Hulio 17–23

Dagiti Aramid 10–15

“Ti Sao ti Apo Nagtuloy a Rimmang-ay”

Adalen ti Dagiti Aramid 10–15 a sikakararag , a pampanunoten maipapan dagiti ubbing iti klasem. Ania dagiti kinapudno a masarakam kadagitoy a kapitulo a mariknam a naparegtaka nga isuro kadagiti ubbing?

Yawis ti Panagbibinninglay

Tapno matulongan dagiti ubbing a mangibinglay no ania ti masursuro ken mapadpadasanda, mabalin a kiddawem kadakuada a mangibinglay kadagiti banag nga ar-aramidenda tapno maipakita a mamatida ken ni Jesucristo.

Isuro ti Doktrina: In-inaudi nga Ubbing

Dagiti Aramid 10:34–35

Ay-ayaten ti Nailangitan nga Ama ti amin nga annakna.

Ti kangrunaan a kinapudno a maawatan uray dagiti babassit nga ubbing ket anak ti Dios ti tunggal maysa ken ay-ayatenna ti amin nga annakna.

Dagiti Mabalin nga Aktibidad

• Ipakita ti ladawan a Ni Cristo ken dagiti Ubbing Manipud iti intero a Lubong (Libro ti Arte ti Ebanghelio, num. 116) bayat ti panangbasam iti Dagiti Aramid 10:34–35. Ilawlawag nga iti panawen ni Pedro namati ti sumagmamano a tao a saan a para iti amin a tao dagiti bendision ti ebanghelio. Naammuan ni Pedro nga ay-ayaten ti Dios ti amin nga annakna ken kayatna amin ida nga agsursuro iti ebanghelio.

• Awisem dagiti ubbing nga agdrowing iti ladawan ti bagbagida. Bayat ti panangibinglayda kadagiti ladawanda, isaritam maipapan iti maysa a banag a magustuam iti tunggal ubing. Ibinglaymo ti pamaneknekmo a ti Nailangitan nga Ama ket ay-ayatenna iti tunggal maysa kadakuada ken ti amin nga annakna, ania man ti langada wenno sadino ti naggapuanda.

• Makipagkansion kadagiti ubbing iti maysa a kanta maipapan iti panagayat iti dadduma—kas pagarigan “I’ll Walk with You” (Children’s Songbook, 140–41). Awisem dagiti ubbing a mangibinglay kadagiti wagas a pakaipakitaanda iti ayat iti tunggal maysa, kas met laeng iti inaramid ni Jesus.

• Itudo a saggaysa dagiti ubbing ket isao ti, “Ay-ayaten ti Nailangitan nga Ama ni [nagan].” Pagsisinnublatem dagiti ubbing a mangitudo iti tunggal maysa ken isaoda daytoy a ragup ti balikas.

Dagiti Aramid 11:26

Maysaak a Kristiano gapu ta mamatiak ken surotek ni Jesucristo.

Kasano a matulongamto dagiti ubbing a makasursuro no ania ti kayat a sawen ti agbalin a maysa a Kristiano?

Dagiti Mabalin nga Aktibidad

• Ibasam ti Dagiti Aramid 11:26 kadagiti ubbing, ket awisem ida a tumakder no mangngegda nga isaom ti balikas a Kristiano. Kiddawen kadagiti ubbing a mangibinglay iti panagkunada a kaipapanan ti agbalin a Kristiano. Ilawlawag a ti maysa a tao a mamati ken sumurot ken ni Jesucristo ket maawagan iti Kristiano, isu a Kristianotayo.

• Makipagkansion kadagiti ubbing ti maysa a kanta maipapan ken ni Jesucristo, kas iti “I Feel My Savior’s Love” (Children’s Songbook, 77). Kasano a maipakitatayo a pasurrottayo ni Jesucristo ket kamengtayo ti Simbaanna? Tulongam dagiti ubbing a mangpanunot kadagiti banag a maaramidda a mangsurot ken ni Jesus iti pagtaengan, iti simbaan, ken iti pagadalan, ken iti dadduma pay a lugar.

