Kapitulo 24
Nagungar manipud iti Patay ti Anak a Babai ni Jairo
Maysa nga aldaw ni Jairo, maysa nga agturay ti maysa a sinagoga, nagparintumeng iti sakaanan ti Mangisalakan.
Kinuna ni Jairo a masakit unay ti anakna a babai nga agtawen iti 12. Impakaasina ken ni Jesus a mapan ken mangbendision kenkuana. Namati isuna a mapaimbag ni Jesus ti anakna.
Nagrugi a sinurot ni Jesus ni Jairo nga agawid, ngem nagsardeng Isuna tapno mangagas iti maysa a babai. Bayat ti pannakisaritana kenkuana, dimteng ti maysa a tao a nangibaga ken ni Jairo a naladaw unayen—natayen ti anakna a babai.
Nangngeg ni Jesus no ania ti kinunana. Imbagana ken ni Jairo a saan nga agbuteng ngem ketdi mamati Kenkuana.
Kalpasanna kimmuyog ni Jesus ken ni Jairo iti balay ni Jairo. Napno iti tattao ti balay nga agsangsangit gapu iti ipapatay ti bassit nga ubing a babai.
Imbaga ni Jesus kadakuada a saan a natay ti ubing a babai ngem matmaturog. Nagkatawa dagiti tao Kenkuana. Siguradoda a natayen ti ubing.
Pinapanaw ti Mangisalakan ti amin iti balay malaksid kadagiti disipulona, ni Jairo, ken ti asawa ni Jairo. Napanda iti siled a yan ti ubing a babai a nakaidda.
Iniggaman ni Jesus ti ubing a babai. Imbagana kenkuana a bumangon. Timmakder isuna ken nagna. Nasdaaw dagiti nagannak kenkuana. Imbaga ni Jesus kadakuada a saanda nga ibaga iti asino man no ania ti napasamak. Kalpasanna imbagana kadagiti nagannak ti ubing a babai a mangted kenkuana iti maysa a makan.