“Hulio 3–9. Dagiti Aramid 1–5: ‘Dakayto ti Saksik’” Umaykayo, Sumurot Kaniak—Para iti Primary: Baro a Tulag 2023 (2022)
“Hulio 3–9. Dagiti Aramid 1–5,” Umaykayo, Sumurot Kaniak—Para iti Primary: 2023
Aldaw ti Pentecostes, ni Sidney King
Hulio 3–9
Dagiti Aramid 1–5
“Dakayto ti Saksik”
Irugim ti panagsaganam babaen ti panangbasa iti Dagiti Aramid 1–5. Sikakararag nga ikarigatam a maawatan dagiti kasapulan dagiti ubbing a sursuruam. Ti Umaykayo, Sumurot Kaniak—Para kadagiti Indibidual ken Pamilia ken makatulong pay kenka daytoy a balabala.
Yawis ti Panagbibinninglay
Isurat ti Asinoak? iti pisarra. Mangipaay iti sumagmamano a palawag maipapan ken ni Pedro ket saludsodem kadagiti ubbing no siasino ti pakaiturongan dagiti palawag. Ania pay ti ammoda maipapan ken ni Pedro?
Isuro ti Doktrina: In-inaudi nga Ubbing
Idauluan ni Jesucristo ti Simbaanna babaen kadagiti propeta ken apostol.
Ti panagsursuro maipapan no kasano nga indauluan ti Mangisalakan ti nagkauna a Simbaanna babaen kadagiti apostol ket makatulong kadagiti ubbing a makagun-od kadagiti pammaneknek dagiti propeta ken apostol iti aldawtayo.
Dagiti Mabalin nga Aktibidad
-
Ipakita ti sibubukel ti panidna a ladawan manipud iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Saludsodem kadagiti ubbing no apay a kumitkita iti tangatang dagiti tao. Gupgopem iti pakaammo manipud iti Dagiti Aramid 1:1–11. (Kitaen met iti “Kapitulo 55: Idauluan dagiti Apostol ti Simbaan,” iti Dagiti Estoria iti Baro a Tulag, 145–47, wenno ti maitutop a video iti ChurchofJesusChrist.org.) Awisem ti maysa nga ubing a mangiggem iti maysa a ladawan dagiti agdama nga Apostol. Siasino ti mangtulong ken ni Jesucristo a mangidaulo iti Simbaan idi awan Isuna iti daga?
-
Agay-ayam iti maysa a matching game iti dua nga asmang dagiti ladawan ti sibibiag nga Umuna a Panguluen ken ti Sangapulo-ket-dua nga Apostol. No maaramid ti panagparis, ibinglay ti nagan ti Apostol wenno Presidente ken ti maysa a banag maipapan kenkuana.
-
Iti likud ti maysa a ladawan ti Presidente ti Simbaan, ipigket ti babassit a ladawan dagiti banag a mabalin nga isuro ti propeta, kas iti panagbuniag wenno maysa a templo. Pagsisinublatem iti tunggal maysa dagiti ubbing a mangkita iti maysa kadagiti ladawan ken panangibagana kadagiti dadduma iti klase ti, “Isuro kadatayo ti propeta maipapan iti [ti topiko iti ladawan].” Paneknekam nga isuro kadatayo dagiti propeta ken apostol no ania ti kayat ni Jesus a maammuan ken aramidentayo.
Mabalin a bendisionan ti Nailangitan nga Ama dagiti dadduma babaen kaniak.
Ania ti maaramidmo tapno matulongam dagiti ubbing a mangbigbig kadagiti wagas a mabalin a mangbendision kadagiti adda iti aglawlawda? Tulongam ida a makasursuro manipud iti pagwadan da Pedro ken Juan a mangag-agas iti pilay a lalaki.
Dagiti Mabalin nga Aktibidad
-
Awisem dagiti ubbing nga agaramid kadagiti tignay a maigiddan iti estoria iti Dagiti Aramid 3:1–10, kas panangidian kadagiti imada para iti kuarta ken panaglagto gapu iti rag-o. Kasano a binendisionan ti Nailangitan nga Ama iti lalaki a saan a makapagna?
