Ni Pablo a nadalupo iti daga

Kumbersion iti Dalan nga Agturong iti Damasco, ni Michelangelo Merisi da Caravaggio

Hulio 10–16

Dagiti Aramid 6–9

“Ania ti Rebbeng nga Ipaaramidmo Kaniak?”

Irugi babaen ti panangbasa iti Dagiti Aramid 6–9. Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket makatulong kenka nga agadal kadagitoy a kapitulo. Dagiti aktibidad para kadagiti in-inaudi nga ubbing iti daytoy a balabala ket mabalin a maibagay kadagiti in-inauna nga ubbing, ken vice versa.

icon iti panagbibinninglay

Yawis ti Panagbibinninglay

Isurat iti pisarra dagiti nagan ti sumagmamano kadagiti tao manipud iti Dagiti Aramid 6–9, kas kada Saul, Esteban, ken Tabita. Awisem dagiti ubbing a mangibinglay iti ania man a banag nga ammoda maipapan kadagitoy a tao.

icon iti panangisuro

Isuro ti Doktrina: In-inaudi nga Ubbing

Dagiti Aramid 6–7

Masurotko ni Jesucristo babaen iti panangitakder iti kinalinteg.

Ania ti masursuro dagiti ubbing manipud ken ni Esteban maipapan iti panagbalin a maysa a pasurot ni Jesucristo?

Dagiti Mabalin nga Aktibidad

• Tulongam dagiti ubbing a mangparnuay kadagiti tignay a maigiddan iti maysa a kanta maipapan iti panagpili iti umno, kas iti “Stand for the Right” (Children’s Songbook, 159). Usarem ti Dagiti Aramid 7:51–60 a mangisarita kadagiti ubbing a nangisuro ni Esteban maipapan ken ni Jesucristo, uray no daytoy ti nagpungtotan unay dagiti lider a Judio (kitaen met iti “Kapitulo 57: Pinatay dagiti Nadangkes a Lallaki ni Esteban,” iti Dagiti Estoria iti Baro a Tulag, 150–51, wenno ti maitutop a video iti ChurchofJesusChrist.org). Kasano nga intakder ni Esteban ti kinalinteg?

• Ited kadagiti ubbing ti sumagmamano a senario dagiti ubbing nga agaramid iti maysa a pili iti umno ken biddut. Kiddawen kadagiti ubbing no ania ti aramidenda a mangitakder iti umno.

Dagiti Aramid 8:26–39

Paregtaennak ti Espiritu Santo a mangibinglay iti ebanghelio iti dadduma.

Sinurot ni Felipe dagiti pannignay ti Espiritu ken tinulonganna ti lalaki a taga Etiopia a mangikarkarigatan a makaawat kadagiti nasantuan a kasuratan. Ania dagiti adalen iti daytoy nga estoria a nasursuro dagiti ubbing a sursuruam?

Ni Felipe a mangisursuro iti taga Etiopia

Ni Felipe a Mangisursuro iti taga Etiopiani Robert T. Barrett

Dagiti Mabalin nga Aktibidad

• Guyodem nga aggiddan ti dua a tugaw tapno makaaramid ti maysa a karuahe. Awisem ti dua nga ubbing nga agtugaw iti karuahe, maysa a mangibagi ken ni Felipe ket ti sabali mangibagi iti lalaki a taga Etiopia. Kalpasanna isaritam ti estoria no kasano nga insuro ni Felipe ti ebanghelio iti lalaki manipud iti Etiopia.

• Ibinglaymo ti maysa a padas a nakariknaam nga imbaga kenka ti Espiritu Santo nga ibinglaymo ti ebanghelio iti maysa a tao. Paneknekam a matulongannatayo ti Espiritu Santo a mangibaga iti dadduma maipapan ken ni Jesus.

Dagiti Aramid 9:1–20

Awisennak ti Nailangitan nga Ama nga agbabawi ken agbalbaliw.

