Kapitulo 34
Ti Ubing a Lalaki a Naluganan iti Dakes nga Espiritu
Maysa nga aldaw indawat ti maysa a lalaki iti Mangisalakan a tulonganna ti anakna a lalaki. Addaan iti dakes nga espiritu ti ubing a lalaki kenkuana. Pinadasen nga agasan dagiti disipulo ti anakna a lalaki, ngem saanda a kabaelan.
Imbilin ni Jesus iti lalaki a mangyasideg iti anakna a lalaki Kenkuana. Idi umasideg ti ubing a lalaki, ti dakes nga espiritu ti nangitublak kenkuana iti daga.
Sinaludsod ti Mangisalakan no kasano ti kabayagen nga adda ti dakes nga espiritu iti ubing a lalaki. Kinuna ti ama nga addan kenkuana daytoy manipud pay iti kinaubingna.
Kinuna ni Jesus a maagasanna ti anakna a lalaki no adda pammati ti ama. Nangrugi a nagsangit ti ama. Kinunana nga adda pammatina. Ngem indawatna ken ni Jesus a tulonganna a maaddaan iti dakdakkel pay a pammati.
Binilin ni Jesus ti dakes nga espiritu a rummuar iti ubing a lalaki ket saanen a sumrek manen kenkuana iti kaano man. Nagpungtot ti dakes nga espiritu. Sinaktanna manen ti ubing a lalaki. Kalpasanna tinungpalna ni Jesus ket pimmanaw.
Naulimek unay ti ubing a lalaki ta kinuna ti adu a tattao a natayen isuna. Ngem iniggaman ni Jesus ti imana ken tinulonganna a tumakder. Naagasan ti ubing a lalaki. Pimmanawen ti dakes nga espiritu.
Idi agangay sinaludsod dagiti disipulo ken ni Jesus no apay a dida kinabaelan a papanawen ti dakes nga espiritu iti ubing a lalaki. Imbaga ni Jesus kadakuada a no dadduma kasapulanda ti agayuno ken agkararag tapno maagasan ti maysa a tao.