-
Mangitugot iti maysa a supot a naglaon kadagiti ladawan a mangibagi kadagiti wagas a mabalintayo ti mangbendision ken agserbi iti dadduma. Pagsisinnublatem dagiti ubbing iti panangpili kadagiti ladawan manipud iti supot ken panangibinglayda no kasano a mabendisionanda dagiti dadduma iti dayta a wagas.
-
Kiddawem kadagiti ubbing a mangibinglay iti maysa a panawen idi tinulonganda ti maysa a tao.
Makapagbalinak a napudno.
Imbinglay dagiti nagkauna a Kristiano no ania ti adda kadakuada a mangtulong a mangaywan iti tunggal maysa. Inlako dagiti akinkukua ti dagada ken inyawatda ti kuarta kadagiti Apostol, kalpasanna intedda daytoy kadagiti Santo a maibatay kadagiti kasapulanda. Nagulbod da Ananias ken Safira maipapan iti tulong a naitedda, a pampanunotenda a mabalinda nga allilawen dagiti adipen ti Apo.
Dagiti Mabalin nga Aktibidad
-
Tulongam dagiti ubbing a mangyakem ti estoria da Ananias ken Safira. Ilawlawag a nupay saantayo a matay no agulbodtayo, ipakita daytoy nga estoria no kasano ti kinapateg ti panagbalin a napudno iti Nailangitan nga Ama.
-
Aggigiddan nga agkansion iti maysa a kanta maipapan iti kinapudno, kas ti “I Believe in Being Honest” (Children’s Songbook, 149). Tulongam dagiti ubbing a makaawat a ti panagbalin a napudno ket kaipapananna ti kanayon a panangibaga iti kinapudno ken saan a panangala kadagiti banag a kukua ti maysa a tao.
-
Agusar kadagiti papel a supot a sinan-puppet a mangyakem kadagiti simple a situasion a pakapagbalinan a napudno wenno naulbod ti maysa a tao. Kiddawen kadagiti ubbing a tumakder no ti tao ket nagbalin a napudno wenno agtugaw iti suelo no ti tao ket nagbalin a naulbod. Tulongam dagiti ubbing a makaawat no apay a napateg ti agbalin a napudno.
Isuro ti Doktrina: In-inauna nga Ubbing
Idauluan ni Jesucristo ti Simbaanna babaen kadagiti propeta ken apostol.
Kasano a matulongamto dagiti ubbing a sursuruam a makaawat a ti Simbaan ti Mangisalakan ita ket idauluan dagiti propeta ken apostol, kas kadagidi nagkauna a panawen?
Dagiti Mabalin nga Aktibidad
-
Isurat iti pisarra ti Kasano nga idauluan ni Jesucristo ti Simbaan no awan Isuna iti daga? Awisem dagiti ubbing a dumngeg kadagiti sungbat iti saludsod bayat ti panangbasam kadagiti balikas ti Mangisalakan kadagiti Apostol iti Dagiti Aramid 1:8. Tulongam dagiti ubbing a makaawat a nangpili ni Jesus kadagiti propeta ken apostol a mangidaulo iti Simbaan ita, kas iti inaramidna idi punganay.
-
Aggigiddan a basaen ti Dagiti Aramid 1:22–26. Kas maysa a klase, ilasin no kasano nga inawagan dagiti Apostol ti baro nga Apostol.
-
Nasaksakbay, kiddawem iti maysa nga ubing ken ti nagannak kenkuana tapno mangsursuro maipapan iti kaaw-awag nga Apostol (masarakanda ti impormasion maipapan kadagiti Apostol iti “Quorum of the Twelve Apostles,” ChurchofJesusChrist.org). Awisem ti ubing a mangibinglay no ania ti nasursurona iti klase ken, no mabalin, no ania ti kinuna ti Apostol maipapan ti awagna iti umuna a mensahena iti sapasap a komperensia.