Idi imbaga ni Jesus ken ni Saul nga agsardeng iti panangidaddadanes iti Simbaan ti Apo, dagus a nagbabawi ken nagbalbaliw ni Saul. Kasano a makatulong daytoy a pakaammo kadagiti ubbing a sursuruam nga agtarigagay nga agbalbaliw a dagus no nakaaramidda iti biddut?

Dagiti Mabalin nga Aktibidad

• Gupgopem ti estoria ti kumbersion ni Saul, a masarakan iti Dagiti Aramid 9:1–20 (kitaen met iti “Kapitulo 59: Sursuruen ni Saul ti maipapan ken ni Jesus,” iti Dagiti Estoria iti Baro a Tulag, 154–55, wenno ti maitutop a video iti ChurchofJesusChrist.org).

• Kasaritam dagiti ubbing maipapan kadagiti banag nga agbalbaliw, a kas iti maysa a bayyek, nga agbalbaliw nga agbalin a maysa a tukak, wenno maysa a katerpilar, nga agbalbaliw nga agbalin a maysa a kulibangbang. Mangipakita kadagiti ladawan, no mabalin. Kasano a nagbalbaliw ni Saul idi sumarungkar kenkuana ni Jesucristo?

• Mangidrowing iti nagkurba a kalsada iti pisarra. Awisem dagiti ubbing a manginagan kadagiti lugar a kayatda a sarungkaran, ket isurat daytoy iti tuktok ti maysa a kalsada. Ania ti mapasamak no agturongtayo iti biddut a kalsada? Kasano a maipada ti panagbabawi iti panagsubli iti umno a kalsada?

• Kiddawen kadagiti ubbing a mangulit no ania ti kinuna ni Saul iti Apo: “Ania ti rebbeng nga ipaaramidmo laniak?” (Dagiti Aramid 9:6). Ania ti kayat ti Apo nga aramidentayo?

icon iti panangisuro

Isuro ti Doktrina: In-inauna nga Ubbing

Dagiti Aramid 6–7

Agbalinakto a saksi ni Jesucristo.

Kasano a matulongam dagiti ubbing a sursuruam a makasursuro manipud iti pagwadan ni Esteban iti panagtakder a kas maysa a saksi ni Jesucristo?

Dagiti Mabalin nga Aktibidad

• Basaen ti Dagiti Aramid 6:5–15 ken 7:51–60 kadagiti ubbing. Ania ti nangaramid ken ni Esteban a kasta a maysa a nabileg a saksi ni Jesucristo? Awisem ti maysa wenno ad-adu pay nga ubbing nga agpammarang nga isuda ni Esteban ken ibinglayda no apay a patienda ni Jesucristo.

• Awisem dagiti ubbing a basaenda ti Dagiti Aramid 6:3–10, a mangsukisok kadagiti kababalin ni Esteban a nakatulong kenkuana a dumur-as.

• Kiddawen kadagiti ubbing a mangtulong kenka a mangpanunot kadagiti situasion a mabalin a pakapagtakderanda kas saksi ni Jesucristo ken ti ebangheliona. Tulongam ida a mangyakem kadagiti sumagmamano a situasion. Kiddawen kadagiti ubbing a mangbasa iti Mosiah 18:9. Ilawlawag a ti panagbalin a maysa a saksi ni Jesucristo ket mairaman kadagiti kari nga inaramidtayo iti panagbuniag.

Dagiti Aramid 8:9–24

Maysa a di magatadan a sagut ti priesthood a naggapu iti Dios.

Itandudo ni Satanas ti mensahe a mangyeg kadatayo iti ragsak dagiti material a banag. Kasano a mausarmo ti estoria ni Simon tapno matulongam dagiti ubbing a mangipateg kadagiti banag a naespirituan kas iti priesthood ken dagiti bendisionna?