Ay-ayatennatayo ken sungbatanto ti Nailangitan nga Ama dagiti kararagtayo.

Dagiti Aramid 12:1–17

Denggen ken sungbatan ti Nailangitan nga Ama dagiti kararag.

Ti pakaammuna ti anghel a mangwayawaya ken ni Pedro iti pagbaludan ket nabileg a mangisuro a sungbatan ti Nailangitan nga Ama dagiti kararag.

Dagiti Mabalin nga Aktibidad

• Awisem dagiti ubbing a mangyakem iti pakaammuan ni Pedro a mawayawayaan iti pagbaludan iti Dagiti Aramid 12:1–17 bayat ti pananggupgopmo iti estoria. Kasano a sinungbatan ti Nailangitan nga Ama ti kararag dagiti mangikarkararag ken ni Pedro?

• Kansionen ti maysa a kanta maipapan iti kararag—kas pagarigan, “We Bow Our Heads” (Children’s Songbook, 25)—ken isingasing dagiti tignay a maigiddan kadagiti balikas a makatulong kadagti ubbing a makasursuro no kasano ti agkararag. Awisen dagiti ubbing a mangibinglay iti pagarigan dagiti banag a mabalinda a pagyamananan iti Nailangitan nga Ama ken ti idawatda Kenkuana iti kararag.

• Ipakitam dagiti ladawan ti tattao nga agkarkararag (kitaen, kas pagarigan, iti Libro ti Arte ti Ebanghelio, num.111–12) bayat ti panangibinglaymo iti maysa a padas idi sinungbatan ti Nailangitan nga Ama dagiti kararagmo.

Isuro ti Doktrina: In-inauna nga Ubbing

Dagiti Aramid 10:34–35; 15:6–11

“Ti Dios saan a mangidumduma kadagiti tao.”

Kasapulan dagiti ubbing a sursuruam a maawatanda nga ay-ayaten ti Nailangitan nga Ama ti amin nga annakna, ania man ti langada, sadino ti naggapuanda, wenno ania man dagiti pili nga aramidenda.

Dagiti Mabalin nga Aktibidad

• Saludsodem kadagiti ubbing no maibagada no ania ti kalalanga ti maysa a tao babaen laeng iti panangkita kadakuada wenno panangpugto no sadino ti naggapuanda. Segun iti Dagiti Aramid 10:35, kasano nga ikeddeng ti Dios no ti maysa a tao ket “makaay-ayo kenkuana”?

• Basaen ti Dagiti Aramid 10:34–35; 15:6–11 kadagiti ubbing. Ilawlawag nga iti panawen ni Pedro, namati dagiti Judio a saan nga awaten ti Dios dagiti tao a saan a Judio (maawagan dagitoy a tao iti Gentil). Ngem insuro ti Dios ni Pedro nga ay-ayaten ti Dios dagiti amin nga annakna, agpada a Judio ken Gentil. Aggigiddan a mangkanta ti “I Am a Child of GodChildren’s Songbook, 2–3). Awisem dagiti ubbing a mangsukat iti nagan ti tunggal maysa kadagiti balikas a kas iti Siak wenno kaniak.

• Awisem dagiti ubbing a mangibinglay iti maysa a banag a naidumduma maipapan ti maysa a tao iti klase. Ilawlawag a ti palawag a “Ti Dios awan ti idaddadumana a tattao” kaipapananna nga ay-ayaten ti Nailangitan nga Ama ti amin nga annakna, ket gapu ta ay-ayatena ida, kayatna a dumngeg ti amin nga annakna iti ebanghelio.

Dagiti Aramid 11:26

Kristiano ti maysa a tao a mamati ken sumurot ken ni Jesucristo.

Kasano a matulongam dagiti ubbing a makaawat a dagiti balikas ken tignayda ti mangipakita a Kristianoda?