Indauluan dagiti Apostol ti Simbaan kalpasan ti yuuli ni Cristo iti langit.
Agpaneknek ti Espiritu Santo iti pusok kadagiti kinapudno ti ebanghelio.
No masursuro dagiti ubbing a mangbigbig no kasano a makisao ti Espiritu Santo kadakuada, maparegtadanto a dumngeg ken agtignay iti pammaregta nga awatenda.
Dagiti Mabalin nga Aktibidad
-
Aggigiddan a basaen ti Dagiti Aramid 2:36–37. Ania ti marikna no ibaga ti Espiritu Santo kadatayo ti maysa a banag iti puspusotayo?
-
Kas maysa a klase, mangaramid iti maysa a poster nga addaan kadagiti balikas nga Anianto ti aramidentayo? iti ngato. I-display ti poster iti tunggal lawas, ken mangnayon kadagiti wagas a mabalin a pakapagtignayan dagiti ubbing iti no ania ti masursuroda iti adalen iti tunggal lawas.
-
Awisem dagiti ubbing a mangbasa iti Dagiti Aramid 2:41–47 ken sapulem dagiti nasayaat a bnag nga inaramid dagiti tao kalpasan a nabuniaganda. Ania dagiti nasayaat a banag a mabalintayo nga aramiden tapno ipakita nga agyamyamantayo iti sagut ti Espiritu Santo a naawattayo idi nabuniagantayo?
Mabalin a bendisionan ti Nailangitan nga Ama dagiti dadduma babaen kaniak.
Kasano a masuruam dagiti ubbing a mabalinda ti mangbendision iti dadduma, uray no awananda ti “pirak ken balitok”? (Dagiti Aramid 3:6). Kasano a matulongam ida a mangkita kadagiti gundaway a makapagserbi iti Dios babaen ti panagserbi iti dadduma? (kitaen iti Mosiah 2:17).
Dagiti Mabalin nga Aktibidad
-
Kiddawem ti maysa nga ubing a mangbasa iti Dagiti Aramid 3:1–10 bayat ti panangyakem dagiti dadduma pay nga ubbing ti estoria. (Para iti tulong, kitaen iti “Kapitulo 56: Agasan ni Pedro ti Lalaki,” Dagiti Estoria iti Baro a Tulag, 148–49, wenno ti maitutop a video iti ChurchofJesusChrist.org.) Mabalinmo pay nga ipabuya ti video a “Peter and John Heal a Man Crippled Since Birth” (ChurchofJesusChrist.org). Kasano a dakdakkel ti bendision nga inawat daytoy a lalaki ngem iti kuarta a kiniddawna?
-
Ipasa ti maysa a supot a naglaon kadagiti sensilio. Bayat ti panangiggem dagiti ubbing iti supot, saludsodem kadakuada no ania ti magatangda iti kuarta. Saludsodem kadagiti ubbing no ania ti nasken nga itedtayo iti dadduma a saan nga aggatad iti kuarta. Awisem ida a mangibinglay no kasano a makatulongda iti dadduma nga umas-asideg iti Mangisalakan—maysa a sagut a saan nga agkasapulan iti kuarta (Dagiti Aramid 3:6).
Yallukoy ti Panagsursuro iti Pagtaengan
Allukoyem dagiti ubbing nga agplano iti maysa a wagas a makapagserbida iti Nailangitan nga Ama babaen ti panangtulong iti maysa a miembro ti pamiliada itoy a lawas.
Panangpadur-as iti Panangisurotayo
Mangyulo iti maysa a nasantuan a kasuratan. Pumili iti maysa a binatog iti nasantuan a kasuratan a panagkunam a makatulong kadagiti ubbing iti klasem, kas iti Dagiti Aramid 2:38 wenno Dagiti Aramid 3:19, ken tulongam ida a mangyulo iti ragup ti balikas manipud iti nasantuan a kasuratan. Makatulong dagiti pangtulong a ladawan wenno tignay kadagiti ubbing iti panagkumitda a mangyulo kadagiti nasantuan a kasuratan.