Hulio 24–30

Dagiti Aramid 16–21

“Inawagannatayo ti Apo a Mangikasaba iti Ebanghelio”

Kalpasan ti panangbasam iti Dagiti Aramid 16–21, surotem dagiti parikna ti Espiritu ken ibilangmo dagiti kapanunotan iti daytoy a balabala bayat ti panagsaganam a mangisuro. Konsultaen ti “Panangipaay iti Kasapulan dagiti In-inaudi nga Ubbing” iti daytoy a pagbasaan para iti nayon a tulong.

Yawis ti Panagbibinninglay

Awisem dagiti ubbing a mangibaga kenka no ania ti ammoda maipanggep iti padpadas ni Pablo iti panangibinglay iti ebanghelio. Mabalinda pay nga isarita maipapan kadagiti dadduma pay a misionario nga ammoda wenno maipapan iti bukodda a padpadas iti panangibinglay iti ebanghelio iti maysa a tao.

Isuro ti Doktrina: In-inaudi nga Ubbing

Dagiti Aramid 16:25–34

Isuro dagiti misionario dagiti tao maipapan ken ni Jesus.

Ammo kadi dagiti ubbing a sursuruam no ania ti aramiden dagiti misionario? Kasano a matulongam dagiti ubbing a makaawat a mabalinda ti mangibinglay ti ebanghelio kadagiti dadduma?

Dagiti Mabalin nga Aktibidad

• Tulongam dagiti ubbing a mangyakem iti Dagiti Aramid 16:25–34 kabayatan ti pananggupgopmo iti pakaammuan da Pablo ken Silas a nangibingbinglay iti ebanghelio iti pagbaludan (kitaen met iti “Kapitulo 61: Da Pablo ken Silas iti Pagbaludan,” Dagiti Estoria iti Baro a Tulag, 158–60, wenno ti maitutop a video iti ChurchofJesusChrist.org). Ilawlawag a dagiti misionario ita nga agdama ket mangisursuro met kadagiti tao maipapan ken ni Jesus ket tulonganda ida nga agsagana nga agpabuniag.

• Mangaramid iti missionary name tags nga usaren dagiti ubbing, ket tulongam ida a mangisurat iti naganda iti tag. Isurom kadagiti ubbing dagiti simple a palawag ti doktrina a mabalinda nga ibinglay kadagiti sabali, kas iti “Maysaak nga anak ti Dios,” “Makisasao ti Dios babaen ti sibibiag a propeta,” wenno “Ni Jesucisto ti Mangisalakantayo.” Palagipam dagiti ubbing nga awanantayo iti tag ti nagan ti misionario tapno ibinglay ti ebaghelio iti dadduma.

Dagiti Aramid 17:10–12

Paneknekan dagiti nasantuan a kasuratan ti Nailangitan nga Ama ken ni Jesucristo.

Nupay sumagmamano kadagiti ubbing a sursuruam ti saan pay a makabasa, mabalinmo a tulongan ida a mangpadur-as iti ayatda kadagiti nasantuan a kasuratan ket kitaem no kasanoda nga agpaneknek maipapan iti Mangisalakan.

Dagiti Mabalin nga Aktibidad

• Tulongam ti maysa kadagiti ubbing a mangbasa iti ragup ti balikas nga “Inaldaw a sinuksukimatda dagiti nasantuan a kasuratan” (Dagiti Aramid 17:11). Awisem dagiti ubbing a mangitudo iti tunggal aldaw ti lawas iti maysa a kalendario kabayatan ti panangulitda iti daytoy a ragup ti balikas kenka. Aggigiddan nga agkansion iti maysa a kanta a mangisuro maipapan kadagiti bendision ti panagbasa iti nasantuan a kasuratan, kas iti “Search, Ponder, and Pray” (Children’s Songbook, 109).

