mamatitayo iti sumagmamano a naindaklan ken nakaskasdaaw a banag a masapul a mapasamak, ngem saan a kadatayo, no di ket iti adayo a daga, daga a saantayo ammo; ngarud mabalindatayo a pagtalinaeden iti kinaignorante, gapu ta saantayo a masaksian babaen kadagiti bukodtayo a mata a pudno dagidiay.

21 Ket aramidendanto, babaen ti kinasikap ken kadagiti misterioso nga abilidad ti sairo, agaramid ti sumagmamano a misterio a saantayo a maawatan, a mangpilit kadatayo a katulongan kadagiti balikasda, ken kasta met a katuloganda, gapu ta agpannuraytayo kadakuada a mangisuro kadatayo ti balikas; ket iti kasta pagtalinaedendatayo iti kinaignorante no isukotayo ti bagitayo kadakuada, iti amin nga alldaw ti panagbiagtayo.

22 Ket adu pay a bambanag ti inarapaap ti tattao kadagiti pusoda, a minamaag ken awan serserbina; ket nariribukda unay, gapu ta ni Satanas ti nangsugsog kadakuada ti agtultuloy a panagaramid kadagiti kinadangkes; wen, pudno a napanda a nangiwaras kadagiti mabalin a saan a pudno a damag ken panagsususik iti amin a rabaw ti daga, tapno mapatangkenna ti puspuso dagiti tattao a kontra iti naimbag ken kontra iti nasken a mapasamak.

23 Ket iti laksid dagiti pagilasinan ken pagsidsiddaawan a naaramid ti Apo kadagiti tattao, ken dagiti adu a milagro nga inaramidda, pudno a nagun-od ni Satanas ti nabileg a panangtengngel kadagiti puso dagiti tattao iti amin a rabaw ti daga.

24 Ket kasta a nagpatingga ti maikasiam a pulo a tawen ti panagturay dagiti ukom kadagiti tattao ni Nephi.

25 Ket kasta a panagpatingga ti libro ni Helaman, a mayannurot iti kasuratan ni Helaman ken dagiti lallaki nga annakna.