Dagiti Mabalin nga Aktibidad

• Awisen dagiti ubbing a mangbasa iti Dagiti Aramid 11:26; 3 Nephi 27:3–8; ken Ti Doktrina ken Katulagan 115:4. Isurat ti Kristiano iti pisarra ken ugedan ti paset a mangisao iti “Cristo.” Kiddawen kadagiti ubbing a mangibinglay no ania iti panagkunada ti kaipapanan ti agbalin a Kristiano.

• Kiddawen kadagiti ubbing a manginagan iti nadumaduma a grupo a nakaikamanganda, kas iti pamilia wenno pagilianda. Awisen ida a mangibinglay kadagiti gapu no apay nga agyamyamanda iti panagbalinda a Kristiano ken panagkamengda iti Ti Simbaan ni Jesucristo dagiti Santo iti Ud-udina nga Aldaw. Kasano a maipakitatayo iti dadduma a Kristianotayo?

• Ipakita dagiti sumagmamano a banag wenno ladawan a mangibagi kadagiti kinapudno a naidumduma ti Simbaan ni Jesucristo, kas iti maysa a ladawan ti pannakaisubli ti priesthood (kitaen iti Libro ti Arte ti Ebanghelio, dagiti num. 93–94). Kiddawen iti maysa nga ubing a mangala iti maysa kadagiti banag wenno ladawan ket iladawanna no kasano a bendision daytoy iti Simbaantayo. Ilawlawag nga idinto a kameng iti nadumaduma a simbaan dagiti Kristiano iti intero a lubong, kamengtayo iti isu met la a Simbaan a binangon ni Jesucristo iti daga.

• Ipabuya ti video a “True Christianity” (ChurchofJesusChrist.org). Awisem dagiti ubbing a mangisurat wenno mangidrowing kadagiti banag a mabalinda nga aramiden tapno agbalin a pudno a Kristiano.

Dagiti Aramid 12:1–17

No agkararagtayo a sipapammati, sungbatanto ti Nailangitan nga Ama.

Utoben maipapan kadagiti panawen idi sinungbatan ti Nailangitan nga Ama dagiti kararagyo. Kasano a mausarmo dagitoy a padas a mangisuro kadagiti ubbing a denggen ken sungbatanto ti Nailangitan nga Ama dagiti kararagda iti bukodna a wagas ken panawen?.

Dagiti Mabalin nga Aktibidad

• Awisem dagiti ubbing a mangyakem iti estoria maipapan iti anghel a nagparuk-at ken ni Pedro manipud iti pagbaludan iti idinto a basaen ti sabali pay nga ubing ti estoria iti Dagiti Aramid 12:1–17.

• Saludsoden kadagiti ubbing no ania iti panagkunada ti kaipapanan ti “nagkarkararag a sipapasnek” (Dagiti Aramid 12:5). Kasano a nasungbatan ti kararag dagiti tao? Awisen dagiti ubbing a mangibinglay kadagiti padas a nakasungbatan ti Nailangitan nga Ama ti bukod wenno sangapamiliaan a kararag. Mabalinmo nga ibinglay ti maysa a padas a nangsungbatanna iti kararagmo. Mabalinmo nga iraman dagiti padas a dimtengan ti sungbat iti maysa a saan a ninamnama a wagas. Paneknekan nga ay-ayatennatayo ti Dios ken sungbatannanto dagiti kararagtayo iti wagas ken panawenna a kasayaatan para kadatayo.

Yallukoy ti Panagsursuro iti Pagtaengan

Awisem dagiti ubbing nga agaramid iti maysa a banag a mangipalagip kadakuada maipapan iti nasursuroda ita nga aldaw, kas iti maysa a palagip nga agkararag.

Panangpadur-as iti Panangisurotayo

Paneknekam maipapan kadagiti naikari a bendision. No awisem dagiti ubbing iti Primary a mangtungpal ti maysa a masinunuo a pagbatayan, mangibinglay kadagiti kari nga inaramid ti Dios para kadagiti agtungpal iti dayta a pagbatayan. Kas pagarigan, mabalinmo a paneknekam maipapan kadagiti naikari a bendision a naawatmo bayat ti panagkararagmo a sipapammati.