• Tapno maisurom kadagiti ubbing a dagiti nasantuan a kasuratan ti mangipaneknek iti Nailangitan nga Ama ken ni Jesucristo, tulongam ida a manglukib iti maysa a kapitulo iti nasantuan a kasuratan, kas iti Dagiti Aramid 17 wenno 18, ken saraken dagiti balikas a Dios, Apo, wenno Jesus. Mabalin a kayatmo a markaan dagitoy a balikas tapno nalaklaka a masarakan dagiti ubbing dagitoy. Tunggal kanito a makasarakda iti maysa kadagitoy a balikas, awisem ida a mangibinglay iti maysa a banag nga ammoda maipanggep ti Nailangitan nga Ama ken ni Jesucristo.

Dagiti Aramid 17:22–31

Maysaak nga anak ti Dios.

Iti Turod ti Mars, insuro ni Pablo dagiti kangrunaan a kinapudno maipanggep iti kinatao ti Dios, mairaman dagiti kinapudno a datayo dagiti annakna ken Isu ket “saan nga adayo iti tunggal maysa kadatayo” (Dagiti Aramid 17:27). Kasano a matulongam dagiti ubbing a makarikna nga asidegda iti Nailangitan nga Amada?

Dagiti Mabalin nga Aktibidad

• Awisem dagiti ubbing a mangulit iti ragup ti balikas a “Kaputotannatayo ti Dios” (Dagiti Aramid 17:29, ket ilawlawagmo a ti putot kayatna a sawen dagiti ubbing. Iburaymo ti pammaneknekmo iti tunggal ubing, saggaysa, nga isu ket anak ti Dios. Awisem ida a mangiburay no ania ti mariknada maipapan iti Nailangitan nga Amada.

• Mangipakita kadagiti ladawan dagiti ubbing a kaduada dagiti pamiliada (no mabalin, iramanmo dagiti ladawan dagiti ubbing iti klasem). Idawatmo kadagiti ubbing a mangitudo kadagiti nagannak kadagiti ladawan. Ilawlawag nga annakdatayo dagiti inna ken ammatayo, ket espiritu nga annaknatayo amin dagiti nailangitan a nagannaktayo.

• Agkansion iti maysa a kanta maipapan iti Nailangitan nga Ama, kas iti “I Know My Father Lives” (Children’s Songbook, 5). Babaen iti tulong dagiti ubbing, mangisurat kadagiti balikas wenno mangidrowing kadagiti ladawan iti pisarra a mangibagi kadagiti banag a masursurotayo maipapan iti Nailangitan nga Ama manipud iti kanta.

• Ibasam kadagiti ubbing dagitoy a balikas manipud iti Dagiti Aramid 17:27: “Saan nga adayo iti tunggal maysa kadatayo.” Isaritam maipapan kadagiti panawen idi nariknam nga asidegka iti Nailangitan nga Ama, ket awisem dagiti ubbing nga aramidenda met daytoy.

Maysa nga anak ti Dios ti tunggal tao.

Isuro ti Doktrina: In-inauna nga Ubbing

Dagiti Aramid 16:14–15, 25–34; 18:7–8, 24–28

Makapagbalinak a maysa a misionario ita.

Kasano a matulongam dagiti ubbing nga agbalin a kas ken ni Pablo ken mangibinglay iti dadduma no ania ti masursuroda maipapan iti ebanghelio?

Dagiti Mabalin nga Aktibidad

• Awisem dagiti ubbing a mangbasa iti Dagiti Aramid 16:14–15, 25–34; 18:7–8, 24–28 ket mangilista kadagiti tao a nangibinglayan da Pablo ken Apolo iti ebanghelio. Kalpasanna awisem ida a mangilista kadagiti tao a pakaibinglayanda iti ebanghelio. Payakem kadagiti ubbing no kasano a maibagada kadagitoy a tao maipapan ken ni Jesucristo wenno mangawis kadakuada iti simbaan. Mabalin pay nga awisem dagiti ubbing nga agsurat iti note a mangiburburay iti pammaneknekda iti kinapudno ti ebanghelio kadagitoy a tao.

• Awisem dagiti agdama a full-time a misionario, nagsublin a misionario, wenno dagiti misionario iti ward a mangsarungkar iti klase ket mangisarita maipapan kadagiti padasda iti panangibinglay ti ebanghelio. Allukoyem dagiti ubbing nga agdamag kadagiti saludsod maipapan no kasano a maibinglayda ti ebanghelio iti dadduma.

