Kapitulo 53
Nailansa ni Jesus iti Krus
Sinurot dagiti adu a tao dagiti soldado bayat ti panangipanda ken ni Jesus iti maysa a turod nga asideg iti Jerusalem. Pinabagkatda Kenkuana ti bukodna a krus. Inlansada dagiti ima ken sakana iti krus ket impangatoda daytoy. Inlansada pay iti krus ti dua a sabali pay a lallaki, a mannanakaw.
Nagkararag ni Jesus. Indawatna iti Nailangitan nga Ama a pakawanenna dagiti soldado a nangilansa Kenkuana iti krus. Saanda nga ammo nga Isu ti Mangisalakan.
Nakatakder ni Maria, ti ina ni Jesus, iti abay ti krus. Adda met idiay ni Apostol Juan. Imbaga ni Jesus ken ni Juan nga aywananna ni nanangna. Inyawid ni Juan ti ina ni Jesus iti pagtaenganna.
Nakumotan ti daga iti sipnget. Nagsagaba ti Mangisalakan iti krus iti uneg ti adu nga oras. Iti kamaudiananna pimmanaw ti espirituna iti bagina, ket natay Isuna.
Idi matay isuna, nagkintayeg ti daga ket dagiti bato napispisida. Ket ti abbong iti templo, a maawagan iti belo, ket napigis a naggudua. Nagbuteng dagiti soldado a Romano.
Maysa kadagiti disipulo ni Jesus ti nangibaba iti bangkay ni Jesus iti krus. Binungonna iti lupot ket inkabilna daytoy iti maysa a tanem, lugar a pangipumponan kadagiti tao. Naitulid ti maysa a dakkel a bato iti sango ti tanem.