Ni Pablo iti pagbaludan

Hulio 31–Agosto 6

Dagiti Aramid 22–28

“Maysa a Ministro ken Saksi”

Bayat ti panangbasam kadagiti pakaammuan manipud iti panagserbi ni Pablo nga Apostol iti Dagiti Aramid 22–28, sapulem dagiti pagbatayan nga agbalinto a napateg kadagiti ubbing a sursuruam.

icon iti panagbibinninglay

Yawis ti Panagbibinninglay

I-display dagiti ladawan a mabalin a mangipalagip kadagiti ubbing dagiti estoria manipud iti Dagiti Aramid 22–28, kas iti maysa a pagbaludan, maysa a bilog, ken maysa nga uleg. Awisem dagiti ubbing a mangibinglay iti ania man nga estoria nga ammoda maipapan ken ni Pablo nga adda pakainaiganna kadagitoy a ladawan.

icon iti panangisuro

Isuro ti Doktrina: In-inaudi nga Ubbing

Dagiti Aramid 23:10–11

Ipatpategnak ti Nailangitan nga Ama ken ni Jesus ket tulongandakto kabayatan dagiti narigat a panawen.

Ti panagsursuro maipapan iti no kasano a tinulongan ti Mangisalakan ni Pablo ket mabalin a mangbukel iti pammati dagiti ubbing nga ipatpateg ida ti Nailangitan nga Ama ken ni Jesus.

Dagiti Mabalin nga Aktibidad

• Ibinglay ti estoria iti Dagiti Aramid 23:10–11 maipapan iti isasarungkar ti Mangisalakan ken ni Pablo iti pagbaludan. Wenno ipabuyam ti video a “Be of Good Cheer” (ChurchofJesusChrist.org), a mangiladawan iti daytoy nga estoria. Ibinglay ti maysa a panawen a naaddaanka iti pannubok ken immawatka iti pannarabay ken liwliwa manipud iti Dios. Kiddawen dagiti ubbing a mangibinglay kadagiti panawen idi nariknada a liniwliwa ida ti Dios.

• Tulongam dagiti ubbing a mangyulo iti kinuna ni Jesus ken ni Pablo: “Agtalgedka.” Kiddawen kadagiti ubbing a mangpanunot iti maysa a tao a mabalinda nga awisen nga agtalged—nalabit maysa a tao a naliday wenno mariribukan.

• Makipagkanta kadagiti ubbing maipapan iti panagbalin a naragsak, kas iti “Smiles” (Children’s Songbook, 267).

ubing a babai nga agsarsarita iti podium iti simbaan a kaduana ti babai iti likudanna

Kas ken ni Pablo, mapilitayo a mangiburay kadagiti pammaneknektayo maipapan iti Mangisalakan.

Dagiti Aramid 26:1–29

Maibinglayko ti pammaneknekko iti dadduma.

Ti panangrebyu iti pammaneknek ni Pablo iti sanguanan ni Ari Agripa ket makatulong kadagiti ubbing nga agsursuro no kasano nga ibinglay no ania ti ammoda a pudno.

Dagiti Mabalin nga Aktibidad

• Mangitugot iti papel a sinan-korona iti klase ken ipasuot daytoy iti maysa nga ubing ket agpammarang nga isu ni Ari Agripa. Awisem ti sabali pay nga ubing a tumakder iti sango ti ari a mangibagi ken ni Pablo kabayatan iti pananggupgopmo ti pammaneknek ni Pablo ken ti reaksion ni Ari Agripa, a masarakan iti Dagiti Aramid 26:1–29 kitaen itiKapitulo 63: Leppasen ni Pablo ti Misionna,” Dagiti Estoria iti Baro a Tulag, 162–66, wenno ti maitutop a video iti ChurchofJesusChrist.org). Ilawlawag a mabalintayo nga ibinglay dagiti pammaneknektayo iti dadduma, kas iti inaramid ni Pablo.

• Idawat kadagiti ubbing a dumngeg kabayatan ti panagkantam wenno panangbasam iti maysa a kanta maipapan iti pammaneknek, kas iti “I Know My Father Lives” (Children’s Songbook, 5). Awisem dagiti ubbing a mangingato kadagiti imada no mangngeganda ti maysa a banag nga ammoda a pudno. Mabalin a kayatmo nga kansionen ti kanta iti sumagmamano a daras; awisem dagiti ubbing a makipagkanta kenka no ammodan dagiti balikas. Tulongam ida a mangsanay a mangibinglay iti pammaneknekda maipapan kadagiti banag nga ammoda a pudno.