Dagiti Aramid 17:2–4, 10–12; 18:28

Paneknekan dagiti nasantuan a kasuratan ni Jesucristo.

Paneknekan amin dagiti propeta ni Jesucristo. Kasano a maisurom dagiti ubbing a mangsapul Kenkuana kadagiti nasantuan a kasuratan, uray no saan a nadakamat ti naganna?

Dagiti Mabalin nga Aktibidad

• Pagbasaem dagiti ubbing iti Dagiti Aramid 17:2–4, 10–12; 18:28, ket awisem ida a mangsapul ti nagpapadaan dagitoy a binatog. Segun kadagitoy a bersikulo, ania ti nakatulong kadagiti tao a mamati iti ebanghelio ni Jesucristo? Awisem dagiti ubbing a mangibinglay kadagiti paggugustoda nga estoria maipapan ken ni Jesus a nasursuroda manipud kadagiti nasantuan a kasuratan.

• Iti babassit a papel, mangisurat kadagiti reperensia iti nasantuan a kasuratan a mangisuro maipapan iti Mangisalakan, (masarakam ti sumagmamano iti Pangiwanwan iti Nasantuan a Kasuratan, “Jesucristo,” scriptures.ChurchofJesusChrist.org). Ilemmengmo dagiti papel iti lawlaw ti siled ket awisem dagiti ubbing a mangbirok kadagitoy. Tulongam dagiti ubbing a mangkita kadagiti reperensia a nasapulanda, ket kiddawem kadakuada a mangibinglay iti tunggal maysa no ania ti isuro ti tunggal nasantuan a kasuratan maipapan ken Jesus.

Dagiti Aramid 17:22–31

Maysaak nga anak ti Dios.

Kasano a matulongam dagiti ubbing a manglaglagip nga annak ida ti Dios?

Dagiti Mabalin nga Aktibidad

• Ipakitam kadagiti ubbing ti maysa a bato, ket ilawlawagmo nga iti aldaw ni Pablo, agdaydayaw idi dagiti tao kadagiti dios nga inaramidda manipud iti bato ken dadduma pay a material. Awisem dagiti ubbing a mangbasa iti Dagiti Aramid 17:27–29. Ania ti masursurotayo maipapan iti Dios manipud kadagitoy a bersikulo? Ilawlawag a ti putot kaipapananna dagiti annak. Kiddawen kadagiti ubbing no ania ti mangiparikna kadakuada a mangammo nga isuda dagiti annak ti Dios.

• Kiddawen kadagiti ubbing a mangbasa iti Dagiti Aramid 17:27. Awisem dagiti ubbing a mangisurat wenno mangidrowing kadagiti ladawan dagiti wagas a mabalinda a “marikna kalpasanna” wenno umas-asideg iti Dios. Kaano a nariknada nga Isu ket “saan nga adayo [kadakuada]”?

Yallukoy ti Panagsursuro iti Pagtaengan

Allukoyem dagiti ubbing a mangsapul iti nasantuan a kasuratan iti daytoy a lawas a mangisuro maipapan ken ni Jesucristo (mabalin a mapasamak daytoy kabayatan ti bukodda a panagadal wenno sangapamiliaan a panagadal iti nasantuan a kasuratan). Iti umay a lawas, awisen ida a mangibinglay no ania ti nasarakanda.

Panangpadur-as iti Panangisurotayo

Tulongam dagiti ubbing nga agbalin a nalalaing nga agad-adal. Ti panggepmo iti panangisurom kadagiti ubbing ket saan laeng a mangibinglay iti kinapudno kadakuada. Nasken a tulongam pay ida a mapadur-asda nga agsapsapul iti kinapudno babaen ti panagpannuray iti bukodda a kabaelan. Kas pagarigan, imbes a simple a panangisaritam kadagiti ubbing ti estoria ni Pablo a mangikaskasaba iti Turod ti Mars, mabalinmo a planuen dagiti aktibidad, kas dagiti naisingasing iti daytoy a balabala, a makatulong kadakuada a mangtakuat kadagiti kinapudno iti estoria para iti bagbagida.