Kapitulo 57

Patayen dagiti Nadangkes a Lallaki ni Esteban

Impagarup ti adu a dadaulo a Judio a maisardeng dagiti milagro no matay ni Jesus. Nupay kasta, nagaramid met dagiti Apostol kadagiti milagro. Adu dagiti tao a namati ken ni Jesucristo ket nagkamengda iti Simbaan.

Dagiti Aramid 4:1–4, 13–16; 5:14

Daytoy ti namagpungtot kadagiti dadaulo a Judio. Impupokda da Pedro ken Juan iti pagbaludan. Pinapatay ni Ari Herodes Agrippa ni Apostol Santiago.

Dagiti Aramid 4:3; 12:1–2

Nangawag dagiti Apostol iti pito a lallaki a tumulong a mangidaulo iti Simbaan. Maysa ti nalinteg a lalaki nga agnagan iti Esteban. Insurona ti ebanghelio iti adu a tattao. Nagulbod ti sumagmamano a nadangkes a tao ket kinunada a nagsao ni Esteban iti maibusor iti linteg ti Judio. Innalada isuna tapno usigen dagiti dadaulo a Judio.

Dagiti Aramid 6:3–12

Imbaga ni Esteban kadagiti dadaulo a nadangkesda. Kinunana a pinatayda ni Jesucristo, ti Anak ti Dios.

Dagiti Aramid 7:51–54

Kalpasanna timmangad ni Esteban iti langit ket nakitana ti Nailangitan nga Ama ken ni Jesucristo. Idi imbagana kadagiti dadaulo no ania ti nakitana, nagpungtotda unay.

Dagiti Aramid 7:55–56

Innalada nga inruar ni Esteban iti siudad tapno patayenda babaen ti pananguborda iti bato kenkuana. Inyaplagda dagiti pagan-anayda iti sakaanan ti maysa a baro nga agnagan iti Saulo. Idi matmatayen ni Esteban, indawatna iti Dios nga alaenna ti espirituna iti langit. Indawatna pay iti Dios a pakawanenna dagiti tao a mangpatpatay kenkuana. Kalpasanna natayen isuna.

Dagiti Aramid 7:58–60