• Usarem ti panid ti aktibidad daytoy a lawas a mangtulong kadagiti ubbing nga agpanunot maipapan iti maysa a banag a mabalin nga isaoda no mangiburayda iti pammaneknekda (kitaen ti Pangannurotan ti Pammati para iti ad-adu pay a kapanunotan). Awisem ida a mangibinglay iti pammaneknekda iti maysa a tao iti pamiliada.

Dagiti Aramid 27

Ballaagandak dagiti propeta iti peggad.

Ibilang no kasano a makaisuro kadagiti ubbing ti pakaammuan maipapan iti pannakadadael ti barko ni Pablo a makita dagiti propeta ti pisikal ken naespirituan a peggad a saantayo a makita.

Dagiti Mabalin nga Aktibidad

• Awisem dagiti ubbing nga agpammarang nga addada iti maysa a barko a madaddadael iti maysa a bagyo. Basaen ti pammallag ni Pablo kadagiti tao, a masarakan iti Dagiti Aramid 27:9–10, ken ibinglaymo ti estoria maipapan iti nadadael a barko a napasamak gapu ta saanda a dimngeg iti pammallaagna (kitaen iti Dagiti Aramid 27: 11, 39–44). Ipakitam ti maysa a ladawan ti Presidente ti Simbaan, ken ibinglaymo ti pammaneknekmo a maballaagannatayo kadagiti naespirituan a peggad.

• Mangikabil iti sumagmamano a ladawan wenno banag iti lawlaw ti siled a mangibagi kadagiti banag nga insuro dagiti propeta nga aramidentayo tapno agbalin nga ad-adda a kas ken ni Jesus, a kas iti panagayat iti dadduma wenno panagpabuniag. Kas maysa a klase, magna iti lawlaw iti siled, nga agsardeng iti tunggal ladawan wenno banag tapno ilawlawag maipapan no kasano a tulongannatayo nga agtalinaed a natalged ti panangsurot kadagiti pannursuro ti propeta.

icon iti panangisuro

Isuro ti Doktrina: In-inauna nga Ubbing

Dagiti Aramid 23:10–11; 27:18–25; 28:1–6

No maipasangoak iti rigat, saanak a baybay-an ti Dios.

Iti unos dagiti pannubok a napadasan ni Pablo, adda ti Apo kenkuana. Kasano a matulongam dagiti ubbing a mangyarig kadagiti padas ni Pablo iti bukodda a biag?

Dagiti Mabalin nga Aktibidad

• Iti panangusar iti Dagiti Aramid 23:10, ilawlawag a naibalud ni Pablo gapu ta insurona kadagiti tao ti maipapan ken ni Jesus. Kalpasanna basaen ti Dagiti Aramid 23:11 kadagiti ubbing. Wenno ipabuyam ti video a “Be of Good Cheer” (ChurchofJesusChrist.org), a mangiladawan iti daytoy nga estoria. Apay a mabalin nga “agtalged” ni Pablo uray pay no adda iti pagbaludan?

• Isurat iti pisarra ti Dagiti Aramid 23:10–11; Dagiti Aramid 27:18–25; ken Dagiti Aramid 28:1–6. Ipakitam dagiti ladawan ti maysa a pagbaludan, maysa a barko, ken maysa nga uleg, ket awisem dagiti ubbing a mangrebyu kadagitoy a bersikulo ken iparis dagitoy kadagiti ladawan. Iti tunggal maysa kadagitoy a pakaammuan, kasano nga impakita ti Apo ken ni Pablo a kaduana kinadkaduana idi? Mangibinglay iti maysa a padas idi kinaduanaka ti Apo kabayatan ti narigat a panawen ken kasano a pinapigsana ti pammaneknekmo maipapan Kenkuana. Allukoyem dagiti ubbing a mangibinglay met kadagiti padasda.

Dagiti Aramid 26

Situtured a makaibinglayak iti pammaneknekko maipapan ken ni Jesucristo.