Dagiti Mabalin nga Aktibidad

• Gupgopem ti estoria ni Simon a masarakan iti Dagiti Aramid 8:9–24 (kitaen met iti “Kapitulo 58: Ni Simon ken ti Priesthood,” iti Dagiti Estoria iti Baro a Tulag, 152–53, wenno ti maitutop a video iti ChurchofJesusChrist.org). Apay a saantayo a makaawat iti priesthood babaen ti pananggatang iti daytoy? Kasano a pudno nga awaten ti maysa a tao ti turay ti priesthood? (kitaen iti Pagannurotan ti Pammati 1:5).

• Ipakitam dagiti ladawan ti sakramento, maysa a templo (a mangibagi kadagiti bendision ti templo), panagbuniag, ken dadduma pay a bendision nga awatentayo babaen ti priesthood. Ilawlawag a dagitoy a sagut a naggapu iti Dios ket saan a mabalin a magatang iti kuarta. Apay a napatpategda ngem iti ania man a banag a mabalin a gatangen? Kasano nga awatentayo dagitoy a bendision?

Dagiti Aramid 9:1–20

Awisennak ti Nailangitan nga Ama nga agbabawi ken agbalbaliw.

Idi imbaga ni Jesus ken ni Saul nga agsardeng iti panangidaddadanes iti Simbaan ti Apo, dagus a nagbabawi ken nagbalbaliw ni Saul. Kasano a makatulong daytoy a pakaammuan kadagiti ubbing a sursuruam nga agtarigagay nga agbalbaliw a dagus no agaramidda iti maysa a biddut?

Dagiti Mabalin nga Aktibidad

• Awisem dagiti ubbing a mangkulpi iti maysa a papel iti kagudua. Kiddawem nga isuratda ti Sakbay iti kagudua ken Kalpasan iti sabali pay a kagudua. Basaen kadagiti ubbing ti Dagiti Aramid 8:1–3; 9:1–2; ken 9:17–22, ket idawatmo kadakuada a mangisurat kadagiti balikas wenno ragup ti balikas a mangiladawan ken ni Saul sakbay ken kalpasan a nakitana ti Apo.

• Awisem ti maysa a miembro ti ward a mangibinglay ti estoria ti kumbersionna ken no kasano a nagbalbaliw ti biagna a kas met iti panagbalbaliw ti biag ni Saul.

• Mangidrowing iti maysa a “kalsada nga agturong iti Damasco” iti pisarra. Awisem dagiti ubbing a mangbasa iti Dagiti Aramid 9:6, 11, 18, 20–22, a mangsuksukisok no ania ti inaramid ni Saul a nagbabawi ken nagsubli ken ni Cristo, ket isurat dagitoy a tignay iti panagturong iti kalsada. Ania ti masursurotayo manipud ken ni Saul maipapan no kasano a makapagbalintayo nga ad-adda pay a kas ken ni Cristo?

• Awisem dagiti ubbing a mangidrowing iti paggugustodda a paset ti pakaammuan maipapan iti kumbersion ni Saul ken ibinglay dagiti drowingda iti klase.

icon iti panagsursuro

Yallukoy ti Panagsursuro iti Pagtaengan

Allukoyem dagiti ubbing a mangisarita iti pamiliada ti paggugustoda nga aktibidad manipud iti klase ita ken no ania ti naisuro kadakuada daytoy.

Panangpadur-as iti Panangisurotayo

Tulongam dagiti ubbing nga agsursuro manipud kadagiti nasantuan a kasuratan. Mabalin a saan unay a kabaelan dagiti inaudi nga ubbing ti agbasa, ngem mabalinmo latta nga iraman ida iti panagsursuro manipud kadagiti nasantuan a kasuratan. No dadduma, mabalinmo a basaen ti maysa a binatog ket awisem ida nga agtakder wenno ingato ti imada no mangngeganda ti naipangruna a balikas wenno ragup ti balikas a kayatmo a pangipamaysaan iti pasnekmo.

panid ti aktibidad: no agaramidak iti maysa a biddut, awisennak ti Nailangitan nga Ama nga agbabawi ken agbalbaliw