Ti kinatured ni Pablo iti panangibinglay iti pammaneknekna ket makatulong kadagiti ubbing a situtured iti panangibinglay kadagiti pammaneknekda.

Dagiti Mabalin nga Aktibidad

• Mangpili kadagiti bersikulo manipud iti Dagiti Aramid 26 a basaen kadagiti ubbing tapno matulongan ida a makaawat no ania ti imbaga ni Pablo ken ni Ari Agripa maipapan kadagiti padasna (kas kadagiti bersikulo 9–16) ken no ania ti insurona maipapan ken ni Jesucristo (kas kadagiti bersikulo 18, 23). Mabalinmo pay nga ipabuya ti maysa a paset ti video a “Paul: A Chosen Vessel” (ChurchofJesusChrist.org). Apay a mabalin a nakabutbuteng ken ni Pablo a mangibinglay kadagitoy a banag iti sango ti ari? Awisem dagiti ubbing a mangilista iti sumagmamano a pagbatayan ti ebanghelio nga ammoda a pudno. Kiddawem kadakuada a mangpanunot iti maysa a tao nga am-ammoda nga agkasapulan a dumngeg iti pammaneknekda maipapan kadagitoy a kinapudno.

• Awisem dagiti ubbing a mangusar iti daytoy a panid ti aktibidad a mangisurat ti maysa a banag a mabalinda nga isao no ibinglayda dagiti pammaneknekda.

Dagiti Aramid 27

Ballaagandak dagiti propeta iti peggad.

Mabalin a dumngeg dagiti ubbing kadagiti mensahe ti sibibiag a propeta ken mangilasin kadagiti ballaagda. Kasano a matulongam dagiti ubbing a makasursuro no kasano nga ipangag dagita a ballaag?

Dagiti Mabalin nga Aktibidad

• Manggetteng iti maysa a papel nga agsukog a kas iti maysa a barko a pagbalinen a pirapiraso ti puzzle. Awisem dagiti ubbing a mangisurat kadagiti ballaag ni Pablo iti Dagiti Aramid 27:9–11 kadagiti piraso ket sangkamaysa a buklenda ti puzzle. Apay a saan dimngeg dagiti tao ken ni Pablo? (kitaen iti bersikulo 11). Awisem dagiti ubbing a mangbasa kadagiti bersikulo 18–20 ken 40–44 tapno maammuan no ania ti napasamak kas bungana. (Ilawlawag a gapu ta sinurot dagiti tao idi agangay ti pammagbaga ni Pablo nga agtalinaed iti barko, awan ti natay iti pannakadadael ti barko; kitaen dagiti bersikulo 30–32.) Ania ti masursurotayo manipud iti daytoy a padas maipanggep iti panangsurot iti propeta?

• Mangitugot iti kallabes a mensahe iti komperensia ti Presidente ti Simbaan ken ibinglay kadagiti ubbing ti ania man a ballaag wenno pammagbaga nga intedna. Awisem dagiti ubbing a mangpanunot kadagiti wagas a pakasurotanda iti propeta.

• Ipabuyam ti video a “Blessed and Happy Are Those Who Keep the Commandments of God” (ChurchofJesusChrist.org). Kasano a maipada dagiti propeta iti tao nga addaan kadagiti largabista?

icon iti panagsursuro

Yallukoy ti Panagsursuro iti Pagtaengan

Idawatmo kadagiti ubbing a mangusar no ania ti nasursuroda maipapan ken ni Pablo a mangallukoy iti pamiliada nga agadal kadagiti kallabes unay a mensahe ti propeta ken ilawlawag no kasano a masurotda ti balakadna.

Panangpadur-as iti Panangisurotayo

Iraman dagiti panagrikna. “Kaaduan kadagiti ubbing (ken nataengan) ti makasursuro a naimbag no mairaman dagiti adu a panagrikna. Mangsapul kadagiti wagas a pakatulongan dagiti ubbing a mangusar kadagiti panagriknada iti panagkita, panagdengngeg, ken panagsagid kabayatan ti panagsursuroda. Iti sumagmamano a situasion, mabalinmo a sapulen dagiti wagas a mairaman dagiti panagriknada iti panagangot ken panagraman!” (Panangisuro iti Wagas ti Mangisalakan, 25).

panid ti aktibidad: Situtured a makaibinglayak iti pammaneknekko ken ni Jesucristo